fbpx
مونتيسوري مصر- تقدمها مروة رخا

البنات و العادة السرية و السرير و العلاقات الجنسية

هاي ازيك يا مروه انا طبعا عارفه ان موضوع العاده السريه ده موضوع متكرر بالنسبه ليكي بس المرادي كلامه يمكن يكون مختلف شويه

الاول انا بنت عندها 26 سنه بمارس العاده السريه وانا عاندي 6 او 7 سنين تخيلي ؟

بس طبعا مكنتش فاهمه اي حاجه

كمان انا كنت بمارسها بشكل مختلف جدا كنت بحط ايدي علي الاماكن الحساسه وبتخيل اني بضرب واهين الناس ومكنتش وقتها اعرف ان دي شكل من اشكال العاده السريه لحد وقت قريب جدا جدا

اولا انا بنت شكلي حلو جدا و هاديه و كل اللي يعرفني يحلف باخلاقي العاليه وانا فعلا كده بس لحد الموضوع ده ومعرفتش ابطله لحد دلوقتي ولما حاولت اقرا شويه عن حالتي دي اكتشفت انها نوع من الساديه وطبعا الكلمه دي بتخلي جسمي يقشعر لاني مش متخيله نفسي كده

المشكله ان مشاهد الاهانات الجسديه بتثيرني جدا زي الحاجات اللي كنا بنشفها في سجن ابو غريب والحاجات دي بس مش بتخيل دم وتعزيب كل تخيللاتي اهانات جنسيه فقط طبعا انا مش قادره اقولك قد ايه الصراع النفسي اللي انا فيه لاني مش عايزه اكون كده وطبعا مقدرش اروح لدكتور واحكيله حاجه زي دي

اه نسيت اقولك ان انا طول عمري حسمي حلو حاته وانا صغيره وطبعا مش هقولك علي المدايقات اللي كنت بتعرضلها حتي من قرايبنا ونظراتهم ليا لحد بابا وماما وكل اللبس اللي اتحرمت منه بس بصراحه الموضوع ده كنت بعمله حتي قبل ما جسمي يبدا في النمو انا عارفه اني طولت عليكي بس بجد الموضوع ده مخليني في صراع

مش هقولك عايزه حل بس عايزه اعرف انا ليه كده وهل فعلا ممكن الموضوع ده ينتهي عندي ولا هيفضل ماثر عليا حتي بعد الجواز انا عارفه اني طولت عليكي وصدقيني في حاجات كتير نفسي اقولهالك بس طبعا مش هينفع بليييييييز اهتمي برسالتي لاني خايفه افضل طول عمري كده ميرسي ليكي جدا

_________________________________________

 

أهلا يا مشمشة
 
فى الأول أنا كنت مش هرد على رسالتك اصلا
و بعدين قلت انى هرد بس مش هانشر ردى على موقعى
و بعدين رجعت فى كلامى و قررت أرد عليكى و انشر ردى و انا عارفة ان ردى دا مش هيعجب ناس كتير و هيفتح عليا النار
بس مش مهم
 
أولا موضوع العادة السرية اللى انتى بتمارسيها من الصغر
 
الطبيعى جدا فى كل أطفال الدنيا انهم فى سن 5 او 6 سنين – بنات او ولاد – بيبتدوا يستكشفوا جسمهم و يلمسوا المناطق الحساسة دى و لأن احساسهم بالعيب و الحرام لسة مش مسيطر عليهم بيعملوا كدة فى اى وقت و اى مكان
 
يعنى ممكن تلاقى طفل او طفلة قاعدين مع ماما او بابا او حتى قدام ضيوف و بيلمسوا نفسهم بكل تلقائية
 
رد فعل الاهل هنا هو اللى بيحدد حاجات كتير بعد كدة
 
يعنى لو الام او الاب اتنفضوا من مكانهم و لطشوا الطفل بالقلم و زعيق و شخط و نطر و بس … الطفل كدة ما فهمش حاجة غير ان ماما و بابا زعلوا
و القرار هيبقى
هاعمل كدة من وراهم
 
و لما يسال ليه لأ و الرد يبقى علشان عيب يا قليل الأدب بيفهم انه عيب قدام الناس بس
 
و فى اهل ممكن ما يلاحظوش اصلا من كتر انشغالهم بعيد عن الاطفال
و هنا الطفل هيستمر فى الاستكشاف من غير ما يفهم الصح من الغلط و فى طفل على طول متساب مع الشغالات اللى يا بيستغلوا الموضوع دا يا بيهملوا توجيه الطفل اصلا
 
