fbpx
مونتيسوري مصر- تقدمها مروة رخا

تعليق إيمان هاشم على حلقة عقد الجواز و الشبكة و القايمة و الذى منه

فى حلقة راديو حريتنا رقم 58 من برنامج بحب فيك إيه. اتكلمت عن عقد الجواز و اللى بيتكتب فيه و الشبكة و المهر و القايمة و الكشف الطبى و حاجات كتير من اللى بتحصل فى جوازاتنا

الحلقة هنا للى عايز يسمعها CLICK HERE

 إيمان هاشم كان ليها رأى آخر و نقط برده لازم تتاخد فى الاعتبار و انا قررت انشرها هنا

تعالوا نشوف ايمان رأيها إيه .. بس من الأفضل انكم تسمعوا الحلقة علشان تعرفوا الكلام كان عن ايه

——————————————-

ازيك يا لوزة؟
بصى يا ستى. فيما يتعلق بأى اتفاق بين الاتنين قبل الجواز فى تلات اصول للموضوع:
-اعراف و تقاليد
-قانون الدولة
 -الشريعة اللى على اساها بتتحط اغلب القوانين او على الأقل بترجع لها

و كل اتنين طبعا من حقهم يختاروا اللى يريحهم مفيش اجبار. بس فى لبس فى الخلط بين الأمور.
يعنى مثلا : الشبكة عرف لكن المهر شرع و قانون.

من غير كلام كتير فى تفاصيل فقهية فى شوية تعليقات كنت عايزة اقولها بعد الحلقة و هى كالآتى:
اولا الاتفاق مش عيب, بالعكس. الاتفاق بيخللى الدنيا صافية بين الاتنين. و توثيق التفاصيل المادية مش وحش , لانه بيحفظ للناس حقها. الفلوس لو بقيت نزناز بين اى اتنين ممكن تبوظ العلاقة اللى بينهم مهما كانت العلاقة. فى اخوات بيخسروا بعض العمر كله بسبب خناق او حساسيات خاصة بالفلوس. و اكتر حاجة بتقفل الست من الراجل هى انها تحس انه عينه على فلوسها او انه مستنطع عليها.

ده انا و اصحابى لو فى بيننا فلوس كتير بنكتب ورق لبعض , ده مش معناه انهم مسرقننى او ان انا مخوناهم. السلاسة فى الفلوس و الوضوح اسلم طريقة تأمن الدنيا بين الاتنين. طالما مفيش واحد فيهم ناوى نيصب على التانى يبقى ايه العيب فى كده؟ لو له حق يتضمن له و لو ليا حق نفس الشىء.
و بلاش نظام ( ماهو لو عايز ياخد مفيش قانون هايمنعه و اذا كنت مأمنة على نفسى معاه هاخاف على فلوسى ازاى و الكلام ده) لانه كلام خايب. محدش ضامن العمر ولا المستقبل.

طب فرض جدلا جدلا طلع مش مسئول و حصلت مشاكل. لو فى ورق يحفظ الحق هاتبقى صعبة انك تاخدى حقك لكن لو مفيش ورق هاتبقى شبه مستحيلة.

اصل القايمة:

اولا القايمة قانون مش اعراف و تقاليد. القايمة ورقة يعتد بيها قانونيا و تبديد القايمة بيحبس.
ثانيا القايمة ليها حدوتة. مفروض البنت فى اول الخطوبة لها مهر. هى بتحدده بمزاجها و بتتصرف فيه برضه بمزاجها. و المهر ده بيكتب فى عقد الزواج بقيمته .

نظرا للغلا اللى احنا عايشين فيه و عشان بقى ما ينفعش نطالب الراجل بكل تكاليف الزواج. بقيت بتتشارك الست مع الراجل فى التكاليف ازاى؟ بتاخد مهرها و تاخد من والدها فلوس (جهازها) و تجيب بيهم الحاجات اللى هم اتفقوا ان هى مسئولة عنهم. الحاجات دى من النظرة القانونية لو مفيش اى حاجة تثبت ملكيتها ليها تبقى بتاعت صاحب العقار. القايمة هى الشكل القانونى اللى بيه بتحفظ البنت حقها فى الألوف اللى دفعتها فى الحاجة.
فين العيب فى ده؟

فى هنا بقى غلطتين بيحصلوا: 
-ان اهل البنت يكتبوا ما يعادل قيمة مادية اعلى من اللى فعلا هى جابته
-ان الراجل يرفض اصلا مبدأ القايمة عشان المفهوم اللى بدأ ينتشر بتاع ان القايمة اهانة للراجل و عيب و البنات الخايبة كمان بتوافق. الحق حق!

عقد الزواج:
التعديلات الخاصة بالبنود كانت الخطوة اللى بيها الست ممكن تحفظ بعض الحقوق الشرعية اللى ليها حسب الشرع و كانت لثغرات فى القانون ممكن تضيع منها. و طبعا قسيمة الجواز دى عقد. يعامل قانونا بالطريقة دى و بالتالى البنود ( مش شروط) اللى بتكتب دى لازم تكون بنود يمكن متابعتها قانونا برضه.
بمعنى … اللى ما شافش عقد الجواز قبل كده , هو دلوقتى فيه صفحة شبه فاضية كده هى اللى بتتزود فيها البنود دى. و اللى اهمها سفر الزوجة و الجواز من ست تانية.

فى سؤال سألتيه يا مروة و هو ليه الراجل ما يكتبش هو كمان انه من حقه يتجوز واحدة تانية. الاجابة لان ده اصلا ال
Default
بتاع القانون. فى الوضع الاصلى مفيش راجل عايز يتجوز واحدة تانية حد يقدر يقول له بتعمل ايه. التعديل هو الحفاظ على حق الست فى انها ترفض ان جوزها يجمع بينها و بين ست تانى. و لو عايز يتجوز واحدة تانية براحته بس يطلقها الاول.
اما السفر. الأصل برضه فى القانون ان من حق الزوج منع زوجته من السفر. و من كم سنة سبب ده مشاكل خاصة بستات منفصلين عن ازواجهم و كانوا بيتعرضوا ام ييجوا يسافروا لموقف مخجل جدا اما تتعامل على ان اسمها مدرج فى قائمة الممنوعين من السفر زى المساجين الهاربين و المطلوبين من الانتربول. التعديل اعطى الست الحق فى ان جوزها ما يعملش كده فيها.

ليه بقى ما ينفعش نكتب مصروف البيت و الحقوق الخاصة و الكلام ده؟ لانه ما ينفعش يتطبق (قانونا) يعنى اما نكتب مصروف البيت هاييجى الراجل يديه لمراته بوصل امانة و تمضى هى عليه؟ لا طبعا. عشان كده ده مثلا ما ينفعش يكون بند فى عقد الزواج.

بس كده يا لوزة

 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”