دعوة إلى وئد البنات
أيوة .. فعلاً .. أنا أطالب بوئد المولودة الأنثى
دى كانت جملتى اللى أذهلت الصحفية الأمريكية فى حوارها معى
و ردت عليا بلغة عربية متلصمة: "بس دى عودة إلى الجاهلية"
صدمتها تانى و رديت: "ما احنا لسة فى الجاهلية … احنا فى أحلك و أسوء العصور الجاهلية"
و ابتديت أشرح لها وجهة نظرى من خلال المقارنة بين الجاهلية البائدة و الجاهلية العصرية
زمان
كان الأب أول ما يعرف إن مراته خلفت بنت يكتئب و وشه يسود و يشيل الهم … خايف من عارها و من جسمها و من تمردها عليه و من حمل صرفه عليها و إعالتها و هى كدة لا ليها فايدة و لا لازمة و لا شغلانة
يتخيل كدة انه قعد يربى و يأكل و يشرب و يعلف علشان يجى واحد غريب ينام معها و يستمتع بجسمها … و هى المفروض ملكه … زى كدة البقرة و لا الفرسة و لا أى حاجة مربيها عنده فى الزريبة
كان الراجل من صدمته و من خوفه يروح واخد المولودة و هى لسة لحمة حمرا و يدفنها بالحيا فى الرمل … و تموت … و يخلص هو من البلوة اللى كانت هتحل على دماغه
دلوقتى بقى الأمر اختلف تماما
الأب أول ما يعرف إن مراته خلفت بنت يكتئب … ما هو أصله عارف إن داين تدان و إن الدنيا دوارة و إن كل اللى أكله وز وز هيطلع عليه بط بط
لكن قدام الناس بيعمل نفسه فرحان و مبسوط … و يقضى ليله و نهاره عينيه مفنجلة فى وسط راسه .. بيراقب الطفلة بتكبر و بتحلو و بتتكلم و بتمشى و بتحضنه و بتدلعه و يبتدى يحس زى المحكوم عليه بالإعدام كل ما يومه يقرب
و الأم تبتدى تاخد بالها إن بنتها حبيبتها أنثى و إن العار و الأنثى كلمات مترادفة
يتحد الأب و الأم … اللى عمرهم ما اتفقوا على حاجة تانية
و يبدأ الوئد البطئ
الدرس الأول: عيب و ما يصحش و حرام
الدرس التانى: عاداتنا و تقاليدنا و الأصول
الدرس التالت: الناس يقولوا علينا إيه؟
الدرس الرابع: البنت المحترمة لازم تعيش و تموت خشبة … هيا بنا على الختان! هى جوزها هيكون عايز منها إيه غير إنها تبقى خرم فى حيطة؟ أو تبقى جثة و لا مخدة؟ أو مبولة آدمية؟
الدرس الخامس: ولاد لأ
الدرس السادس: لعب و خروج و فسح و فرح و مرح لأ
الدرس السابع: صوت عالى و ضحك لأ
الدرس التامن: أسئلة و جدل و اعتراض لأ
الدرس التاسع: اتغطى … كل حاجة فيكى عورة!
صوتك عورة … ريحتك عورة … شعرك عورة … كل حتة فى جسمك عورة … وشك عورة … حياتك عورة
اختفى .. يا ريت تختفى … هس هس … لا صوت و لا صورة .. لا لون و لا طعم و لا ريحة … هس هس
الدرس العاشر: حب إيه و علاقات مين و تجارب حياتية بتاع إيه … يابنتى احمدى ربنا إننا سابين لك حق النفس
الدرس الحداشر: مصيرك الجواز! تتطلعى من بيت أبوكى على بيت جوزك على القبر!
التعليم دا علشان يبقى اسمك اتعلمتى
و الشهادة علشان يبقى اسمك معاكى شهادة
و الشغل علشان تسلى وقتك لحد ما نصيبك يصيبك
الدرس الاتناشر: جوزك حلو وحش .. لبستيه.
بيعرف ما بيعرفش … لبستيه.
بيفهم ما بيفهم لبستيه.
خانك ما خانك … لبستيه.
مقرف معفن … لبستيه.
بخيل ما بخيل … لبستيه.
ضربك ما ضربك … لبستيه.
أهملك ما أهملك … لبستيه.
اغتصبك … آه صحيح .. إيه اغتصبك دى؟ دا جوزك!!! حلاله بلاله! هو مش دفع فيكى قد كدة؟ و لا انتى بقى عايزة الملايكة تلعنك؟
دا قدرك و نصيبك و ربنا يجمعكم على خير فى الجنة.
أيوة ما هى دى التضحية و لا انتى عايزاه يقول عليكى أنانية و ولادك هيحاسبوكى حساب الملاكين لو اتمردتى و لا فتحتى بقك
الدرس التلتاشر: انتى خدامة بريموت كونترول.
زرار و تطبخى.
زرار و تنضفى.
زرار و تغسلى.
زرار و تبتسمى.
زرار و تحكى حكايات.
زرار و تخلفى.
زرار و تخلفى تانى.
زرار و تربى العيال.
زرار و تفتحى رجليكى.
زرار و تصيحى.
زرار و تسبحى بحمد ولى نعمتك.
الدرس الاربعتاشر: ما فيش طلاق و لو اتهببتى اتطلقتى هتبقى فرز تانى و ما حدش هيرضى يتجوزك … أيوة .. ما هو قال لى إيه اللى خلاه يتجوز واحدة متطلقة و هو لسة فى عز شبابه؟
الدرس الخمستاشر: عادى … يتجوز عليكى!
عادى … يصاحب عليكى!
عادى يرميكى فى الشارع لو اشتكيتى و لا فتحتى بقك
و لو قلتى حرام تبقى حرمت عليكى عيشتك
الدرس الستاشر: أنتى قاصر إلى أن تموتى! من باباكى لأخوكى لأعمامك لخلانك لجوزك لرجالة عيلة جوزك لأبنائك للحنوتى اللى هيكفنك
الدرس السبعتاشر: إنتى الشرف … اللى هو العار المستخبى بين رجليكى
الدرس التمنتاشر: انتى ناقصة عقل و ناقصة دين … لا تمسكى فلوس و لا منصب و لا أى حاجة خالص
الدرس التسعتاشر: كلنا لها
الدرس العشرين: زمان كانوا بيوئدوا البنات
You must be logged in to post a comment.