fbpx
مونتيسوري مصر- تقدمها مروة رخا

مروة رخا لمجلة احنا – أمل و عمر … يلعبان

 

كتاب العربى كان مكتوب فيه: أمل تلعب فى الحديقة … عمر يقذف الكرة … عمر و أمل يلعبان

 
لا لا لا لا لا و ألف لا … دا كان زمان قبل ما يظهر النجم الهمام و يغير أحلام الشباب و الشابات و يفتنهم بحواجبه المعقودة و شعر صدره اللى مش لاقية له وصف!
 
عمر ساب المذاكرة و الرياضة و تفرغ لضرب البنات على مؤخراتهن فى الجامعة و النادى و شركة أبوه … و البنات تركب الهوا و تضحك … بلا تحرش بلا نيلة!
 
عمر واد ملحلح و ما فيش بنت بتعصى عليه! بيحط كولونيا علشان ريحته تلزق فى إيد أمل و ساعتها هيحتل تفكيرها.
 
عمر بيجيب ورد و بيتخانق علشانها فى الشارع و بينقذها من الأشرار و ساعتها هيحتل قلبها.
 
 عمر لسانه طويل و وشه مقلوب و إيده طارشة .. أيوة مش راجل دا و لا إيه ؟
 
عمر بيشتم أبوه عادى يعنى .. مش راجل و كبر اسم النبى حارسه و بيصوره فى أوضاع خليعة لزوم المرح و بيعرض الفيديو فى حفل عشاء عمل و كل الناس بتضحك … أنا مش فاهمة بس الأهالى التانيين محبكينها ليه؟
 
عمر بيغير و عينيه بتحمر و نابه بيزرق و ساعة الغضب بيعمى البصر و … بيناول أمل قلم يعدلها … أيوة حمش! كرامة إيه و عزة نفس مين؟ دا حتى ضرب الحبيب زى أكل الزبيب!
 
أمل بقى – اللى لسة واخدة قلم على صدغها – كبرت و اتربت على التناكة .. أيوة هى سايبة؟! أمل لازم ترسم الدور … لازم تعامل عمر معاملة الكلب الجربان و لا تديله وش و لا ريق و لا فرصة انه يتكلم أصلا! لا كلام جوا الجامعة و لا برا الجامعة و لا خروج و لا دخول و لا هئ و مئ .. بلا قلة حيا! 
 
كتاب البنت المؤدبة بيقول كمان انها لازم تقفل السكة فى وشه و ترمى له الورد اللى جابه فى الشارع و ما تعبرهوش بتاتا الا اذا … الا اذا كانت عايزة منه حاجة .. يضرب واحد .. يغير عجلة كاوتش .. يشغلها عند أبوه … يخرجها خروجة نضيفة … كدة يعنى! و أهم حاجة التناكة و الضحكة على القد و الكلام بالقطارة!
 
عمر زى أى راجل ما اتفطمش لازم يشوف فيها حنان الأم … و دى أهمية الجدة المريضة! و صاحبة عمر اللى قبل أمل لازم تكون نهايتها سودة علشان فضلت مستقبلها المهنى على عمر!
 
 
العلاقة بين أمل و عمر بتاخد منحنى تانى خالص أول ما عمر جاب سيرة الجواز (موسيقى تصويرية يا جماعة)
 
 
أمل عادى تروح له البيت بعد ما كانت رافضة تقعد معاه وسط الناس فى الجامعة و عادى تخرج مع أبوه و صاحبة أبوه و عادى عمر يزعق فيها وسط الناس و عادى يخونها و لازم هى تسامح … الله … مش عريس؟ و عادى يضربها و تعتذر له عن سوء تصرفها .. عادى يعنى! يا جماعة عريس … عريس و البنت فى آخر سنة فى الجامعة!
 
 
الحمد لله بعد كام قلم على كام أغنية على كام ساعة حرقة دم اتلمت المتعوسة على خايب الرجا و عاشوا فى خبر كان و خلفوا جيل المستقبل و عملوا الجزء التانى اللى أبقى عيلة و بنت أى كلام لو اتفرجت عليه!
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”