عريسى بيحب صاحبتى

Date posted: October 13, 2010


انا عندى 20 سنة بشتغل فى شركة كويسة الحمد لله و بدرس فى نفس الوقت ومتفوقة الحمد لله فى دراستى و شغلى و محبوبة من كل زميلى الحمد لله

المشكلة انا ليا صاحبة هى اكتر من اختى احنا اصحاب من زمان ومتربين مع بعض و جيران ودخلنا الجامعة مع بعض هى كمان بتشتغل لكن بتشتغل فى فندق

المهم هى قدى عندها 20 سنة وليها مدير عنده 31 هى وهو اصحاب اووى اغلب الوقت بيقدوا مع بعض بحكم شغلهم المهم هو كان بيكلمها عن انه بيدور على عروسة وكدة وعايز يستقر هو تقريبا كان بيلمحلها انه معجب بيها وكدة

لكن هى كانت واضحة معا من الاول و قالتلوا انها بتحب واحد تانى هو يعرفه لانه زميلهم بيشتغل معاهم المهم هى قالتلوا انا ليا صاحبة كويسة و محترمة وجميلة و شاف صورتى معاها وقالها انا عايز اشوفها بس متقوليلهاش حاجة علشان مايكنش فى احراج 

بس هى قالتلى و كلمتنى عنه كتير  و قالتلى انه محترم وكريم و حنين اووى و بيدور على واحدة تحبه بجد المهم خرجنا انا وهى و هو جيه بحجة انه هيديها فلوس هى كان ليها عنده فلوس و قعدنا مع بعض نص ساعة تقريبا 

وبعدين كلمها و قالها هى حلوة اووى ومحترمة وبنت ناس لكن شكلها صغير اووى هى تقدر تتحمل مسئولية جواز هو انا فعلا شكلى اصغر من سنى بكتير كل الناس فكرانى لسه فى المدرسة ماحدش بيدينى سنى

فا هى قالتلوه دى بتدرس و بتشتغل فى نفس الوقت و ناجحه تبقى اكيد انسانة مسئولة
فا قالها طيب انا عايز اشوفها تانى وفى عروسة تانية واحد صاحبى جايبها هشوفها بردوا وهشوف قلبى هيرتاح لمين اكتر  و فكروا فى حجه و كدة علشان يجى بيها قدامى لكن انا عارفة هى مش بتخبى حاجة عندى

المهم هو ما شفش العروسة التانية وخلاص مش هيشوفها و شافنى تانى بس بردوا ملحقش يتكلم معايا كتير بس المشكلة بقى انى اكتشفت انه بيكلم صاحبتى ب4 ساعات على الموبيل ولما خرجنا انا وهو وهى تانى مرة كان عمال يختارلها لبس و حاسيت انه فعلا معجب بيها لكن انا متأكدة انها مش بتحبه وهو عارف كدة وعارف هى بتحب مين الغريبة بقى انه قالها بردوا انه مرتاحلى اووى و عايز يشوفنى كمان مرة ويتكلم معايا كتير علشان يعرفنى اكتر 

فا انا مش عارفة اشوفه تانى و اتعرف عليه ولا لا ؟تفتكرى لو هو لسه بيحبها فا لية جى شفنى و لية عايز يشوفنى تانى لية
انا خايفة يكون بحبها ومش مجرد اصحاب زى ماهى بتقولى و بتقوله
وخايفة يكون احساسى غلط و يكون اعجب بيا زى ما بيقولها مش عارفة؟     

 

——————————————–

قلقتينى يا مشمشة
 
أنا مش هقدر احكم عليه و على نيته لكن انا عايزاكى تفرملى قلبك تماما
 
الراجل لا نطق و لا عبر و لا اخد نمرتك و لا خرج معاكى لوحدكم و لا سالك أسئلة شخصية من اللى بيسالها الراجل لما يكون معجب بواحدة او بيفكر فيها و لا أظهر اهتمام خاص من أى نوع
 
يبقى انتى ما تتعلقيش بيه و لا تتعشمى فيه
 
الراجل لسة عصفور فى السما .. مش حتى على الشجرة
 
صاحبتك لما تكلمك تانى و تسألك عن رأيك
 
ما تندلقيش و تشبطى زى اللى ما صدقت
 
قوليلها مش عارفة .. حاسة انه كبير و مش شاب كدة و بعدين هو هادى بزيادة و مش بيكلمنى خالص
 
و خليها توصل له رأيك
 
حكاية بقى انه بيحب صاحبتك
 
انا مش فاهمة
هو قال لها انه بيحبها و هى صدته
و لا انتى حاسة انه بيحبها و بعد لما عرف انها بتحب حد تانى قال يشوفك؟
 
هو فعلا ممكن يكون بيحاول يخليها تغير و لا يحرك مشاعرها لما تحس انه هيروح منها
او لما هى تلاقى صاحبتها معجبة بيه
 
انا لا اعرفه و لا اعرف صاحبتك و انتى كل اللى فى ايدك تعمليه انك تتحكمى فى مشاعرك و ما تتعلقيش بالحبال الدايبة
Bookmark and Share