fbpx
مونتيسوري مصر- تقدمها مروة رخا

أول لما خلص جامعة سابنى

السلام عليكم

ازيك يا مروه ان شاء الله كله تمام

بصي يا ستي انا كنت بحب واحد شوفته من سنتين تقريبا وحبي له بدا من سنة وكام شهر تقريبا انا في الاول يعني عندي 19 سنة وهو 22 سنة هو اتخرج السنة دي خلاص

الدنيا كانت ماشيه تمام من ساعه ماعرفنا بعض وهو كان اول حد في حياتي اصلا اول مرة اتعرف علي حد واوافق اننا نرتبط بعد لما حسيت انه حد كويس ومش بتاع لعب وكان عشان يثبت لي ده قالي انا ممكن اكلم اختك عشان تطمني زياده وواوضح لها اني مش بتاع هزار وفعلا ده حصل

وكمان عرفني علي اخته وقالي انه عرف والده علي الموضوع وانه حابب يرتبط بيا بس كان العائق هو انه لسه طالب ولسه ومااتخرجش من الكليه و انا كنت صابره علي اساس ان ده السبب حوالي سنة

والدنيا كانت تمام وماكانش في حد يعرفنا والا كان يعرف اننا لبعض وماحبناش نعمل حاحة في الخفا زي مابيقولوا كله واضح من الاول وكمان كل البيت عنده يعرف ودي كانت حاجة مطمنناني وكنت مرتاحه

المهم جه اليوم اللي خلص فيه وكان مهموم جدا وهو بيكلمني المهم سالته قالي مشاكل كده سالته

قال ان باباه بلغه رفضه لارتباطنا لاسباب ماتدخلش عقل اي انسان منها ان انا مش في هندسه او طب و انه مقامه حد زيه في التعليم و قال له مايستعجلش و بكره هيشوف كتير وحاجات من دي

و قاله كمان انه مش هيوافق علي الارتباط ده لانه يعرفنى من سنتين

بس احنا في السنتين دول ما كناش بنعمل حاجة في الخفا ولا مقضينا خروجات ومكالمات وكده وربنا هو اللي عالم

طبعا قعد يوضح لباباه كان شكل علاقتنا ازاي وانا شخصيتي ازاي وهو برضه رافض ويقوله كل الكلام اللي قولته ده و فى الأخر نهى الموضوع و قال له هي حد كويس بس ربنا يرزقها بالاحسن منك

حاول برضه يقنع والده وكده وهو رافض تمام الرفض ومافيش اي اسباب مقنعه وكل اللي يقوله انه اتربي علي كده ودي عاداته وان البنت المفروض تتخطب من 6 شهور لسنة وماتطولش عن كده وهو ده الصح وكل الكلام ده مع العلم انه كان موضح له من الاول من اول ماعرفني مش عارفه ليه مكانش في اعتراض حتي لما حاول يدخل والدته عشان تقنع والده حلف عليها بالطلاق وحوار كده

انا بقيت مصدومه وانا بسمعه ان كل ده حصل وليه اساسا وانه خيره بين انا وعيلته وحوار كبير كده

بصي في الاخر كده انا تعبت نفسيا جدا من الحوار ده وحاسه اني بجد ندمانه اني من الاول وافقت واني كنت مرتاحه من غير ارتباط ولا حاجة واحساسي برضه ان الشخص ده ماعملش كل حاجة عشان نستمر وان ممكن يكون كان في حل يقنع بيه والده وهو ماعملهوش وانه قالي انه مدام قال كلمه مش هيرجع فيها وانا مش عايز اظلمك معايا اكتر من كده وان ده الخير وكل الكلام ده اللي اكيد انتي عرفاه

انا كل ماافتكر اتعب جدا وبسبب الحوار ده تعبت جسديا وحالتي بقت يعني بجد مش محتاجة وصف وكل مااسمع عنه حاجة او افتكره افتكر كل اللي حصل واني اتخدت كده في كل الحوار ده  … وهو كان كل مااكلمه يقولي انا عملت اللي عليا وربنا هو اللي عالم ومافيش حل خلاص وانا مش هقدر اعصي ابويا وقال له لو روحت وارتبط بيها هتروح لوحدك وكل الكلام ده وكان انا فيا عيب مثلا اوي اي حاجة والله انا ما عرفها هو في ايه اصلا والحمد لله انا كان معاملتي معاه في كل احترام وكنت معرفه ماما بالحوار ومفهماها هو ظروفه ايه
انا طولت عليكي اوي بس بجد ده من تعبي اللي مش عارفه اتكلم مع حد فيه

انا بس عايزه رايك في كل الكلام ده وانتي شايفه ايه

_____________________________
 
بصى يا حبيبتى
 
 
انا هكلمك كأنك بنتى
 
احنا يا مشمشة عايشين فى الدنيا دى علشان تكون لنا تجارب و نتعلم منها
 
مش الهدف خالص اننا نعيش فى صومعة و نحرم نفسنا من التجربة و الخبرة
و مش الهدف خالص الندم و جلد الذات
 
انتى مريتى بتجربة ساعدتك انك تكبرى و تنضجى و أهلتك تبقى ام افضل و زوجة انضج
 
و هو دا هدف الحياة .. النضج
و ما حدش بينضج و هو قاعد فى الصومعة
 
انتى ما عملتيش حاجة ضد مبادئك و لا حاجة تندمى عليها
 
انتى حبيتى و اتألمتى و احنا بنكبر من خلال الألم … انا أعرف ناس المفروض انهم كبار و متجوزين و مخلفين لكن تجاربهم الحياتيه محدودة و دا خلا شخصياتهم محدودة و فكرهم محدود. انتى كنتى صغيرة و اختارتى عيل … بكرة هتكبرى و تعرفى الفرق بين الراجل و العيل.
 
الولد دا مش اخر راجل فى الدنيا و بكرة انتى هتتخرجى و تشتغلى و تقابلى ناس احسن منه كتير
هيكونوا انضج و اكثر خبرة
و هيكونوا مستعدين للارتباط
و هيكونوا مؤهلين لتكوين اسرة
 
حبك للولد دا كان مرحلة و عدت
سميه حب مراهقة
او حب جامعة
 
و مش هو دا الحب اللى بيبنى بيوت و جوازات
 
اهتمى بنفسك و صحتك و دراستك و مستقبلك
 
الطريق قدامك لسة طويل
و مثير
و فيه مفاجأت كتير
 
و بلاش تبصى وراكى
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”