fbpx
مونتيسوري مصر- تقدمها مروة رخا

أنا مش عارفة ليه سمحت له يلمسنى بالطريقة دى

 

اول حاجة انا  محرجة جداااا و فكرت مليون مرة قبل ما بعت ومش عارفة هل اقدر اتكلم ولا لأ انا هاتكلم عشان 
 
اللي انا فيه احساس بشع مش قادرة استحمله بجد ولا قادرة اتكلم مع اي حد عشان ده كلام مايتقالش
 
ومحدش ها يحس ببشاعة اللي انا فيه الردود واحدة والكلام كله واحد وتعبت منه
 

 
انا عندى 27 سنة و مابشتغلش جربت الشغل ماعرفتش 3 مرات و فشلت
 
 لنفس السبب و هو طمع الناس فيه ومش دس المشكلة اللي انا فيها دلوقتي هي جزء و جايز جزء كبير
 
 
اخواتي اتجوزوا وانا قاعدة مع ماما و بابا والموضوع ده مش مضايقني علشان انا رافضة اقرب من حد وخايفة ليا تجارب كتيرة اوي جايز اغلبها تسرع و تفاهة بس اتعلمت منها كتير وشفت واتعرفت على نوعيات من البشر اكتر و حاجات ماكنتش اتصور اني اشوفها حلو اني شفت كل ده طبعا و وحش اوي اني بقيت اخاف من العلاقة الجادة اللي هي الحقيقية (الجواز)
 
الناس بتقرب من الجد وانا بهرب منه بالمشوار وده بداية موضوعي انا بعتذر ان الموضوع طويل والكلام اكتر بس انا محتاجة اتكلم و محتاجة الاكتر اني اتكلم بصراحة والاكتر كمان اني ماسمعش الردود العادية اللي بتخنق اكتر
 
انا هادخل في الموضوع من حوالي سنة ونص انا حصلي كسر خلاني حركتي قليلة اوي و ده عملي زيادة في الوزن كبيرة و من حوالي 3 شهور رحت لدكتور سمعت انه ممتاز و شاطر والحمد لله هو دكتور ممتاز لأنه الوحيد اللي عرفت اوصل معاه للنتيجة دي ولسه طبعا قد اللي نزلته كمان محتاجاه
 
انا وهو قربنا من بعض بس انا هارجع افكرك اني بهرب من العلاقات الجادة بنجذب للعلاقات المستحيل تبقى جادة
 
هو متجوز و عنده اطفال وده انا معرفتوش غير متأخر شهر بس عايزة اوضح حاجة القرب اللي انا هاحكيه ده
 
 مش تليفونات ولا مقابلات ولا القرب الطبيعي لأ ده قرب ماشي في اتجاه واحد قرب مني وانا عنده ولقيتني
 
 انا كمان بقرب بنائن غلى ايه ماعرفش لا هو حب ولا هو اي حاجة وباسني ودي اول مرة بعد كدة وقف
 
 الموضوع على كدة مش اكتر في يوم انا كان ورايا حاجات كتيرة اوي واتأخرت .. كانت الساعة 7 و العيادة بتشطب 10 فعلا كان لسة بدري
 
ورحت له كان في ناس قبلي واستنيت دوري و كانت اول مرة اروح في الوقت ده انا لما دخلت كانت البنت برة  لسة موجودة اتفاجئت وانا جوة انها مشيت مجرد ما دخلت بس عادي اليوم ده انا استغربت نفسي جدا انا
 
 هاقول على كل حاجة 
 
لقيت نفسي مستسلمة اوي و طفا النور محصلش حاجة لأني كانت عندي البيريوت بالمناسبة انا فيرجن
 
 الحمد لله المهم حصل بيننا حاجات كان فيها نوع من الأنانية من ناحيته وفي نفس الوقت انا ماكنش ينفع
 
 عمل اي حاجة ومجرد ماهو خلص خلاص نمشي لأن الساعة كانت داخلة على 11 وهو اللي طلب نمشي
 
 ماهو خلاص استريح اقسملك بالله ان ماقلعتش حتى البوليرو اللي انا لابساه جايز ماتصدقنيش بس هو ده اللي حصل
 
