fbpx
مونتيسوري مصر- تقدمها مروة رخا

العادة السرية و الافلام الاباحية

 

أستاذة / مروة
 
أتمنى تكونى بخير
 
أنا بدأت من فترة قريبة أتابع برامجك و المقالات اللى بتكتبيها ، و بستمتع جدا بالحاورات و المناقشات اللى بتدور فى برامجك سواء " بحب فيك إيه " أو " المشرحة " البرنامج الواعد إن شاء الله
 
بس عمرى ما تخيلت إنى ممكن اقعد دلوقتى و أكتب لك عن المشكلة دى
نهائى
بس تقدرى تقولى ثقة مش عارف مصدرها إيه ؟!!!
 
انا مهندس عندى 23 سنة
بعتبر نفسى من الناس المحظوظة فى حياتها
بشتغل فى شركة كبيرة ، فى قسم للموهوبين بس ، أنا أصغر واحد فيهم ، وكل اللى مطلوب منى فى الوظيفة إنى أبتكر
 
بأدى فروضى من صلاة او صوم او غيره
 
براسل جامعات كبيرة فى العالم و بتدور مع الأساتذة الكبار فيها نقاشات علمية ظريفة
 
الحمد لله محبوب من الناس اللى حواليه
 
كلها حاجات بحسد نفسى عليها
 
بس عندى مشكلة واحدة
مشكلة واحدة بس مش قادر أتغلب عليها
قدامها بحس بالفشل دايما
 
ممكن تكون عدت عليكى قبل كده
و ممكن يكون فى غيرك كتير إقترحوا حلول لها
بس كل محاولاتى بائت بالفشل
 
المشكلة ببساطة فى سطر واحد
أنا مدمن مواقع إباحية و بالتالى عادة سرية   🙁
 
أنا مش عارف إزاى بكتب لك الإيميل ده فعلا 😐
بس تقدرى تقولى محاولة من واحد يائس يمكن تفيده نصيحتك
بالذات إنك بترمى الكلام من غير ما تجمليه
و انا مش محتاج حد يجمل لى الكلام
محتاج حد يقولى إنته غلطان  –  بس أنا عارف إنى غلطان
 
أنا بدأت أتعب من الموضوع ده
ذهنيا و جسديا
 
بأنكمش
على رأى واحد زميلى متخيل إنى ما بأكلشى كويس
 
نظرى بيضعف بإستمرار و الدكتور بيحاول يقنعنى إن ده شئ طبيعى إن نظرى يضعف لأن كل الناس نظرها بيضعف S:
 
تركيزى بيقل
أنا كنت بصمم روبوتات و أنا طالب فى تانية كلية
دلوقتى معايا تاسك فى الشغل بقالها 3 أسابيع و لسه ما خلصتشى
 
بقيت عصبى و كانوا بيتضايقوا من برودى قبل كده
بنسى أسامى الناس
 
و ………..  و …………. و ………..
 
تعبت
 
مش عارف اعمل إيه
انا عارف إن الموضوع نفسى
بس مش عارف أخرج منه
 
و لو فى حل مادى هحاول معاه
 
شكرا لوقتك
 
___________________________
 
اهلا بيك
 
أولا انت عارف ان انا مش طبيبة؟ و مش اخصائية نفسية؟
 
انا كاتبة و كتابتى كلها فى العلاقات العاطفية و اغلبها من الحياة العملية – سواء خبراتى الشخصية أو تراكم خبرات اللى حواليا
 
ثانيا
 
انا اول لما وصلنى ايميلك من قبل حتى ما افتحه اتخنقت منك – ليه؟
 
علشان يعنى ايه الاقى رسالة فى الانبوكس من حد اسمه
Egypt man
 
ايه يعنى ايجيبت مان؟
 
و افتكرت محمد صبحى و  اجيبشان هيبوسنى و اى ام دونكى
 
و بعدين لما فتحت الميل بصيت على العنوان كامل
man from egypt
 
و طبعا سبيت و لعن فى سرى
 
قلت ايوة
ما هى السمعة الزفت جات منين غير من اللى بيدخلوا يشقطوا بإسم مصر
 
و بعدين قريت الرسالة و ضحكت فى سرى و قلت على الله ما يكونش بيراسل جامعات بلاد برة بنفس الميل دا
🙂
 
طبعا انت تلاقيك مستغرب من كل اللت و العجن دا عن الميل بتاعك
 
اقول لك
 
هى دى مشكلتك … انت شايف نفسك عضو ذكرى و بس
و بريدك الالكترونى دا ما ينفعش تستخدمه فى حاجة اصلا غير حوارات النت و المواقع الاباحية
 
و مشكلتك مش هتتحل بالرياضة و لا بالشغل و لا بالصلاة و لا بالصوم و لا حتى بالجواز
 
مشكلتك هتتحل لما تغير نظرتك لنفسك و تغير طريقة ارسالك و استقبالك للمشاعر و تغير جهاز ارسال و استقبال المشاعر
 
واحدة واحدة
 
لما تبص لنفسك على انك انسان له عقل و له روح مش بس "بتاع"  هتقرف من المواقع الاباحية .. هتحس ان كل حاجة فيها مفتعلة و مصطنعة و ان الجنس اللى انت بتشوفه دا مجرد لحم بيخبط فى لحم … و مش بحق و حقيقى كمان. طبعا من وقت للتانى ممكن من باب التفاريح هتدخل تبص بصة … بس هتتفطم من الاحتياج دا
 
موضوع ارسال و استقبال المشاعر … الفرح .. الحزن … الأمل .. الخوف … الاحباط … الحب … الكره .. الغضب .. الزهق … اى احساس بتحسه بتعبر عنه و بتخرجه فى ممارسة العادة السرية … طبعا دا غير الاثارة الطبيعية اللى بتحصل للناس كلهم … و الاثارة المفتعلة اللى انت بتقصدها بالدخول على المواقع الاباحية
 
موضوع الجهاز … انت بتعمل زى كتير من ابناء الشعب اللى طول ما هما واقفين فى الشارع و سرحانين فى ملكوت الله ايدهم على البنطلون …. ربنا خلقنا فى صورة متطورة شوية عن كدة
 
و بعدين لما انت عايز تخلص من الادمان دا ليه حاطت البنزين جنب الكبريت …. ليه قاعد على النت على طول؟ ليه قدامك لاب توب و لا كومبيوتر دايما؟
 
اكيد انت مش بتعمل كدة و انت فى الشغل
يبقى الكومبيوتر يختفى من البيت
 
و الايميل المشبوه دا يتقفل
 
و ما تدخلش الحمام الا علشان الحمام و ما تدخلش تنام الا و انت تعبان و هيغمى عليك من التعب
 
مش عارفة أنصحك بإيه تانى .. بس جرب كدة الكام حاجة دول

 

 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”