العلاقات العاطفية معقدة و متعبة …. و مقرفة

Date posted: September 30, 2010


هاى مروة ازيك
عايزة اسألك فى حاجة، و أرجو الرد سريعا لأنى هتجنن
أنا بدرس فى كلية مرموقة و اتخرجت منها و كان لى زميل (و كان فى كلام بيننا يعنى كنا نعرف بعض) كان دائم النظرات لى بشكل غير طبيعى و كل مكان أذهب فيه بداخل الكلية أجده يتبعنى و كلما جاء ينطق اسمى يتلبك و اذا نادى أحد اسمى ينظر بلهفة و يتوتر
و كل من حولى لاحظوا ذلك و أخبرونى و انا كمان كنت ملاحظة
و منذ عدة أيام علمت انه خطب احدى زميلاتنا فكاد كل من حولى أن يجن حين علموا و أصيبوا بالصدمة لأن نظراته و طريقته معه كانت تجذم انه يحمل مشاعر لى
مع العلم انى من اسرة مرموقة و هو أيضا يعنى احنا الاتنين على نفس المستوى الاجتماعى
تفسيرك ايه للى حصل؟
لماذا كان يفعل ذلك؟
و لا أنكر عليكى اننى رفضت كثيرين تقدموا لى من اجله
بالله عليكى تردى بسرعة لانى حيرانة
_______________________________

 

العلاقات العاطفية معقدة و متعبة …. و مقرفة
 
آه و الله
 
يعنى ممكن يكون فى مليون تفسير للى حصل دا
 
ممكن يكون شكله كدة .. أيوة فى ناس شكلها مسهوك و مسهتن و بتسبل كدة بس هما مش قاصدين
و ممكن يكون كان بيحب فكرة انه شاغلك من بعيد و خلاص
و ممكن يكون صرف نظر لما ما لقاش منك علامات تشجيع
و ممكن تكونى انتى اتخيلتى الموضوع كله و كبر فى دماغك لانك مركزة و اصحابك مركزين و عملتوا من الحبة قبة و الواد و لا كان على باله
و ممكن تكون البنت اللى خطبها ناصحة و عرفت تجرجره للكلام و الفعل
و ممكن تكونى انتى اللى بيحلم بيها بس مش انتى اللى عايز يعيش معها فى الواقع .. زى ما ناس كتير بتحلم بنانسى و هيفا لكن ساعة الجد بيختاروا بنات على قد ايدهم 
 
و ممكن يكون اى سبب تانى .. المهم انه راح و انتى لازم تقلبى الصفحة

Bookmark and Share