fbpx
مونتيسوري مصر- تقدمها مروة رخا

كرسى الاعتراف عند مروة رخا – عملية زرع كرامة

"ممكن تزرعيلى كرامة؟"

بهذا الطلب الغريب بدأت حوارها معى.

"الإنسان بيتولد بكرامته يا مشمشة."

"لأ! أنا اتولدت من غير كرامة؛ اتولدت تخينة و مبعجرة … غير متناسقة … ظهرى محنى و شعرى أكرت مقصف … ماما كانت مش طايقة تبص لى … ماما لسة مش طايقة تبص لى."

و انهمرت دموعها بعد ان اختنق صوتها …

"من و انا عندى 13 سنة و انا بافرد شعرى فرد كيماوى – بيرم يعنى – و استعملت الـ "شين" و دلوقتى باحط "كيراتين" … شعرى بطل يطول و ماما بتقول لى شعرك زفت … ألمه تقول لى خبى وشك … أفكه تقول لى شكله مقرف!"

و اختنقت كرامتها …

"و انا فى الجامعة عملت عملية شفط دهون من فخادى و بطنى … العملية فشلت … و دلوقتى جلدى غير متساوى و معرج و لا كأنى شارع لسة متسفلت و عربية نقل عديت فيه! ماما بتقول لى ان انا بوظت نفسى …"

غطت بقايا كرامها بيديها … و بكت

"أنا عاملة عملية شد فى جفونى و نفخ لشفايفى و خدودى … و بعد ما اتخرجت عملت عملية تدبيس معدة … و فشلت! الدكتور دبس حتة من الطحال و كنت هموت! يا ريتنى مت! و بعد العملية أمعائى اتسدت و دخلت العمليات تانى … يا ريتنى مت!"

ماتت كرامتها …

"نفسى ماما تحضننى … ماما بتحبنى بس عمرها ما قالت لى … رحت النهارده اجيبها من المطار و ركبها 100 عفريت أول ما شافتنى … صوتها لسة فى ودانى و هى بقول لى "ايه شكلك دا؟ ايه المنظر دا؟ شكلك شرم***! ليهم حق العرسان يطفشوا من وشك! شكلك غبى … غبى!" ماما استحملت كتير لما بابا سابنا علشان تربينى انا و اخواتى بس هى بتحب كل اخواتى الا أنا!"

وُئِدت كرامتها و عزة نفسها…

"قابلته! خفت منه! قرب منى! قربنى منه! حبيته … قال انى حلوة … بكيت! قال انه هيتجوزنى … صدقته! سابنى … قال انى خنقته … قال انى لازقة … قال انى ماعنديش كرامة … قال انه مش ليا … انهرت"

داس على ما تبقى من الكرامة!

"رحت لدكتور نفسانى … قال لى ان انا خالية من الأنوثة و ان عمرى ما هاقدر اجذب راجل طول ما انا كدة … قال لى اتدلع … قلت مش عارفة! قال لى أشاغله … قلت مش فاهمة! قال لى هعلمك … يا ريتنى مت!"

و محى آثار الكرامة …

"علمنى كلام فى الجنس و سماه حب! فتح لى الـ "ويب كاميرا" و قال لى اتفرج! بعت لى رسائل جنسية و قال لى ابعتها لحبيبى … سمعت كلامه … حبيبى رجع … بس كلامه معايا متغير … صوته متغير … مش بيتكلم فى الجواز … كل كلامه فى الجنس … و انا مش فاهمة … مش حاسة … مش عارفة أرد … حبيبى على التليفون و طبيبى فى نفس اللحظة معايا على النت بيكتب لى أرد على حبيبى و اقول ايه …"

اغتصبت ذكرى الكرامة!

"حبيبى اتهمنى بالبرود … طبيبى اتهمنى بالبلادة … ماما مش طايقانى … نفسى أنام من غير دموع …"

و صرخت …

"هو انا وحشة؟ هو انا فعلا مقرفة؟ أنا حاسة انى مقرفة … انا مش بحب شكلى و لا شخصيتى و لا نفسى … أنا غيرت معالم وشى و لسة شايفانى فى المرايا … نفس البنت العبيطة اللى ما عندهاش كرامة! ممكن تزرعى لى كرامة؟"

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”