fbpx
مونتيسوري مصر- تقدمها مروة رخا

مروة رخا لمجلة احنا – مقاس جزمتك كام؟

 

 

مقاس جزمتك كام؟

بابا – الدكتور رخا – عالم حشرات و أخويا أصغر منى بسنة و كام شهر و طبعا دى كانت كارثة لما بابا كان بيحضر الدكتوراه. فكان الحل هو فصل القوات المؤقت: أنا أروح عند جدتى أم بابا و أخويا يفضل فى البيت. أنا مش هقعد أحكيلكم عن جمال الفترة اللى قضيتها عند جدتى و لا قد إيه مأثرة فى شخصيتى لحد دلوقتى (الله يرحمك يا تيتا). أنا هحكيلكم عن البلسم! الـ conditioner.

اللى فيكم يعرفنى شخصياً أو شاف صورى عارف ان أنا شعرى منتشر و منطلق و منتفش و "منتكش" … جدتى طبعاً كانت عايزاه على طول ناعم و ملموم و متسرح و متضفر و نايم فى خضوع و استسلام. كان الحل هو بلسم "إلسيف" … و عشت طفولتى و مراهقتى بشعر تم ترويضه بالـ conditioner لحد ما فى يوم و أنا عندى 23 سنة شعرى تمرد عليا و على كل أنواع البلسم و الـ conditioning اللى فى الدنيا و انطلق فى كل مكان يعلن عن طبيعته الغجرية المتمردة المتفردة … و أنا وراه!

و فى يوم من ذات الأيام يا ولادى كنت بقرا مقال عن ترويض البشر و التلاعب بالآخرين .. من باب العلم بالشئ بس يعنى .. هع هع هع! و لقيت مصطلح صدمنى فى مشاعرى و فكرنى بجدتى و البلسم و شعرى … الـ "social conditioning". و اتصدمت! الناس و المجتمع بيتعاملوا معنا كبشر زى ما جدتى كانت بتتعامل مع شعرى … كله لازم يتحط فى نفس القالب و يعمل نفس الفورمة و يهبط و يتروض و يتستف و يتلم و يتشد و يتلجم! يا خبر أسود!

و أنا فى تانية ثانوى كان مقاس رجلى 38 و ماما كانت مقتنعة ان البنت لو رجلها أكبر من 37 مش هتتجوز و ياما – و هى بتحاول تسرح شعرى و تلمه – حكت لى عن زميلاتها فى الشغل اللى أول ما العريس شاف "الرجل الكبيرة" راح و ما رجعش! و أنا صدقت و خوفت على مستقبلى طبعا و لبست جزم أصغر من رجلى و مشيت بيها و على وشى ابتسامة و لا كأنى متألمة و لا مخنوقة و لا هطق و لا عضمى بينهار تحت وطأة الجزمة الضيقة! عشت سنين رافضة الصنادل و الجزم المفتوحة لأنها بتبين الحجم الحقيقى للقدم … صيف شتا لابسة جزمة سودا و مقفولة و ضيقة! و لما كبرت عرفت ان ما فيش حاجة اسمها مقاس موحد للبنات و لا مقاس موحد للولاد … عرفت ان كل قدم لها طبيعة خاصة و شكل مختلف حتى لو المقاس واحد. عرفت ان راحة الجسم تبدأ من القدمين و راحة البال تبدأ من الراس!

و دارت الدنيا و بقيت بقرا مشاكلكم و حكاياتكم و معاناتكم مع الجزم الضيقة و الشباشب الواسعة و الشعر المربوط باحكام. و أهو كله بيتحل بالبلسم و الفازلين! مش مهم خالص طبيعتك و لا ظروفك و لا شخصيتك و لا احتياجاتك و لا مهاراتك و لا أحلامك و لا رأيك … دى حيالله حياتك و انت طبعا مش حر فيها! لازم "تتفرمت" و "تتكندش" – formatting and conditioning" يعنى – و تعيش فى قالب معد مسبقاً لك و لغيرك! تمشى و انت بتعرج لأن الجزمة ضيقة و تتكعبل و تقع لو جزمتك واسعة. تلبس كعب علشان تبقى أعلى من الناس و تسف تراب الأرض لما تقع و يضحكوا عليك.

عزيزى القارئ! مقاس جزمتك كام؟ 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”