مروة رخا لمجلة احنا – سوق النخاسة

Date posted: June 1, 2009


الشهر دا جاى كمية مشاكل من بنات و أولاد على وش جواز و جوازاتهم بتتفشكل بسبب عادات و تقاليد قبلية لم يتحرر منها مجتمعنا حتى الآن.

المشهد الأول:
العريس: أنا يشرفنى يا عمى انى أطلب ايد سوسو للجواز
أبو سوسو: طبعا يا ابنى … سوسو متربيا على الغالى و اتصرف عليها كتير. عندك شقة؟
العريس: أيوة
أبو سوسو: هتكتبها باسم سوسو طبعا
العريس (و هو بيشر عرق): طبعا يا عمى
أبو سوسو: أنت طبعا عارف ان بنات عمها جاتلهم شبكة بكذا و اتدفع لهم مهر بكذا و اتكتب لهم مؤخر بشئ و شويات
العريس بيهز راسه من غير كلام
أبو سوسو: ليا طلب اخير
العريس: حضرتك تأمر يا عمى
أبو سوسو: اكتب لى وصل أمانة ب 5 مليون جنيه و طبعا دا لن يستخدم الا فى حالة حدوث أى ضرر لسوسو!

المشهد التانى:
العريس: أنا يشرفنى يا عمى انى أطلب ايد سوسو للجواز
أبو سوسو: طبعا يا ابنى … بس انت تعرف سوسو منين؟
العريس: احنا زمايل فى الجامعة
أبو سوسو: هو انت لسة طالب؟
العريس: ايوة بس انا باشتغل من وانا عندى 16 سنة و كونت نفسى بنفسى و دفعت مقدم الشقة و ناوى ادفع مقدم العربية قريب و …
أبو سوسو: هو انت أهلك مش ناويين يساعدوك؟
العريس: لأ .. بس انا راجل و باشتغل و بادرس و معتمد على نفسى و ….
أبو سوسو: لأ يابنى ما عندناش بنات للجواز!

المشهد الثالث:
سوسو و صاحبها أخيرا اتخطبوا بعد سنتين مصاحبة و راح يزوهم فى البيت
أبو سوسو: أنا ما يعجبنيش الحال المايل يابنى
خطيب سوسو: خير يا عمى حصل ايه؟
أبو سوسو: دخول و خروج و نزول و صور على الفيسبوك بتاعكو دا …. دى قلة أدب!
خطيب سوسو: دى كلها خروجات وسط أصحابنا و زمايلنا و أنا عندى اخوات بنات يا عمى .. مايصحش كدة
أبو سوسو: اسمع بقى يابنى .. اللى اوله شرط اخره نور …. مافيش خروج … عايز تعرفها تعرفها هنا وسطنا! و ما فيش ركوب عربيتك … تنزلها فى الشارع و هى تاخد تاكسى … و مافيش تليفونات بعد الساعة عشرة … و
خطيب سوسو (فى سره) أنا غلطان انى خطبتها … ما كنت مصاحبها و داخل خارج معها

المشهد الرابع:
أم سوسو: سوسو متعلمة فى مدارس انترناشونال و خريجة جامعة خاصة و شغالة فى شركة مالتيناشونال … و كل يوم و التانى جايلها عريس بس تقولى ايه بقى … ابنك هو اللى عجبها
أم العريس (لوت بوزها): ابنى مش قليل يا أم سوسو .. ايه الكلام دا؟
أم سوسو: لألأ العفو .. انا مش قصدى … المهم هنعمل ايه علشان نفرح الولاد؟
أم العريس: احنا جيبنا له الشقة و ان شاء الله نعمل له احسن حاجة
أم سوسو: و ناويين على ايه؟
أم العريس: شبكة و مهر 50 الف جنيه
أم سوسو: ايه دا و دول يجيبوا ايه .. احنا عايزين خاتم بفص بـ 30 الف و الفرش النص بالنص
أم العريس: كتير يا ام سوسو
أم سوسو: هى سوسو شويا … دى اتقدملها سفراء و دكاترة
أم العريس (على مضد): ربنا يقدرنا
أم سوسو: و قايمة ب 500 الف جنيه
أم العريس (بحدة): احنا ما عندناش حد بيكتب قايمة
أم سوسو: و احنا ما عندناش حد بيتجوز من غير قايمة .. مش عفشها دا؟
أم العريس: هو ابنى جاى من الشارع؟ هيعمل ايه بالعفش يعنى؟
أم سوسو: و المؤخر 80 ألف
أم العريس: و شهر العسل و الفرح النص بالنص .. احنا ناس نعرف فى الاصول

أم العريس وافقت مرغمة و سوسو بعتت تسألنى ليه حماتها مش طايقاها و مش بتتصل تسأل عليها … يا ترى ليه؟

كلمة أخيرة: اذا جاءكم عريس متريش و بقايمة زوجوه!

Bookmark and Share