fbpx
مونتيسوري مصر- تقدمها مروة رخا

البنات و الولاد و مواقع الجواز

يا مروة إزيك
وألف مبروك عالجواز بجد فرحتلك قوي 🙂

الحقيني!!!!
 بصي يا ستي باختصار أنا واحدة عندي 30 سنة بالضبط ومن أسرة كويسة قوي الحمدلله  وما عنديش مشاكل خالص على الصعيد الاجتماعي أو المادي مثلا والحمدلله

أنا بس كان عندي مشكلة مع الولاد أو الرجالة…بتعمل معاهم كلهم زي اخواتي أو صحابي وده طبعا  يرجع لتربية المتحفظة…هتقولي كبيرة عالكلام ده أيوه عندك حق بس أنا بقالي فترة بشتغل على نفسي إني اركز عايزة إيه عشان اختاره واركز عليه بس أنا بردو لسة عندي التحفظ إياه برغم كل محاولاتي إني اعاود نفسي إني أكون لطيفة ورايقة كده.

المهم يا ستي مش هطول عليكي…من كام يوم لقيت لينك على فس بوك لسايت من بتوع المتشينج…الفضول الصراحة قتلني…وقلت أشوف الناس هناك عاملة إزاي

فرجة مش أكتر

وحتى فيه شات محاولتش افتحه بس بشوف المهم واحد عجبني اللي كاتبه عن نفسه وكده المهم اتكلمنا وقلتله إني داخلة اتفرج وكده…كان لطيف وهو فعلا محترم وا بن ناس كويسين …أنا مش معترضة لو عرفت شريكي من موقع زواج

مش فارق معايا…أنا أصلا لازم تتعاملي معايا عشان تعرفيني بس خيبةةةةة قوي في موضوع التظبيط ده ,دايما بيبوظ مني

المهم الولد كويس و بعد ماحس إني ظريفة وبتاع قاللى أنا نفسي أشوف شكلك وكده

أنا  طبعا داخلة باسم مستعار ومن غير صورة .حصل اللي حصل دفته عالفيس بوك …حصلت الكارثة ….أول حاجة  قال لي إنتي امورة قوي  دقيقة قال إنتي تعرفي فلانة دى منين؟؟؟ قلتله فيه إيه؟ قال لى أنا كنت خطيب صاحبتها و اوعي تعرفيها إني قابلتك على موقع جواز … أنا مش مصدق

طبعا اديتله درس …وقلتله أولا أنا حتى لصاحبتي قوي مش هقولهـا وبعدين هي مش صاحبتي ثانيا إيه المشكلة يعني هو إنت داخل هنا واسد حاجة غلط لاسمح الله ولو اتعرفت على حد وطلع كويس مش هات كامل يعني -ومش لازم أنا ….قال لي لأ طبعا إنتي فهمتيني غلط أنا قصدي على تفكيرها هي  منظري هيبقى إيه وانا عارف تفكيرها إنتي مالكيش علاقة ان بحترمك وعشان كده طلبت منك ده …….

تماااااااااااااام المهم في نفس اليوم قلتله انسى اللي قلته لي ده خالص ولو حبيب تشيلني من على فيس بوك مش حدايق….

مش بيرد ..وماشلنيش …وقدامي أون لين…..وأنا حاسة إنه ييجي منه الصراحة.

!
إيه رأيك ,وبليييييييس متقوليش ماتعبريهوش ,مش أنا مش هعباره ,,,بس إيه اشيله ولا اسيبه ولا إيه وإيه رأيك في الموضوع برمته؟؟
وإيه اللي يخليه يقول أصلا عالقصة…كان ممكن أول ماشاف الصورة بتاعت صاحبة صاحبته كان يشيلني وخلاص ويا دار ماداخلك شر ….فيمش فاهمة الصراحة؟
أنا متأكدة إنك هتساعديني يا مشمشة 😀

Regards,
  

————————————————-

يادى النيلة
 
انا خايفة يكون واحد من اياهم
 
هقولك اياهم دول ايه
 
فى ولاد عندهم فراغ عاطفى زى البنات بالظبط و زهقانين من وحدتهم و من حياتهم فبيعملوا ايه؟
 
يدخلوا على النت يتسلوا!
 
مواقع الجواز احسن مكان للتسلية بالنسبة للولاد دول لأن كل البنات اللى داخلة على مواقع الجواز مهيئة نفسيا للكلام و التظبيط بتاعهم.
 
مش زى مثلا الفيسبوك … هترد عليه و تشتمه و لا هتهشه بالذوق و لا تعمل له بلوك!
 
و علشان البنت توصل لمرحلة انها تدخل تدور على راجل فى موقع جواز .. دا معناه انها يأست من الواقع و هتموت و ترتبط
 
و دا بيترجم عند الولاد دول انها فريسة سهلة
 
و يقضى وقت لطيف بقى
 
فى اللى بيقضيها شات و خلاص و فى اللى بيفتح كام و فى اللى بيقضيها تليفون و فى اللى بيقضيها مقابلات و خروج .. كل واحد و هو عايز ايه و البنت هتسمح بايه
 
و البنت طبعا عشمانة فى العريس و الجواز و اليوم اللى هيدخل فيه البيت
 
فى نوع من اخواننا دول فعلا بيدخل البيت و يتلكك على اى حاجة و يخلع
و فى نوع بيقلب الموضوع بدرى بدرى بحجة عدم التوافق
و فى اللى بيفضل يمطوح فى البنت لحد ما تزهق يا اما لحد ما هو يشوف شوفة تانية
 
و فى بقى يا مشمشة النوع الغالب اللى بيعتبر التعارف على النت او مواقع الجواز دا عيب و قلة أدب … حاجة مشينة فى حقه لو اتعرفت و بالتالى حاجة عيب أوى فى حق البنت
 
الأخ بتاعك سايبك كدة قدامه لحد ما الشوق يجيبك و ساعتها هيبقى هو ما وعدكيش بحاجة و لا ضربك على ايدك
 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”