fbpx
مونتيسوري مصر- تقدمها مروة رخا

زميلى بيكلمنى بصيغة الذكر

ازيك يا مروة

انا عندي مشكلة مازماني و يمكن خليتني اشك ف نفسي و ف انوثتي
في واحد زميلي علطول احسه يكلمني بصيغة المذكر زي انت و ياعم و يابرنس و كلام كدا و يقولي متزعلش نفسك يا معلم ، انا قلت بيهزر ممكن كاصحاب يعني فمكنتش بعلق اوي وبخدها بهزار بس بيسوق فيها و بقيت بضايق

فبقوله انت بتكلمني على اني ولد ليه قالي بعاملك باللي انتي عايشة فيه

عشان متربية مع اولاد ومفيش عندي بنات في العيلة

فبقوله يعني انت شايفني ولد

قالي اه انتي مش بتشوفي نفسك لما بتتخانقي كانك هتطلعي مطوه و تضربي زي الولاد البنات لما بتتخانق بتتمسكن انتي زي الولاد

قلتله انا بتخانق و زعلانة من حد هتمسكن ازاي يعني انا بشتكي ومتضايقة

قالي معرفش بس هما البنات بيعملوا كدا ،

اتضايقت اووي انه شايفني دكر ومش شايف فيا بنت ، انا ايوا متربية مع ولاد وعلاقاتي بالولاد و احتكاكي بيهم اكتر بس مش زيهم ممكن كلمات باخدها منهم بقولهاله بس مش جه ف دماغي انه يفكر فيا كده

و اللي فهمته انه ميقصدش مسكنة يقصد سهوكة مياصة

بس انا عموما مش بعرف اعمل كدا بحب ابقا ع طبيعتي مش امثل الرقة او اتصنعها او اعمل حاجة مش بتاعتي

كمان شايفني دبش ف كلامي مبعرفش اذوق الكلام او احوره بكذا طريقة بس دي شخصيتي واضحة و صادمة اللي ف نفسي بقوله مش باعرف اجيب حتة من هنا وحتة من هنا

هيا مرة واحدة وخلاص

مليش ف التحوير لدرجة انه شككني في نفسي

و اسال صاحباتي انتو شايفني مش بنت قالولي هو قصده زي مقلتلك مياصة و سهوكة عشان كل الولاد بيحبوا البنت كدا

كمان في حاجة مضايقاني مش عارفة اخرج منها انا مش مرتبطة كان في مشروع ارتباط بس فشل عشان محبيتوش لا هو ولا شخصيته

بس حاسة اني موقفة حياتي كلها على الارتباط و الحب

شغلي مش مهتمة بيه و لا راضية عن اللي بعمله ولا اي حاجة مع ان عقلي الباطن بيقولي امشي في الدنيا و حققي نفسك و نصيبك هيجيلك ومتوقفيش حياتك على حد بس مش عايزة ولا عارفة اقنع نفسي بدا زي مكون من غير ولد يهتم بيا و يزقني و يحمسني مش هعرف اتحرك و بجد انا متضايقةو من كدا جدااااااا ومش عرفه اعمل ايه

 

_____________________________

 

الغلط مش على زميلك
الغلط عليكى انتى اللى عملتى لكلامه اعتبار
 
مين سمح له اصلا انه يكلمك كدة؟ مين سمح له انه يحاكمك و يحكم عليكى و يعمل فيها عنتر؟
 
مين قال انه هو اصلا مقياس للرجولة؟
بذمتك فى راجل محترم يقول لبنت انها زى الولاد؟
 
مافيش جنتلة؟ مافيش ذوق؟
 
هو مدب و طربش كمان
 
انتى بقى لازم تثقى فى نفسك و تقبليها زى ما هى
 
لعلمك بقى
فى ولاد كتير مش بتخيل عليهم حركات البنات المسهوكة دى
و فى ولاد كتير مش بتخيل عليهم الشويتين بتوع البنات اياهم
 
و انتى لازم تبطلى تفكرى فى مين شايفك ازاى
 
you are who you are
 
و اللى مش عاجبه مايعرفكيش
 
و بعدين انتى يوم لما هتقابلى راجل بجد و تقتنعى انه راجل فعلا انوثتك هتظهر و هتطلعى كل اللى جواكى … لأنك هتحسى بالأمان
لكن أخينا دا و أمثاله مش بيحسسوا اى واحدة بالأمان … فاكر نفسه صياد زمانه و البنات أهداف متحركة!
 
موضوع الجواز بقى … ادخلى هنا و اقرى و اسمعى كل حاجة بالتفصيل
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”