أهله شايفينها واحدة من الشارع

Date posted: July 31, 2010


بسم الله الرحمن الرحيم

انا فتاه عندي 21 سنة  ومشاكلي كتير بجد بس هحاول اختصر عشان مطولش عليكي

انا كنت عايشة انا واهلي في الخليج

وانا عندي 13 سنة حصلت معايا  علاقة خلتني فقدت عذريتي محدش يعرف لحد الان غيري انا واختي وربنا وحد كمان

رجعنا من 7 سنين مصر عشان والدي زهق من عيشة برة

اول منزلنا حصلتلنا مشكلة انا واختي ربنا يسامح اللي كان السبب وتسببت اننا  اتعملنا قضية غير مشرفة بسبب ظابط

بس الحمدالله اخدنا براءة عشان ربنا عارف اننا مش كدة وعشان احنا الحمدالله اسرة مستواها المادي جيد جدا دي حاجة

بعد ما خرجنا من الموضوع ده قابلت شخص جاري عندة دلوقتي 27 سنة ارتبطنا ببعض وان قلتله اني مش بنت وحصلت بينا علاقة لغاية دلوقتي واهله عرفوا بالعلاقة دي

وهو مصمم انو يتجوزني ومش عايز يتجوز غيري لانا بنحب بعض اوووي وانا مريحاه في كل حاجة بعمل كل حاجة هو عايزها وبسمع كلامة ولكن في السنوات الاخيرة حصلت مشاكل كتير اووووي بينا وبين اهله انهم مصصممين انه بتجوز بس مش مني طبعا مع العلم انه جاهز ماديا في كل حاجة ومستواهم ممتاز

بس هو وعدني انه هيكلمهم بجد الفترة دي عشان نتخذ خطوة بجد

انا مقدرة انه عارف اني مش بنت ومع ذلك مصمم انه يتجوزني وانا بحبه اوووي بس حاسة اننا مستحيل نكون لبعض ودايما بنسيب بعض كتير وبنرجع مبنكملش ايام ومتمسكين ببعض جدا انا مش عارفة اكمل واشوف فعلا هيتم حاجة زي ما هو بيقول ولا  هو بيصبرني بس

واحنا على الحال ده بقالنا 7 سنين  

انا بس كنت عايزة اقولك اننا في البيت الاحوال مش مستقرة خالص وعلطول في مشاكل فالبيت ممكن ده يكون سبب اني متمسكة بيه وعايزة اني اتجوز وابعد عن البيت برده ياريت تردي عليا بجد محتاجة ردك ده واسفة اذا طولت عليكي

——————————————-

حبيبتى

 
انا حاسة انك بتهربى
كل قراراتك هروب
 
انتى قررتى تحبيه من 7 سنين لأنه الوحيد اللى رضى بيكى
و خضعتى له و نفذتى كل رغباته لأنك خايفة تخسريه و ماتلاقيش غيره
و مستحملة رفض اهله و كتر مشاكلكم علشان تهربى من مواجهة احتمال انكم تسيبوا بعض
و دلوقتى عايزة تتجوزيه علشان تهربى من مشاكل بيتكم
 
كل دى اسباب غلط و قرارات غلط
 
اولا هتتجوزيه ازاى و تخلفى منه ازاى و اهله باصين لك على انك واحدة من الشارع .. اهله دول هيبقوا اجداد ولادكم
 
ثانيا هيدخلوا بيتكم ازاى و المشاكل ممكن تتفجر فى اى لحظة
 
ثالثا انتى فعلا عايزاة تكملى معاه بقية حياتك عن اقتناع و لا عرفان بالجميل
 
رابعا طول ما انتى بتهربى من نفسك الناس هتهرب منك
 
طول ما انتى بتهربى من مشاكلك هتفضل المشاكل تزيد و تتراكم
 
الحل اللى هقترحه عليكى صعب بس مش مستحيل
 
أنا عايزاكى تبتدى صفحة جديدة و تعملى لنفسك سمعة جديدة مع صحبة مختلفة.
 
لو الزمن رجع بيكى لورا كنتى هتغيرى ايه فى تصرفاتك و اختياراتك؟ فى حاجات مش هينفع ترجع لكن فى حاجات ممكن تتعمل … احترامك لنفسك ممكن يرجع … طوحك ممكن يرجع .. احلامك ممكن ترجع … حتى سمعتك ممكن ترجع …
 
السمعة هى تراكم انطباعات الناس عنك و جمال الانطباعات انها بتتنسى و بتتغير و بتتعرض للاحلال و الابدال … يعنى الناس ممكن يغيروا انطباعهم عنك لو انتى غيرتى من حياتك و شخصيتك
Bookmark and Share