ليه فى بنات ممكن تعرف راجلين على بعض؟

Date posted: July 31, 2010


انا ارتبط بواحدة من كذا سنة بس الصراحه ارتباطى مكنش نابع عن حب حقيقى ناحيتها بس كنت ناوى على الجواز فعلا

المهم مع الوقت لقيت فيها حاجات مش عجبانى فى شخصيتها او بمعنى اصح كانت مختلفه مع شخصيتى

المهم يعنى بدات معاملتى معاها تكون عاديه ويمكن يكون فيها نوع من الاهمال 

المهم مع الوقت والمشاكل بتزيد بينا حصل كذا مره وانى كنت عايز اسيبها وهى تتمسك بيا وترفض ان نسيب بعض

وبصراحه سبب تمسكها بيا دا كان بيضعفنى دايما وهو اللى كان بيرجعنى

لغايه ما جيه اليوم اللى قررت فيه انى اسيبها بجد وفعلا حصل ومع ذلك برده كانت عايزه على الاقل ان حتى نفضل اصحاب اللى هو مانسبش بعض نهائى

المهم انا تمسكت بموقفى وسبتها

وبعد ماسبتها اكتشفت بالصدفه انها كانت تعرف واحد من فتره مش قصيره وكانت مرتبطه بيه ووبعد اكتشافى دا لقيت نفسى بفهم حاجات كانت بتحصل بينا وكلام كان بيتقالى بس مكنتش بفهمها ساعتها

الفكره فى الموضوع

الشخص اللى هى ارتبط بيه دا انا مش هكون كداب او اضحك على نفسى ممكن يكون احسن منى فى انو اداها اللى هى عايزاه لان حصل بيبى وبينو كلام وصلى الفكره دى
وكمان احسن منى ماديا بشكل كبير جدا
اللى هو شاب احسن منى بكل الاشكال

اللى هو انا معترف انى مكنتش بديها كتير وهو واضح انو بيديها كل حاجه

بس استغربت رغم ان معاها واحد زى دا كانت برده متمسكه بيا مع ان كان عندها الفرصه اكتر من مره انى انا اللى اسيبها وساعتها تروحلو وتبقى حره معاه ومتخفش من حاجه

 المهم فى الموضوع كلو انا اللى مش فاهمه لان بصراحه ثقتى فى نفسى اتزحزحت شويه وانا من النوع اللى ثقتى عاليا اوى فى نفسى
ليه هى عملت كدا وليه لو هى لقت حد تانى ماسبتنيش ورحتلو بدل ماتعرفنا على بعض ويبقى شكلها وحش قدامى
وبعدين فى كلمه مره قالتهالى ان انا السبب فى اللى انا وصلتهلها دا وطبعا ساعتها انا مكنتش فاهم هى ايه اللى هى وصلتلو دا 
بس طبعا فهمت بعد كدا‬

—————————————————————-

شوف يا مشمش

بنات حوا مش بيحسبوها بالورقة و القلم

ممكن تسميه غباء
🙂

يعنى لو بالورقة و القلم .. هو يكسب
و كل حاجة تقول انها لقت حد احسن منك يبقى تسيبك و تروح له و تبتدى من جديد

لكن بنات حوا بقى عندهم لعنة كدة اسمها العواطف

هى يا سيدى بتحبك
نوع من انواع الادمان
الضعف
جلد الذات
ممكن حتى تسميه عند مع نفسها أو شبطانة فيك

فعقلها قال تروح مع الولد التانى … و دا حصل
و قلبها قال مش قادرة تبعد عنك …. و دا كمان حصل

يعنى هى كانت محتاجة لك فى حياتها علشان علاقتها تتظبط مع التانى

محتاجة تحس بتجاهلك علشان تجرى على التانى
محتاجة تحس بجرحك علشان تدور على الدوا عند التانى

محتاجة تشوف نارك علشان تقدر جنة التانى

فهمت بقى هى ليه عرفتكم على بعض؟

Bookmark and Share