تمثيل الثقة بالنفس

Date posted: December 24, 2010


مروه انا سؤالى بخصوص موضوع الثقه بالنفس

انا عارفه انك تعبتى من الكلام فى الحكايه ده 🙂

انا سؤالى محدد جدا , المشكله انك علشان تبتدى وتقررى تغير طريقه تفكيرك فى نفسك والصوره الى اترسمت جواكى وعارفه انك هتقوليلى الصوره ده انتى الى بترسميها لنفسك بس هوه للأسف البدايه بتبقى من الاهل وبعد كده جه الاحتكاك بالناس الى كمان كون عندى صوره مش حلوه لنفسى نتيجه انى اتعاملت بطريقه مش الى انا حاباها فكونت صوره للناس انا مش راضيه فيها عن نفسى

المشكله , الحكايه مابقتش ان بس اهلى زرعوا فيها صوره سلبيه عن نفسى لا ده بقت كمان ان الصوره ده عماله بتتاكد من معاملتى مع الناس لانى ببساطه هوه ده الى بقه جوايا , انا عارفه انك هتقوليلى تقدرى تتغيرى صح فعلا بس ازاى بقه تبتدى مانتى الى فى اعماق معاميقك مهبب ازاى اتعامل يثقه مثلا وانا فكرتى عن نفسى والهيستورى كمان الى كونته عن نفسى شايل الصوره ده

الفكره بالنسبالى مش انى اعرف انى حلوه وكويسه على فكره انا عايزه اقولك انى عارفه والحمد لله ده فعلا موجود ماتستغربيش كلامى بسسسسسسسسسسسس فيه فرق بين انك تعرفى وانك عندك يقين انا بقه محتاجه علشان ابتدى انى اكون عندى يقين وانا بتعامل علشان الصوره تتغير ويبقى الهيستورى مشجع فهمتينى يامروه ياريت تقوليلى ازاى تيجى ده . اتمنى حل مريح فعلا يامروه ومتشكره قوى ليكى مقدما

__________________________________________

شوفى يا مشمشة

هتبتدى انك تمثلى 🙂
 
ايوة
اعتبرى نفسك ممثلة
و الدور اللى مكتوب لك هو دور بنت واثقة من نفسها و لها مبادئ معينة و قناعات معينة
 
و الكاميرا دايرة على طول مش بتقف و المخرج عينه عليكى 
 
تقمسى الشخصية دى على طول لحد ما تبقى هى انتى و انتى هى
 
و كل يوم بالليل راجعى الشريط فى ذاكرتك و ابتدى واحدة واحدة عدلى من نفسك .. كلامك .. ردود فعلك … وقفتك .. نظراتك .. مواقفك
 
مرة فى مرة هتمسحى الصورة القديمة و هتحل محلها الصورة الجديدة
Bookmark and Share