و فى اهل بيقابلوا الموقف دا بالضحك
"شوف الواد ابن الإيه .. من يومه و هو كدة"
او بيكون النهر و اللوم بصوت فيه ضحك فالطفل بيفتكرها لعبة و يستمر
 
ملخص كلامى ان اللى انتى عملتيه و انتى صغيرة مرحلة كل الاطفال بيمروا بيها
لكن كان لازمك توجيه مناسب لسنك و لقدراتك العقلية فى الوقت دا علشان تبطلى
 
و على فكرة … كان فى احصائية بتقول ان الأنثى البالغة الغير متزوجة بتمارس العادة السرية على الاقل مرتين فى الشهر
و فى سيدات متزوجات مش بيوصلوا للنشوة الا عن طريق ممارسة العادة السرية … يعنى انتى ما كفرتيش و ما عملتيش اللى ماحدش عمله لكن اى شئ بيزيد عن حده بيتقلب ضده و هى دى المشكلة
 
 
ثانيا موضوع السادية اللى انتى بتشتكى منه
 
تعالى نحاول نحط درجات للممارسات الجنسية … تخيلى معايا الارقام من واحد لعشرة بس ركزى فى الفروقات لأنها صغيرة من رقم للتانى
 
هنفترض ان الرقم خمسة بيرمز لممارسات جنسية متنوعة متجددة و متعارف عليها فى اغلب العلاقات الجنسية الناجحة
 
رقم أربعة ممارسات جنسية متنوعة و متعارف عليها فى اغلب العلاقات الجنسية
 
رقم ثلاثة ممارسات جنسية متعارف عليها فى اغلب العلاقات الجنسية و لكنها تتسم بالرتابة 
 
رقم اتنين وضع واحد او اتنين للعلاقة الجنسية و دمتم … و هنا بتلاقى الطرفين حاسين بعدم رضا
 
رقم واحد محاولات فاشلة للممارسات الجنسية و جهل تام و فشل متكرر
 
رقم ستة بيرمز لممارسات جنسية متنوعة متجددة و القليل منها غير متعارف عليه فى اغلب العلاقات الجنسية الناجحة و دا محتاج طرفين عندهم روح المغامرة
 
رقم سابعة بيرمز لممارسات جنسية متنوعة متجددة و بعضها مرفوض و مكروه عند اغلب الناس باختلاف ثقافتهم الجنسية و ميولهم و دا محتاج طرفين بينهم لغة حوار و ثقة و تفاهم اكتر من العادى بكتير
 
رقم ثمانية بيرمز لممارسات جنسية متنوعة متجددة و أغلبها مرفوض و مكروه عند اغلب الناس باختلاف ثقافتهم الجنسية و ميولهم و دا محتاج شبه معجرز علشان الطرفين دول يتقابلوا اصلا .. و دول بيبقوا ناس عندهم Alternative lifestyle فى الحياة الجنسية
 
رقم تسعة بيرمز لممارسات جنسية خطرة و على درجة عالية من المغامرة و دى عايزة ناس ما عندهمش اى نوع من انواع الرهاب الجنسى
no inhibitions and no taboos whatsoever
 
رقم عشرة ممارسات جنسية المتعة فيها هى القتل او التشويه و احداث العاهات المستديمة
 
و طبعا بين كل درجة و التانية فى درجات
 
اللى انا عايزة اقوله ان مش كل الناس زى بعضها و مش كل الناس بتستمتع بنفس الحاجات .. نفس الحاجة اللى ممكن تمتع واحد او واحدة ممكن تكون منفرة و غير مقبولة تماما عند واحد او واحدة تانيين
 
انا مش عارفة انتى ليه كدة … لكن اللى اعرفه ان فى ناس كتير زيك باختلاف انواع و اشكال الحاجات اللى بتثيرهم و دى اسمها Fetishes
 
تعملى ايه؟
 
ممكن تحاولى تغيرى نفسك و تحاولى تلاقى اثارة فى حاجات "عادية" او ممكن تخليكى زى ما انتى و تلاقى شريك متوافق معاكى فى ميولك
 
لكن اللى مش لازم تعمليه ابدا
انك تضحكى على حد او تكدبى على حد او تخدعى حد
 
و نصيحتى ليكى انك تقرى كتير عن ال
Sadism
Masochism
Sadomasochism
 
علشان تفهمى نفسك و تقدرى تسيطرى عليها

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”