fbpx
مونتيسوري مصر- تقدمها مروة رخا

 

أنا بحب واحدة جدا جدا و هى بتبعد و متجاهلة مشاعرى و زى ما تكون اتخنقت منى. دا مجرد السؤال عن الشخص اللي كانت بتكلمه بيقلب الدنيا…جايز اسلوب السؤال و حش حاولت اغيره كتيييييير و غيرته فعلا لاكن بقت تقولي ده لف و دوران وانا مش بحب كده , وان شويه تقولي انا حاسه انك كتيير عليا و شويه تقولي انت بتحسسني ان انا مامتك من كتر ما بتحكيلي كل حاجه
شويه انت زي بابا و بتفكرني بيه وشويه انت مش مالي قلبي و عيني

انا كنت خلاص هتقدم لها…مش عارف ليه كده؟ قالتلي معندكش ثقة في نفسك ولا في اللي حواليك نتيجة المشاكل الكتير اللي مريت بيها في حياتي..ممكن ! طيب اقفي جنبي بقى؟؟ ولا ايه؟؟ انا مش عارف

بقيت عامل زي التايه من غيرها.. بعيط بالساعات و انا زي الشحط كده…امي قالتلي متحاولش تكلمها حتى علشان ده ضعف منك بس انا نفسي اكلمها افهم منها هوا في ايه؟؟؟ مش قادر وخايف و مش عارف
انا تعبااااااااااان فعلا
انت عارفة طبعا كلام المواساة السخيف اللي بسمعه من كل اللي حواليا
كلام ملوش طعم و زباله اوي وانا زهقت من اني واقف مكاني كده

________________________________________

 

طيب
سيبك من كلام المواساه اللى زى الزفت دا
 
انا عارفة انك بتحبها
 
لكن انا و انت عارفين ان الحب مش كل حاجة .. مش كفاية
 
انت بتتكلم فى جواز و اسرة
 
هل ممكن تكون اسرة مع واحدة انت بتشك فيها؟ سواء ان كانت هى غلطانة و لا لأ و سواء ان كان شكك فى محله و لا لأ ..هل ممكن تعيش كدة؟
 
هل ممكن تعيش مع واحدة انت مش مالى عينها؟
 
هل ممكن تعيش مع واحدة بتطلع اسوأ ما فيك؟ مش لانها وحشة .. لأ .. لانكم مختلفين … كيميتكم مش راكبة صح
 
هل ممكن تتخيل العشرين سنة الجاية من حياتك زى السنة اللى فاتت من علاقتك بيها؟ سعادة فظيعة فى لحظات قليلة و نكد و شك و غيرة و هم بقية العمر؟
 
طريقة تعبيرك عن الحب بتخنقها و دا معناه انك يا تغير من نفسك يا تسيبها … انت لازم تحكم عقلك مش عواطفك. و بعدين القاعدة بتقول ان انت كل ما هتقرب و "تندلق" هى هتبعد و تهملك و العكس صحيح. لازم العلاقة تكون ناضجة و متوازنة مش طرف بيتسحل باسم الحب و طرف مخنوق من الحب دا.
 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”