زمن التسبيل و البصبصة

Date posted: September 22, 2010


ازيك يا مروة؟

يارب تكونى بخير وفى أحسن حال؟

أنا عندى 25 سنه حبيت مرة فى حياتى وكانت تجربة مؤلمة انتهت بالفراق ومش عايزة ادوشك بتفاصيلها بس صدقينى لو قلت لك لغاية دلوقتى معرفش اذا كان فراقنا فعلا غصب عنه والا لا!
لكن الحمد لله التجربة دى قوتنى أوى وغيرت كتير فيا

بس مشكلتى انى حاسه بوحده فظيعه حاسه ان فيا مشكله انا كما يقال عنى حلوه ومحترمه ورومانسيه ومثقفة ده راى الناس فيا وشكلى اصغر من سنى كلهم شايفنى كده

بس معرفش ليه لما بحس بارتياح لحد ما بعرفش او ما بفهمش هو حاسس بايه وطبعا كرامتى عمرها ما هتسمح لى احكى له او اعمل حاجه انا فى رايى البنت لازم تكون ملكه ما ينفعش تتعامل بشكل تانى مع اى حد مهما حبته من غير ما تعرف مشاعره الحقيقية

دلوقتى انا حاسه بمشاعر جميله اوى ومريحة اوى لواحد زميلى بس صدقينى لو قلت لك ما اتكلمناش خالص غير مرات قليله اوىىىىىىىىىى هو كان معايا فى مكان شغلى وكان كل اللى بيننا مجرد نظرات وبصراحه اكتر كانت منه هو كانت نظرات فيها ابتسامة طول الوقت وساعات بحسها اعجاب لما كنا نقعد فى اى اجتماع او ندوه كان طول الوقت يبص لى لدرجة انى مرة اتكسفت وبصيت على الارض فاخد باله وسكت

والمشكلة انى برتاح له وبحس جنبه ان قلبى بيدق تصدقى اول مرة قلبى يدق مع حد حتى فى تجربتى القديمه عمرى ما حسيت ان قلبى بيدق كنت فاكره ده فى الافلام والروايات بس!
لكن عمرى ما عملت حاجه تحسسه بانى فى حاجه جوايا والاغرب ان الميل بتاعه عندى اخدته لما كان فى شغل محتاجه لرايه فيه وكلمته بس علشان الشغل مرتين وبعد كده ما حصلش بيننا كلام خالص تقريبا غير مرة او مرتين وكان بسبب مش لمجرد الكلام او الفضفضة ولمدة دقايق

بس لما بشوفه على الميل ببقى مبسوطه وحاسه بدفا من غير ما نتكلم مجرد وجوده بس بيحسسنى باحساسا جميل مش قادره اوصفه ولما يدخل بتخنق اوى واحس انى عايزة اعيط يعنى دلوقتى مثلا هو دخل وانا مخنوقة اوى

معلش يا مروة اعذرينى بس والله دى مشاعرى وعلى فكرة انا كرامتى بتغلب قلبى يعنى مش بتصرف بتهور ولا بطيش

انا بجد يا مروة اللى مخلينى عامله كنترول على قلبى انى مش عايزة اتجرح تانى أو أتالم تانى

انا عامله زى اللى قافله قلبها مش بدى لنفسى فرصة وكمان هدى لنفسى فرصة ازاى ومعرفش خالص حاجه عن مشاعره ده حتى مش عند على الفيس بوك مع ان بيننا اصدقاء مشتركين فوق الخمسين ولاهو عمل لى اضافة ولا انا هقدر اعمل ده من نفسى

بانتظار ردك يا مروة وانا برتاح لك اوى وحاسه انى ارتحت كتير لما حكيت لك
___________________________________

 

طيب سؤال
 
هو ليه مقضيها نظرات؟
 
اصل موضوع النظرات و التسبيل دا انتشر جدا اليومين دول
 
الراجل من دول يبص بصتين و يسبل تسبيلتين و البنت تقوم تجرى بقى تتكلم و تحاصر و تعبر و تلاغى و تبعت تسألنى و كدة يعنى
 
فى قدامه بدل الفرصة عشرة علشان يتكلم معاكى و يقرب منك و يتعرف عليكى اكتر
 
لكن هو قاعد زى الأسد و انتى اللى رايحة جاية من قلقك
 
اسمعى الحلقة دى
 
 
انتى عارفة ايه الفرق الأساسى بين الراجل و الست فى العلاقات؟
 
الست … احلى فترة فى العلاقة بعد ما تتحط النقط على الحروف
 
الراجل … احلى فترة فى العلاقة قبل ما تتحط النقط على الحروف .. المناوشات .. البصات .. الكلام المبهم … صيد الفريسة
 
انا حاسة انك مركزة بزيادة و هتتجرحى

 

Bookmark and Share