ازاى اتحول من أخ عزيز لحبيب

Date posted: September 30, 2010


مشمش مش عايزنى انشر تفاصيل رسالته بس هى ملخصها

ازاى اتحول من أخ عزيز لحبيب

____________________________

 

وجعت قلبى عليك 

 
اولا ما فيش حاجة اسمها انك هتغير شخصيتك علشانها
 
انت هتتغير علشان نفسك .. علشان تعجب نفسك .. علشان تبقى واثق من نفسك … علشان حياتك تبقى احسن و فرصك تبقى اكتر
 
علشان كدة انا باشجعك انك تطور من شخصيتك و تتجرأ و تكتسب ثقة بالنفس
 
ثانيا
 
انا مش مرتاحة لها
 
مش لانها وحشة
لأ
لانها عايزة صفات غير صفاتك و طريقة حب غير طريقتك
 
هى حطتك فى خانة الاخ و الصديق و نسيتك هناك
 
خوفى كله انها لو وافقت على ارتباطكم انها تكون مرحلة فى حياتها و لا لحظة ضعف و لا اى حاجة غير انها فعلا مقتنعة بيك
 
هى ممكن توافق علشان تخلى واحد تانى يغير
و ممكن توافق لحد ما تقابل حد تانى زى ما هى عايزة و ساعتها هتقولك انها حاولت و ما قدرتش
 
و انت بقى فى العلاقة دى هتقضى عمرك كله بتحاول تسعد ست الحسن و الجمال و هى برده مش راضية و مش عاجبها
 
لو الموضوع دا هيكمل
هيبقى السيناريو كالآتى
 
انت هتتغير و تبقى الشخص اللى انت تبقى راضى عنه
و هى بحكم احتكاكها بيك هتلاحظ دا
 
لو مشمش الجديد عجبها هى اللى هتتدلع عليك و تلاقيها جاية بتتمسح فيك
و ساعتها ممكن تقرب منها و تقرر عايز تعمل ايه
Bookmark and Share