الكئيب .. النعمة بتغور من وشه و همه بيزيد و روحه بتدبل

Date posted: October 1, 2010


السلام عليكم بصي يا مروه مشكلتى باختصار انى مش راضيه عن نفسي وعن احوالي وبمر بمرحله ضعف وتخبط الفتره ديه مشكلتى ياستى باختصار انى طالعه من بيت ولدي فيه كان محاوط علينا اوي واحنا من اسره متوسطه دخلت الكليه اللي بحبها وتفوقت فيها ولقتها وسيله برده انى الاقي مستقبلي فيها بعد كده لان كل حلمى الاقي شغل مناسب ليا كبنت واقدر الاقي شريك حياه اعيش معاه حياه سعيده وكريمه

فوسط الطريق ده حصلت المشكله المعتااده انهم عينو واحده زميلتى بالتزوير والبنت ديه كانت بتنفسنى بمنافسها غير شريفه مستغله جمالها وعلاقته المهم البنت اعينت ف الجامعه وحياتها كلها اتظبطت اتجوزت جوازه كويسه جدا وخلفت وكان مصيري المحاكم ووبدات فشغل وادبهدلت فيه خاصتا ان مجال تخصيي دقيق ومش متوفر فيه فرص عمل كتير

فستحملت قرف الشغل وانا بكمل دراستى العليا واتعرفت بشاب ف الوقت اللي كنت مضمره فيه نفسيا وكان بيتعامل معايا بانبهار وحب كبير لكن هو مكنش ليه المواصفات اللي انا عوزها بس انا كنت محتاجه حد جمبي ومحتاجه احساس الحب اللي كنت بستمد منه وفقت ابقي معاه لحد ما يتحسن حاله وخلال سنه ونص فعلا اتغير شغله ومرتبه كبر بس للاسف هو من محافظه وانا من محافظه تانه وكان ليه فشغله القديم فرع فمحافظتى ولكنه غيره لشغل احسن ليه كتير بس ملوش فرع عندنا وحصلت مشاكل كتير بسسب الموضوع ده وقت ما اتقدملي رسمى

وانا مش مستعده انى اسافر معاه خاصتا انى قربت اتعين فالجامعه انا حبيته حب تعود وحب انه بيحبنى اوي وحسيت انه مناسب دلوقتى بعد مخد خطوات صح فحياته وهو بيحبنى كمان عشان انا بسعده فالتفكير انه يطور نفسه دلوقتى انا عندي خمسه وعشرين سنه وحاسه محتاجه خطوت الارتباط فحياتى بجد لان حياتى بقلها سنين جافه وانا نفسي افرح ومش شايفه حل للموضوع ده انا كمان برغم ان بحاول اطور حياتى الا انى مليش علاقات اجتماعيه كتير حاسه انى بقيت كئيبه اوي يا مروه من كل حاجه ونفسي اخد خطوه جديده ومن قادره اجازف وعيش فمحافظه تانيه واسيب الحاجه اللي حاربت عليها 3 سنين غير خمس سنين فالكليه ومش قادره اروح مع الشخص ده لان علاقتى بيه عقل اكتر وفيها مشاعربس مش باندفاع وجنون …انت ايه رايك انا محتاجه الخطوه ديه بس مش قادره اخدها

___________________________________

الموضوع موضوع أولويات
 
فى ناس أولوياتهم هى الحب و الاسرة
و فى ناس أولوياتهم الترقى الوظيفى و الكارير
و فى ناس أولوياتهم السفر و الفسح و الفرفشة
و فى و فى و فى
 
و الأولويات دى مش ثابتة .. يعنى ممكن فى فترة معينة تبقى الأسره هى نمرة واحد و فى فترة تانية الشغل نمرة واحد و فترة تالتة المادة نمرة واحد
 
و كل مرة تحددى أولوياتك بتدفعى تمن … و انتى بس اللى تقدرى تحددى ممكن تضحى بإيه و بمين مقابل تحقيق أولوياتك فى الفترة دى
 
و ساعتها ما ينفعش تسميها تضحية بالمعنى المتعارف عليه
 
يعنى لو انتى قررتى تسيبى الجامعة و محافظتك ما ينفعش تعتبرى انك ضحيتى علشان الولد .. انتى اختارتى حسب أولوياتك و احتياجاتك
 
موضوع بقى انك بقيتى كئيبة
حطى نصيحتى دى حلق فى ودنك
 
الكئيب .. النعمة بتغور من وشه و همه بيزيد و روحه بتدبل
Bookmark and Share