اخرة التشدد و التربية الغلط

Date posted: September 30, 2010


هاى مروة ازيك اخبارك ايه ؟؟ .. أتمنى تكونى ديما بخيير .. معلش هطول عليكى فى الرسالة دى بس بجد محتاجة مساعدتك .. انا كنت راسلتك قبل كده من زماااان و قلتلك على حكايتى انى كنت بحب واحد قوى و هو كان بيتغل حبى ده فى حاجات تانية واعتقد مش لازم اقول الكلمة و قلتلك ان صاحبتى هى اللى عرفتنى عليه و كانت ديما بتحصل بينا مشاكل بسبب كلام بيتقال انه قاله عليا و لما اجى اواجهه بينكر و بيقولى انا لو عايز اقوله كنت قلتهولك فى وشه و قلتيلى انتى مفيش دخان من غير نار و ان صاحبتى لو كانت عايزه مصلحتى مكنتش عرفتنى على الانسان ده

عموما انا اخدت الخطوة و بعدت بس ايه بعد ما قلبى بجد انجرح قوى و خلاااص حسيت انى فقدت الامل بعديها بسنة صاحبتى عرفتنى على واحد تانى .. اهو اسمنا اصحاب شوية شوية حسيت فى الحنية اللى كنت محتجاها قوى و الحب .. بقينا مع بعض بس يدوبك مكملناش شهرين و حصلت نفش المشاكل بس مش قوى هى حصلت بينه و بينها فمن الطبيعى لازم انا اضحى عشان صحبتى .. عشان زى مابيقولو الحبيب بيروح و يجى بس الصاحب هو الأبقى . واستمريت على ده المنزال .

انا من عادتى ادخل نت كتيير فقابلت واحد على النت .. كنت منهارة سعتها فحكتله على قصتى و كان متفهم و عاملته كانه اخويا الكبير لأن كا فى فرق سن بينا كبير انا عندى 17 و هو 27 .. و عدى شهر على خير و بعدين حسيت انه بدأ يتغير فى معاملته معايا و كلامه كأنه بدأ يستغل قصتى عشان يشبع رغباته هو وانا كنت زى ما انا .. كنت رافضه الحوار ده تماما .. لأنى بجد تعبت قوى و مكنتش عايزه ادخل فى اى كلام من ده تانى .. و الحمد لله عدت على خير و بعدت عنه و محصلش حاجة .. و عدى كام شهر بعديها وانا منهاره .. عارفه هتقوليلى انا السبب فى كل ده .. لأن سلمت قلبى لناس متستهلش و عشان كده بدفع التمن غالى قوى .

بس اعمل ايه انا زى ما قلتلك انا عايشه فى عيلة متشدده و متدينه بدرجة عالية قوى..اه عندنا حرية تعبيير و ووو لكن فى التنفيذ الشرع قال كده بيقى خلاص مفيش جدال .. وانا متفقة معاهم فى كده بس مش بالطريقة دى .. وخصوصا بابا لانه عصبى جدا و متشدد بطريقة فظيعة و اه بيعاملنى ساات كويس و نه عايز مصلحتى لانى بنته الوحيده و الكبيرة لكن مش بالطريقة دى لأنه بجد بيقولى كلام بيجرحنى قوى .. فطول الوقت حاسه اننا مجروحة و منهاره .. اه قدام الناس حاجة تانية خالص انى شخصية قوية جدا و اقدر اتحكم فى مشاعرى ..

لكن وانا لوحدى انسانه وحيدة و ديما فى حزن لدرجة فكرت كتييييير فى الانتحار بس الحمد لله منفذتش لأن عارفه انه كفر .. عدت الايام و قابلت احمد اللى صاحبتى عرفتنى عليه بعد الأول لما حصلت مشاكل و سبت عشانها .. و ده بيعاملنى بجد معاملة جميله جدا و انا حاسه انه محترم و عمره مغلط معايا فى كلمة واحده وانا حبيته اكتر دلوقت .. حبيته قوى و متمسكه بيه لأبعد الحدود بس خايفه ليكون ده هروب من وحدتى و بابا المتشدد لدرجة انى من يومين قلت خلاص هسيبه عشان ملموش بحياتى المتعقده دى .. لكن مقدرتش و هو مقدرش و هو ديما عايزنى اتغير للصح و ديما بينصحنى لدرجة انه اقنعنى بجد ان صحبتى دى ليها تأثير سلبى عليا و من تفكيرى للموضوع ده وان بابا و ماما قالولى كده قبل كده اقتنعت و بعدت عن صحبتى دى و هو بعد كمان عن صاحبه اللى كان حبيبها واتغير بجد حتى من قبل منرجع لبعض المرة دى .. بجد سووووورى انى طولت عليكى بس ده غصب عنى و عيزاكى تنصحينى بجد .. انى اكمل فى العلاقة دى و نشوف مستقبلنا مع بعض .. ولا انا المفروض بعد اللى حصلى كل ده ابعد واشوف لما ادخل الجامعه و يكون الحوار اكثر جدية مع العلم ان بالرغم كل ده .. انا لسه فى تالته ثانوى .. وبجد انا بحترمك جدا وامنى انك تساعدينى و ربنا يوفقك فى حياتك و الى الأمام دائما

———————————-

 

انتى عارفة يا مشمشة انتى مشكلتك ايه؟
 
انك مستعجلة
 
مستعجلة على الحب و الارتباط و الاستقرار و الجواز
 
و بسبب استعجالك دا كل شوية بتقعى فى مصيبة
 
انتى دلوقتى 17 سنة
 
تفتكرى ممكن تتجوزى امتى؟
 
اكيد مش قبل على الاقل 3 او 4 سنين
 
دا على الاقل خالص يعنى
 
يبقى من هنا لحد ما تتجوزى حبيبك اللى انتى معاه دا .. ايه هيكون شكل علاقتكم؟
 
انا مش ضد انك ترتبطى و تحبى لكن انتى متسرعة فى مشاعرك و متسرعة فى تطور شكل العلاقة
 
و دا معناه انك هتكررى نفس الحكاية القديمة
 
و افرضى دخلتى الجامعة و عجبك حد .. ما هو الجامعة هتقابلى فيها ناس جديدة و كتير و شخصيات مختلفة و وارد جدا انك تقربى من حد من زمايلك … ايه اللى هيحصل ساعتها؟
 
طيب و لما تتخرجى و تشتغلى و تقابلى بقى رجالة بجد .. ناس بتشتغل و معتمدة على نفسها و شخصيات مبهرة من خلفيات اشكال و الوان .. هتعملى ايه ساعتها؟
 
كل مرحلة و لها جمالها و كل سن و له جماله لكن انتى عايزة تنطى من 17 ل 27 مرة واحدة
 
انا زى ما قلت لك انا مش ضد انك تحبى و ترتبطى لكن سنك دا سن البراءة .. استكشاف الجنس الاخر على الهادى … صداقة تحت مسمى الحب … هيام و احلام و رومانسية و حاجات حلوة
 
مش طاخ طراخ زى ما انتى عايشة
 
و طبعا مش مبسوطة
لانك على طول حاسة بالذنب تجاه اهلك و تجاه نفسك
 
و فى رسالتك القديمة انا قلت لك ان صاحبتك دى زفت و مش امينة عليكى
 
انا فاهمة ان اهلك خنقوكى لكن الرد مايبقاش كدة
 
انا مش هقول لك تسيبى حبيبك
انا كل اللى هقوله انك تفتكرى ان دا مش اخر واحد و مش نهاية المطاف … ما تتصرفيش معاه كأنه مكتوب لك و انتى مكتوبة له
 
Bookmark and Share