احنا فى غربة و مراتى بتفضل أهلها عليا

Date posted: July 31, 2010


عايز اتكلم معاكى فى موضوع بسيط خاص بمراتى

و هو باباها و مامتها و النموذج الكلاسيكى الى مخلى مراتى منقسمة بينى و بين باباها و ماماتها مش قادرة تقتنع ان اى خلاف فى وجهات النظر بينى و بين باباها و ماماتها ده شىء عادى و الاهم ما عندهاش القدرة ابدا على مواجهة اهلها و تقولهم جوزى رايه كده و الاهم ان الكلام لما انا اقوله يقف فى الزور و لما هى تقوله يقتنعوا بيه فساعة اشد و ساعة ارخى معاها و معاهم

و لكن الى بجد ضايقنى ان فى مصر حسيت انى نمرة عشرة فى حياتها و ان اهلها عندها من نمرة واحد لنمرة تسعة 

ان كنت قدرت احدد حدود العلاقة مع امى الى عايشة معايا بس اخد وقت هى ما عندهاش استعداد تشترك معايا و لو بجزء بسيط فى رسم حدود العلاقة بينا و بين اهلهم 

و الله مانا عارف اقولى بينا و لا بينى و بينهم متضمنة هيا 
عارف انك مش حابة المشكلة و انها مشكلة تبان خايبة و عبيطة و لكن الى مضايقنى انى عملتلها كل حاجة فلوس و لبس و فسح و سفريات و حرمت نفسى يكفى انك تعرفى انى بقالى سنتين ما جيبتش لنفسى بدلة علشان اعوضها عن غياب ام ابوها و امها و هى برضه ابوها و امها نرمة واحد لتسعة و انا نمرة عشرة 
بجد نفسى مسدودة منها على الاخررررررررر 
تفتكرى الانفصال حيريح ولا حيتعب الناس بتقولى حيتعب 
مش عارف 
يوم عن يوم بحس انى واخد مقلب‬

————————————————–

و النبى بلاش كلام عن الانفصال

هما بس تلاقيهم كانوا واحشينها

و انتم فى غربة

و هى طول عمرها فى علبة قطيفة

و انت شغلك دلوقتى و طول عمرك هيفضل برة مصر

و هى شكلها عاطفية و خايفة من زيارة للتانية ترجع تلاقيهم ناقصين مش زايدين

فاهم؟‬

—————————————-

دائما ما تلمسى النقط الصحيحة هى فعلا بتفكر كده بس دى مش طريقة تفكيرى خالص الصراحة فمحتاج نصيحة 
اتعامل ازاى مع الحنين الجارف اوى ده الى تاعبنى‬

————————————————

تتفهمه

و تفكر ان بنتك بكرة هتتجوز و ممكن تسافر مع جوزها

تحب تعاملك انت و مامتها ازاى؟

حاول تحط نفسك مكانها

بصراحة بصراحة يا مشمش

انت انانى فى النقطة دى

ايه يعنى شوية اهتمام زايد بأهلها اللى بقالها سنة ما شافتهمش؟

انت ربنا رحمك من الاحساس دا لأن مامتك – اللى هى كل أهلك – معاكم فى غربتك

Bookmark and Share