fbpx
مونتيسوري مصر- تقدمها مروة رخا

عزيزتى مروة دى رابع رساله منى ليكى مش عارفه ابتدى منين بس افتكر انك فاكره عنى رسالتى الاولى اللى كانت من سنه…انا اللى بعانى من القهر الاسرى وكنتى خيرتينى اخر مره بين اهلى وبين مستقبلى واحلامى وانا اخترت اهلى ومش قادره اقولك الندم اللى حاساه نتيجة اختيارى اتمنعت من النزول والطلوع غير مع اخويا الكبير اللى بابا سابله حرية التصرف فى اى حاجه تخصنى لدرجة انه بيستهون باى حاجه يقولها بابا

عامل كبير وهو اصلا بنى ادم فاشل داخل ع 30 من عمره ومعملش اى حاجه فى حياته اخويا ده من ابويا وزى ما قولتلك قبل كده ان بابا وماما منفصلين انا روحت عيشت مع بابا من الشتا اللى فاتت واخويا ده و2 كمان من اخواتى الولاد الاصغر منى بس دول اخواتى الشققه بجد يا مروة ليهم طريقة واسلوب فى المعامله انا معرفش اتعامل مع ناس كده كل حاجه بالدراع والبلطجه وفرض الرراى وليهم الحق فى كل حاجه لاكن انا لا ومعندهمش مشكلة يشتمو ويسبو حتى وانا اكبر منهم سننا مبيحترموش حد

واللى مجننى انه بابا ناصفهم عليا انا عندى اخت اكبر منى بسنه وقريبه منى جدا متجوزه ومخلفه المهم قبل الوقفه بيوم اخويا الكبير ده ضربنى بفترى ميتوصفش وضرباختى كمان نعايا احنا لالاتنينفى نفس الوقت والسبب يا مروه مش عارفه اقولك اد ايه تافه مرضيش يخلينى انزل اروح اقضى العيد مع اختى فى بيتها مع انى مستأذنه ابويا قالى انا ماليش دعوه بيه وابتدى بأقذر الشتايم ومد الايدين المهم انا جالى انهيار عصبى ووقعت اختى اتصلت بالنجده وجابتلى الاسعاف بابا مكنش موجود ولما جه قعد يقول هو انا مت ؟عشان تعملو فى بعض كده كنت بصوت جامد وكل اللى بقوله انت السبب ربنا يسامحك انت اللى جرأتهم علينا انا بكرهكو ومش عايزاكو وبكرهك

لاقيت قلم نزل على وشى من ابويا مع العلم انه اول مره فى حياته يمد ايده عليا اختى مرضيتش تنزل من غيرى والمحضر اللى المفروض كان يتعمل اتقطع واخواتى الولاد الاتنين التانين وقفو جنب الكبير المهم خدت شوية حاجات ليا واحنا نازلين بابا وقفلنا ع الباب وقالى انا واختى انا متبرى منكو ليوم الدين ومحدش يكلمنى فيكو خالص مامتى مفيش فى ايدها اى حاجه تعبت طبعا لما عرفت ان كل ده حصل انا قاعده معاها دلوقتى وبرضه بتخاف تنزلنى والتانى مستنيلى اى حاجه عشان حيعمل فيا اكتر من كده عايزه اقولك انهم مش حيسبونى فى حالى انا بدور على شغل دلوقتى بسيا مروه برضه حفضل قلقانه ومش حاسه بالامان ومستنيه اى حركه منهم

فكرت فى السفر بره مصر بس برضه مش عارفه اللى اعرفه انى بقيت اقوى من الاول وانى حبتهم اكتر من نفسى ودوست وتنازلت عن حلمى حلمى يا مروة كان انى اكون اعلاميه ناجحه انا بكالوريوس اعلام دفعة 2008 وبقى عندى 24 سنه ولسه عايشه فى غلطة الماضى انا ماليش اى علاقات عاطفية دلوقتى وفعلا مبعملش اى حاجه غلط بس انا حاسه انى فقدت الرغبة فى الاستمرار فى الدنيا دى مقسومه نصين نص عايش الواقع الصعب ده والنص التانى عايش فى عالم تانى انا بحلم بيه انتى قولتى انه اللى بيفكر فى الانتحار ده بسبب انه عايش عشان يرضى اللى حواليه انا عملتها من سنه بس مبفكرش فيها دلوقتى مع انه مفيش حاجه حلوه تخلينى اتمسك بالدنيا دى بجد يا مروة مبقتش فاهمه حاجه ساعات كتير كنت بتمنى ابقى زيهم مكنتش حتعب كده لو عندك حل قوليهولى ياريت انا عارفه انك مش حتجاملينى بالعكس انتى يمكن تقسى عليا لانك نصحتينى قبل كده وانا مسمعش كلامك 

————————————————-

 

انا فاكراكى و فاكرة رسايلك ليا و فاكرة غلطتك القديمة اللى انتى بتدفعى تمنها لحد دلوقتى و فاكرة لما كنتى عايزة تهربى على لبنان
 
انا كل مرة برد عليكى رد يتوهك اكتر بدل ما يرسيكى
 
عارفة ليه؟
 
علشان مش عايزة اشيل مسؤوليتك
 
انا مش انتى و انتى مش انا
 
انا لو فى مكانك كنت عملت و سويت .. لكن احنا مش زى بعض
 
انا خايفة بدل ما انقذك اغرقك
خايفة بدل ما احررك اضيعك
 
علشان كدة كل مرة برد عليكى برد عليكى بأسئلة
 
عايزاكى انتى اللى تختارى
عايزاكى انتى اللى تحددى التمن اللى ممكن تدفعيه لحريتك و احلامك
 
اهلك زفت
لكن الناس اللى برة برده زفت
 
هتعملى ايه و انتى مش بتشغلى؟
هتعملى ايه و انتى احلامك فوق قدراتك و امكانياتك؟
هتعملى ايه من غير فلوس؟
اسلحتك ايه؟ علم؟ موهبة؟ خبرة؟ علاقات؟
هتتغلبى على الصعوبات ازاى؟ عندك ارادة؟ عندك طموح؟ عندك صبر؟ عندك صلابة؟
 
خطتك ايه؟
انتى ماشية من غير خطة و اهداف .. هتوصلى ازاى و انت مش شايفة الطريق؟
 
فى ملايين زيك خريجين اعلام و هدفهم يبقوا اعلاميين .. ايه يميزك عنهم؟ هتحققى حلمك ازاى … الخطة ايه؟ الطريق فين؟
 
 
 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”