هو الحب و الاستقرار محتاج استعداد؟

Date posted: October 8, 2010


هاى مروة 
انا عندى مشكلة وكان نفسى الاقى عندك الحل 
لو حابة تنشرى المشكلة دى فى الموقع بتاعك براحتك بس طبعا اكيد من غير ذكر اسمى 

بصى يا جميل 

انا كنت خدت رأيك قبل كدة فى انى انفصل عن خطيبى اللى مش بحبه ولا لأ وانتى ايدتى انفصالى ودة فعلا تم من 3 شهور 

المشكلة بقى بتاعتى 

دلوقتى انا بقت عندى تقريبا عقدة رهيبة من اى حاجة قريبة من الشباب والزواج 
مبقاش عندى الرغبة ولا الاستعداد النفسى انى ادخل فى أى حاجة

انا مريت بتجربتين الاولى حبيت واحد او على الاقل اعجبت بيه واتعلقت بيه وهو طبعا طلع زى كتير بيلعب بيا 
والتجربة التانية اتخطبت لواحد بيموت فيا وللأسف مقدرتش احبه خالص وملقتش فيه اللى انا عايزاه ..كان تقريبا مخفف لألم هجرة الاولانى ومصل اعادة الثقة بالنفس وهو فعلا قدر يعمل دة لانى نسيت تماما التجربة الاولى وثقتى فى نفسى زادت جدا بس اكتشفت كمان انى لسة صغيرة على انى اربط حياتى ونفسى دلوقتى بواحد ..انا عندى 21 سنة ومعنديش لا الاستعداد ولا الرغبة انى ابقى مرتبطة وبعدين زوجة وأم فى خلال سنة سنتين ..حاسة انى لسة قدامى كتير عشان احس انى عايزة ومستعدة انى ابقى كدة

مشكلتى بقى فى حاجتين :

1- خايفة يكون اللى مريت بيه مش بس محتاج وقت..لا.. محتاج كمان تكنيك مختلف فى رؤية الامور ..انا صحيح بقى عندى ادراك اكبر بالارتباط يبقى ليه وازاى ومش اى حاجة والسلام ..انى اوافق لما احب فعلا ولما اقتنع واعجب بواحد واحس انه بيمثل احلامى وتوقعاتى المسبقة وكمان 
شايفة ان المشكلة دلوقتى فى الوقت.. لسة مش مستعدة لاى حاجة دلوقتى ..خوفى بقى ان متكونش هى دى المشكلة بس ..خايفة ان حتى بعد ما يعدى الوقت مبقاش برضه قادرة ولا مستعدة ولا راغبة فى ارتباط ..خايفة على نفسى يا مروة وعايزة اتأكد انى القفلة اللى حصلتلى دى والرعب اللى بيجيلى من اى حد يفتح قدامى موضوع عريس متقدملى سببه بس الوقت وان لما الوقت المناسب هييجى هبقى تمام 

2-بيتقدملى عرسان كتير ..فهمت اهلى انى مش مستعدة ولا عندى رغبة اصلا ..بيطلبوا منى انى اقعد ومش هخسر حاجة وبيقولولى طب هتعرفى ازاى انك مستعدة وانتى مش بتدى نفسك فرصة وبيقولولى انى كدة بتنك وبتبطر على النعمة وممكن اوى بكرة ملقيهاش وان سنى يسمح لى انى اختار ..بكرة ممكن ميسمحش

انتى شايفة ايه يا مروة 
هل عدم استعدادى دة سببه انى بس محتاجة وقت ولا الموضوع اخطر من كدة ؟
وهل اسمع كلام اهلى واقعد مع اللى بيتقدمولى على اساس انى مش هخسر حاجة-مع ان الموضوع تقيل على قلبى اوى دلوقتى- وعشان محسش انى بتبطر على نعمة زى ما بيقولوا ولا لأ ؟

هقولك حاجة انا مش عايزة اتجوز غير لما احب .. اكتشفت دة مع خطيبى السابق مش هقدر اقضى عمرى مع واحد مش بحبه
واهلى مش هيجوزونى غير لواحد من عيلة ومركز اجتماعى ومادى كويس يعنى فكرة انى الاقى الحب دة فى السكة كدة مستبعدة شوية يعنى الحل انى الاقى الحب دة فى اللى بيتقدمولى عشان كدة هما بيقولولى اقعدى حتى لو مش مستعدة يمكن تلاقى اللى تحبيه لانهم عارفين رغبتى فى انى اتجوز عن حب

وفيه حاجة كمان 
انا عايزة اتجوز لما احس انى قادرة على المسئولية دى ..مسئولية العلاقة بين اتنين ومسئولية البيت والاطفال ..وانا بجد مش مستعدة لدة دلوقتى.. انا مبسوطة انى اتخرجت وبشتغل دلوقتى ومبسوطة انى لوحدى وحاسة براحة ومش عايزة حد ياخد منى احساس الحرية دة عشان كدة خايفة على نفسى وبدأت احس ان الموضوع مش موضوع وقت بس 
يبقى اعمل ايه بقى ؟؟؟

بليز يا مروة متتأخريش عليا فى الرد 
معلش صدعتك بطوله

———————————————–

اهلا يا مشمشتى
🙂

انا عايزة ابتدى كلامى بأنى اطمنك انك زى الفل و ما فيكيش حاجة

و عايزة احييكى على صراحتك مع نفسك و مع الآخرين

انا طبعا متفهمة موقف أهلك و انهم نفسهم يتطمنوا عليكى و يفرحوا بيكى

لكن دا مش مبرر للعب بولاد الناس

أيوة

انتى من جواكى مش مستعدة و قافلة و مش عايزة

يبقى حكاية انك تشوفى العرسان من باب أداء الواجب دا اسمه لعب بمشاعر الناس

ذنبه ايه الراجل اللى داخل بيتكم و هو كله أمل انه يقابل شريكة حياته و يتجوز و يستقر … يقوم يترفض و ثقته بنفسه تتهز و يخاف من التجربة الجاية و الرفض تانى و تالت فى بيوت تانية؟ ذنبه ايه انك مش مستعدة و ان اهلك غصبوا عليكى؟

ترضيها لأخوكى؟

ترضيها لو كان الوضع معكوس؟ انتى مستعدة و واحد جاى يشوفك اداء واجب و فى الاخر يتحجج باى حاجة و يرفضك؟

ما تلعبيش بحد علشان ما يتلعبش بيكى

موضوع انك مش مستعدة دا كمان طبيعى .. انتى بنفسك قلتى انك عايزة تعيشى و تشتغلى و تشوفى الدنيا بعيون غير عيون الطالبة
و دا حقك و هيساعدك بعد كدة فى الاختيار

موضوع الحب
هو انتى ليه افترضى انك يوم لما هتحبى هتحبى واحد واقع و مستواه زفت؟

و بعدين انتى ممكن برده تحبى واحد اتقدم لك صالونات

اول مرة هيحصل قبول
و بعد كدة هتعرفيه و تحبيه و تتجوزيه

عادى يعنى

لكن كل دا مش هيحصل غير لما انتى تحسى انك مستعدة تبقى زوجة و ام

و دا هييجى مع الوقت

Bookmark and Share