نزلت من العيادة قرفانة قرف الدنيا و قرفانة من نفسي و كلمني تاني يوم عالفيس بوك قلتله انا مش هاجيلك  تاني
 
عارفة كان تبريري ليه ؟؟؟ لمجرد ان اللي حصل كان فيه شئ من الأنانية مش لأنه حصل
 
المهم هو سابني اهدا و ماكلمنيش نهائي ده خلاني احس اني فعلا زي الشوارع بالظبط
 
ورحت كذا مرة بعدها و محصلش بننا اي كلام لحد ما في مرة سألني انتي زعلانة مني؟؟
 
رديت قلتله ليه ؟؟؟
 
قاللي انا سبتك تهدي و كلام من ده و خلاص عادي رجعت اروح طبيعي جدا بس زيي زي اي حد و باخد بالي كويس اوي
 
 
في مرة من حوالي اسبوع اتكلمت معاه عالفيس بوك وده لأني بسأله على حاجة ينفع اكولها ولا لأ
 
طلب مني اني اروح علشان يعتذرلي مش اكتر وده كان يوم غير المواعيد اللي انا بروح فيها
 
روحت واتكلمنا و القاعدة كانت نظيفة و كنا لوحدنا هناك وباس اييدي واعتذرلي وطلب مني نبتدي صفحة جديدة واني انسى اللي فات
 
انا اسفة اني طولت بس معلش استحمليني شوية 🙁
 
وطلب مني اني انام معاه رديت قلتله انت تاني ؟؟؟؟
 
قاللي المرة دي اوعدك ان اللي حصل مش هايتكرر قلت له لا يمكن انا لازم امشي و مشيت و مفكرتش في اي حاجة لأن كان عندي امتحان تاني يوم الصبح وهو كان عارف اني عندي امتحان
 
 
انا كل اللي بفكر فيه انا هاعمل ايه و في نفس الوقت مش هاقدر اقول لماما اللي يخليني ماروحش تاني ولو رحت هاثبت اني واحدة وسخة و غير كل ده انا صعبان عليا النتيجة الكويسة اللي انا وصلتلها دي تضيع وغير اني حاسة احساس بشع مايتوصفش من كتر بشاعته لانا عارفة اوصف النار اللي جوايا ولا عارفة انا حاسة  ايه بالظبط
 
انا مش عارفة انا بعمل في نفسي كدة ليه بجد اقسملك انا مش كدة بس انا نفسي اعرف اعمل ايه ؟؟؟؟
——————————–
 
أهلا يا مشمشة
 
الحمد لله انها جت على قد كدة
 
و الحمد لله انه طلع انانى
 
و الحمد لله انها بانت من اول مرة
 
و الحمد لله انك ما اتعلقتيش بيه
 
و الحمد لله انك ما ادمنتيش لمسته
 
انتى عملتى كدة فى لحظة ضعف
 
انا مش ب ابرر ليكى
 
انا باشرح لك عشان ما تقعيش نفس الوقعة دى تانى
 
انتى بقالك كتير مش فى علاقة
و ليكى احتياجات عاطفية زى الاهتمام و الكلمة الحلوة و الوجه المالوف و المساندة و التفهم و كدة
 
و موضوع الكسر و الوزن اثر على معنوياتك
 
كل دا خلاكى فريسة سهلة
 
هو بقى قرا دا فى عينيكى
 
و بدل ما يفتكر اليمين اللى حلفه
 
استغل ضعفك قدام طبيبك
 
طبعا انتى غلطانة
 
لكن اللى عايزة اقوله ان عشان الموضوع دا ما يتكررش تانى معاه او مع غيره لازم تشبعى احتياجك للحب فى حاجة تانية
 
فى ناس بتعمل دا بالنجاح فى الشغل او بالاندماج فى الاسرة او بالحيوانات الاليفة
 
و أهم حاجة
 
انا مش عايزاكى تبطلى تروحى
 
اولا عشان تكملى الدايت على خير
ثانيا عشان انتى مش على راسك بطحة
ثالثا عشان انتى كبيرة و ناضجة و قوية و بتعرفى تقولى لأ
رابعا عشان ما فيش حاجة هتحصل غصب عنك
و خامسا فى ايدك تخلى علاقتك بيه علاقة دكتور بمريضة و بس
 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”