مشكلتى أمى

Date posted: October 8, 2010


السلام عليكم ازيك يا مروة بجد انا اول مرة ادخل الموقغ واخيرا لاقيت الاخت والصديقة اللى ممكن تسمعنى وتوجهنى صح فى مشكلتى وكمان استفدت كتير من تجارب البنات على الموقع

اسمحلى انا اعتبرك اختى على فكرة انا مش بنت وحيدة ولكن اعيش فى بيت كل واحد فية مع نفسة وعمرى مالاقيت حد من اخواتى يسمعنى بجد انا بنت عندى 28 سنة وتعليمة عالى واعمل بوظيقة الحمد للة جيدة جدا مشكلتى الاساسية هى امى هتستغرب طبعا ولكن هى دة الحقبقة انا وامى معندناش اى حاجة مشتركة ومهما احاول اعمل معاها زايما مش بيتقدر بل بالعكس اواجة بالنقد وعدم الاهتمام

ودايما فى خلافات بينا تخيل عشان اية عشان شغل البيت واللهى انا بشتغل فية وبعمل بس كل واحد لية طاقة وكمان مش معقولة انا عالطول اشتغل واختى الاضغر الى عندها23 سنة اقعد هانم عالطول متعملش حاجة فماما بتزعل لما اقولها خليها تقوم تعمل حاجة وتكون دة البداية لقطيعة لاتنتهى وممكن تعد بالاسابيع متكلمنيش وحجتها انى بغير من اختى وعالطول ببصلها وانا الى لازم اعمل كل حاجة عشان انا الكبيرة

عارفة انا مش مشكلة الشغل عندى دة بردة بيتى انا اللى بيتعبنى هى التفرقة فى المعاملة والمشاغر ناحيتى ناهيك عن كمية الدعاء اللى باخدوة لما تكلم فى الموضوع دة دعاء طبعا على مش لىوانا بجد بكون مضايقة جدا من نفسى ومن البيت لما بيحصل كدة بس بجد هى مش بتتغير ولما احاول اكلمها ما بترداش ومشكلتى التانية هى الجواز هو مشكلة لامى عاوزنى اقبل باى حد والسلام

ولما بنتخاتق بتقولهلى بمعنى انى عنست وفية اية لو كنت قبلت من زمان باى حد هو راجل والسلام مش احسن من اقعدالنا كدة لعلمك يامروة انا بشتغل من 4 سنين وتقريبا هى وبابا مش بيصرفوا على وانا معتمدة على نفسى فى النقطة دة انا بجد احيانا كتير بتخنق وبتمنى مرجعش البيت وبفضل فعلا برة البيت من بعد الشغل اروح اى جامع اغود اصلى لحد متعب وبعدين اروح معلش حاجة تانية مضايقنى منها انها محتضنة اختى الضغيرة اكتر يمكن عشاتن بتديها فلوس مش عارفة تعرف انى اختى مبقتش تحترمنى وبتردلى الكلمة عشرة عشان بتشوف امى بتعاملنى بطريقة مش كويسة مش عارفة يا مروة ياريت ترد على |شكراااااااااااااااااااااااااااااااااااا

_________________________

اهلا يا مشمشة
 
فى حاجات فى حياتنا احنا ممكن نسيطر عليها و نتحكم فيها و نغيرها
 
و فى حاجات تانية احنا مالناش اى اختيار فيها و لازم نتعايش معها
 
انتى مثلا ممكن تغيرى لون و قصة شعرك
لكن مش ممكن تغيرى فصيلة دمك
 
مامتك و اسلوبها و اختك و طبعها بقى عاملين زى فصيلة دمك .. مش بتتغير
 
فى ناس فصيلة دمهم نادرة جدا و حياتهم ممكن تتعرض للخطر فى اى لحظة لانها مش متوفرة
لكن دا نصيبهم و دا قدرهم
 
كل اللى ممكن يعملوه انهم يحاولوا يحافظوا على نفسهم من الحوادث و المخاطر و تبقى فصيلة دمهم متسجلة بوضوح على البطاقة و الرخصة
 
فى ناس حتى بتلبس اسورة عليها فصيلة دمهم النادرة دى علشان لو حصل لهم حاجة الدكاترة يقدروا يسعفوهم بسرعة
 
انتى ممكن تقضى عمرك كله فى هم و غم لانك مش متقبلة مامتك و اختك و معاملتهم ليكى
 
و ممكن تحاولى توجدى لهم اعذار و تتعايشى معهم بالرغم من اختلافاتكم
 
طول ما انتى بتحاولى تغيرى مامتك و تروضى اختك هتحسى باحباط و نكد زى اللى بيحاول يحرك حيطة بانه يخبط دماغه فيها
 
دخلى من ودن و خرجى من ودن
 
اللى تقدرى عليه اعمليه علشان تقللى الصدامات بينكم
 
اوجدى سعادتك و استقرارك فى الشغل و مع الاصدقاء
 
و بطلى تخبطى راسك فى الحيطة لانها مش هتتحرك
Bookmark and Share