مش بينام مع مراته علشان حبيبته

Date posted: December 24, 2010


 

هاى مروة أزيك واخبار النونو بتاعك الجميل
 عندى سؤال
 
كنت بجلسه نسائية مريبة حقيقي بالنسبة لى
 
واحده حكت بتقول ايه ان الراجل اللى هى على علاقة بيه – دون زواج تحبه فهى معه – أصبح مع زوجته الاولى غير قادر تماما معها بالشكل "الحميمي" حتى بالتدخل الكميائي ليه لانه كل مابيجى يقرب منها يفتكر اللى هو بيحبها عليها وبقاله بحالته دى شهر بتقول والزوجة بدات اخ تقلق وتفكر
مش عارفه ليه الوضعيه دى استفذتنى لسؤالك أنتى تحديدا عن تقييمها ربما لانى المح بكتاباتك قدرة كبيرة على التفسير بشكل من الاخر زى مابيقولوا
ايه رايك هل ممكن راجل لانه بيحب يوصل للحاله دى مع زوجته ؟ ياترى هو ظالم ؟ يحلها ازاى يسيب الزوجة ولا هى مع الوقت هتتحل لوحدها ؟
 
_________________________________
 
شوفى يا مشمشة
 
العلاقات الجنسية خارج نطاق الزواج موجودة و منتشرة و مالهاش صلة لا بسن و لا بطبقة اجتماعية و لا بدين و لا حتى بمستوى تدين
 
مافيش مفاجأة هنا
 
موضوع ان الزوج مش قادر ينام مع زوجته لأنه بيفتكر حبيبته … ممكن تحصل .. بس لو الراجل دا انسان حساس حساس حساس فوق الوصف و شهوته و غريزته مش بتتحكم فيه
 
موضوع انه بقاله شهر بس ما نامش مع مراته فمراته شكت ان فى حاجة غلط بينفى النقطة اللى فوق
 
و دا معناه انه متعود ينام مع مراته كتير و لما قعد شهر مالهوش مزاج الست قلقت … و دا معناه انه مدمن جنس. اسألى أى واحدة متجوزة بقالها مدة … اسأليها بتنام مع جوزها كام مرة فى الأسبوع … هتقول لك لو عرفوا يناموا مع بعض مرتين فى الشهر يبقى خير جدا. الولاد و شغل البيت و ضغوط الحياة ممكن تخلى العلاقة الحميمية دى كل فين و فين
 
و فى نقطة تانية … لو الراجل من شهر مش عارف ينام مع مراته قلق لدرجة انه ياخد أدوية فدا كمان بينفى موضوع انه حساس و مرهف و بتاع
 
من الآخر .. الراجل خاف يقول لحبيبته انه بينام مع مراته عادى لتغير و تقلب حياته كحلى
 
و بعدين هى عرفت ازاى؟
 
يعنى هل هى سألته .. انت بتنام مع مراتك و لا لأ … فكان رده انه يا عينى بقاله شهر مش عارف
 
و لا هو تطوع بالمعلومة علشان يبرهن على حبه و اخلاصه لحبيبته؟
 
لو هى سالته و دا كان رده كان المفروض تعرف انه كداب .. شهر مش حاجة
و لو هو تطوع برده كان المفروض تعرف ان شهر من غير جنس مع مراته لا يعنى اى شئ
 

Bookmark and Share