مروة رخا لمجلة احنا – حذفتينى ليه يا غادة؟

Date posted: October 19, 2010


 

حذفتينى ليه يا غادة؟

دا كان نص السؤال اللى بعته لغادة عبد العال على الإن بوكس – in box– بعد ما اكتشفت بالصدفة انها حذفتنى من قائمة أصدقائها على الفيسبوك … و ما جاليش رد لحد النهاردة.

حذفتينى ليه يا غادة؟

طبعا انتى حرة تضيفى مين و تحذفى مين لكن أنا بقالى سنين عندك و ما حصلش منى أى إساءة من أى نوع تبرر الحذف المفاجئ دا.

حذفتينى ليه يا غادة؟

دا أنا ما اتأخرتش عنك فى حاجة! كلام عن كتابك فى التليفزيون و حصل؛ ترجمة لفيديو ندوتك فى معرض الكتاب و حصل؛ تغطية على موقع جلوبال فويسز أون لاين و حصل!

بجد أنا مش فاهمة … حذفتينى ليه يا غادة؟

دا أنا فاكرة انى كلمتك و قلت لك انى انبسطت من كتابك و ضحكت على مواقف كتير من اللى فيه بالذات موقف عريس الميكروباس النصاب – طب ليه؟

حذفتينى ليه يا غادة؟

هل علشان قلت ان المسلسل مش عاجبنى؟

هل علشان قلت ان المسلسل ظلمك و ظلم الكتاب و ظلم كل بنت عايزة تتجوز؟

هل علشان نشرت رسالة بنت فوق التلاتين اتضايقت من المسلسل؟

طب و فيها ايه؟ هو أنا عملت حاجة من وراكى؟ ما أنا بلغتك بالرسالة و اللينك بتاعها و سيبت لك حرية الرد و التوضيح.

هو أنا لما أعترض أبقى عدوتك؟

ليه؟

هو أنا هاجمت شخصك؟ و لا هاجمت موهبتك؟ و لا هاجمت نجاحك؟ و لو كنتى سمعتى انى باتكلم عليكى من وراكى – و دا ما حصلش – كنتى تيجى و تقولى لى و تخلى رقبتى قد السمسمة و بعدين تحذفينى!

أنا كل اللى قلته ان كتاب "عايزة أتجوز" كتاب واقعى لأنه رصد حلم كل بنت فى الزاوج و الاستقرار و رصد فشلها فى تحقيق الحلم دا لأن "الوارد" من العرسان ما يسرش عدو و لا حبيب. و على يدى!

كتابك كان عن بنت مصرية متعلمة من عيلة متوسطة نفسها يبقى لها بيت و عيلة لكن الاختيارات اللى قدامها تغم النفس. المسلسل بقى طلع البنت مهبوشة و تطفش أجدعها عريس بلهفتها و دلقتها و سربعتها دى. البت مجنونة رسمى و هطلة و مافيش راجل و لا نص راجل حتى هيرضى يتجوزها. فوق دا و دا بقى البنت منفسنة و حقودة و قلبها أسود … غيرانة من صاحباتها و من أمها و أبوها و من جدتها و من كل واحدة لقت نصها التانى … هيجيلها الخير ليه بقى؟ المسلسل ظلم "علا" و كل البنات اللى فى موقف "علا".

و أمها و أبوها و جدتها و أخوها ما يتعاشروش و ما يتناسبوش و ما يشرفوش. و كلامى دا لا هو ذم فيكى و لا فى هند صبرى و لا فى أى شخص بعينه – دا رأيى الشخصى فى عمل فنى اتعرض على التليفزيون و ما عجبنيش.

حذفتينى ليه يا غادة؟

هو انتى كل ما حد يقول رأيه تحذفيه؟ و لا كل ما حد يختلف معاكى تحذفيه؟ و لا كل اللى مش عاجبه المسلسل تحذفيه؟

بجد مش فاهمة … حذفتينى ليه يا غادة؟

أنا متضايقة ليه؟

طبعا متضايقة لأنى حاسة انك بتحجرى على صوتى و على حريتى فى التعبير؛ يا أقول أمين يا تحذفينى!

أنا مش عايزاكى تضيفينى تانى و مش عايزة نبقى صحاب و أنتيم و كدة يعنى … أنا بس عايزاكى تقولى لى حذفتينى ليه يا غادة!

مستنية ردك

Bookmark and Share