الدبيحة ردت على الجزارين .. ردت عليكم انتم

Date posted: September 30, 2010


رد صاحبة مشكلة محتاجة حد يلمسنى و خايفة أغلط

ربنا يسعدك دايما…
 
بس على فكرة .. بعد ما قرأت ردود الناس على الموضوع..
 
حبيت أوضح حاجة..
 
الناس مش فاهمة : اني ما غلطتش.. وخايفة أقع في الغلط.. بسبب الاحتياج العاطفي.. اللي سببه .. سني.. والظروف .. والناس والمجتمع..
 
دة أولا..
 
وثانيا..
 
لو أنا عايزة أغلط وأعمل علاقة .. خالية من رضا ربنا .. و الحب.. ومن الاحترام.. كنت عملت دة ومكنتش حتبقى مشكلة .. أكتب لك عنها وأتكلم فيها أصلا..
 
المشكلة الرئيسية.. صعوبة الاختيار.. ووقوعي في مأزق.. بسبب مبادئي.. وأخلاقي..
 
إنها مباديء وأخلاق بقت للأسف مرفوضة.. وكل رجل .. بيحب يجرب البنت دي سهلة ولا لا.. قبل ما يقرر الارتباط بيها..
 
والحمد لله دايما بيلاقوني محترمة .. فبيسيبوني!!!
 
هي دي المشكلة .. الاختيار.. واستمرار العلاقة بشكل يرضي ربنا والناس..
 
والأهم يرضيني.. في نطاق حدودي ومبادئي.. 
 
انتي عندك حق لما قلتي.. ان كان يهمك في ردك عليا نفسيتي.. مش اخلاقي ولا ديني..
 
وانا بقول لك.. ان اللي مخلي نفسيتي كدة.. ان محدش فاهم .. اني برفض العلاقات الغلط.. برغم احتياجي ليها.. وبتفهم على اني منحرفة بمجرد اني اتكلمت وقلت دة…
 
دة اللي بيدايقني..
 
اني برغم اني ما غلطتش.. ومش ناوية .. والحمد لله .. بعض الناس قالوا اني مش سوية!!
 
في الحالتين مش سوية.. سواء منحرفة أو لا.. !!!!
 
وفيه ناس مش فاهمة المشكلة أصلا وما قرأتش كويس.. ومعتقدين اني خلاص قطعت السمكة وديلها..
 
أحب أقول لكم:
 
برغم ان عندي 30 سنة.. محدش لمسني بأي شكل.. إلا الحضن الوحيد.. اللي كان مرة وحدة .. بعد ما عدى على العلاقة 6 سنين حب..
 
ودة اللي خلاني قطعتها أصلا!!!
 
فازاي حكمتوا اني غلطت .. واني مش محترمة .. واني خنت أهلي !!!
 
 ______________________

 

مشمشة

 
احنا عايشين فى مجتمع افراده متسلطين على بعض
 
كل واحد بيصحى من النوم علشان يدوس على اللى جنبه و يزق اللى قدامه و يرفس اللى وراه
 
فى ناس مش بتحس بالرضا عن نفسها الا لما تحاسب و تعاقب و تحاكم غيرها و كأنهم ما بيغلطوش
 
كله عايز يلعب دور ربنا .. ربنا اللى بيعاقب و بيودى النار
مش ربنا اللى عالم بالقلوب و النوايا
 
فى واحدة صاحبتى لما قرت مشكلتك و التعليقات اللى عليها كلمتنى و قالت لى ان انا عندى 5000 واحد و واحدة على الفيسبوك بيستنوا المشاكل اللى بانشرها علشان يدخلوا بسكاكينهم زى الجزارين اللى داخلين على دبيحة بتنزف
 
ال5000 بيحاكموا و يحكموا و نسيوا ان اغلبهم فى يوم من الايام بعتوا لى و انهم فى يوم من الايام كانوا مدبوحين و انهم بيغلطوا و انهم بشر مش آلهة
 
فى ناس لما قرت ردى افتكروا انى باشجعك .. كان نفسهم اشتمك و امسح بيكى الارض و اوعظ لى وعظتين علشان احس انا قد ايه احسن منك و انك قد ايه واطية و زبالة
 
كان نفسهم اجلدك فى ميدان عام و ارص لك الايات و الاحاديث و احسسك انك لازم تروحى تموتى
 
ما فهموش انى قلت لك لأ … بس بطريقتى … من غير ما ادبحك … قروا اول سطرين من الرد و ابتدوا الجهاد الالكترونى … انا اسفة على التعليقات السخيفة .. امسحيها فيا
:)
Bookmark and Share

Facebook comments: