هذه التدوينة نداء عاجل لكل صحفى شريف و كل اعلامى ضد الفساد و كل مواطن مؤمن بالثورة و أهداف الثورة
ما تقولش و انا مالى
و لا دا موضوع صغير و مش مهم
ساعد فى رفع الظلم عن مواطن غلبان محتاج لقمة العيش الزفرة!
إيه اللى حصل؟
الشركة الهندسية للمشروعات العمرانية المسؤولة عن إدارة " تجمع حدائق المهندسين" فى مدينة الشيخ زايد امتنعت عن صرف مرتبات قطاعات الأمن و الزراعة و النظافة عن شهر يوليو و طالبتهم بملاحقة الملاك الممتنعين عن دفع مصاريف الصيانة و قالت لهم يروحوا يحصلوا مبالغ الصيانة المتأخرة علشان يقبضوا .. يا كدة يا مافيش قبض!
ليه؟
لأن بعض ملاك الوحدات السكنية امتنعوا عن دفع مبلغ الصيانة السنوى و محصلين الشركة مش عارفين يتصرفوا معهم! السكان امتنعوا ليه؟ مش مشكلتنا!
و العمال دخلهم ايه؟
مش عارفة!
اسمه ايه بقى الكلام دا؟
قهر! ظلم! فساد! استغلال!
هو احنا عملنا ثورة ليه و على مين و ضد ايه؟
"حدائق المهندسين" و اللى بيحصل فيه دا صورة مصغرة من مصر و اللى بيحصل فيها!
الفقير الغلبان اتظلم و لسة بيتظلم يا ثوار!
تخيل مدى الذل و الإهانة اللى بيشعر بيها فرد الأمن و هو بيطرق الأبواب و "بيشحت" علشان يقبض!
تخيل مدى القهر اللى بيشعر بيه العامل اللى دخل عليه رمضان و مش عارف يأكل عياله
تخيل مدى الظلم اللى واقع على الغلابة اللى مالهمش ذنب غير انهم بيشتغلوا فى شركة لسة بتفكر بعقلية مبارك و نظامه و فلوله و أيتامه
حسبى الله و نعم الوكيل!
مين الراجل الكبير خالص؟
حسن محمد حسن درة رئيس مجلس ادارة مجموعة الشركات درة – يعرف و لا مايعرفش هو برده مسؤول!
مين المسؤول المباشر عن الظلم دا؟
الشركة الهندسية للمشروعات العمرانية – احدى شركات مجموعة درة و ممكن تكلموا الأستاذ وليد نيازى
اللى عايز أى تفاصيل يبعت لى! و اللى عايز ينصر الغلبان يكتب و يدون و يذيع و يصعد الموضوع علشان الحرية و الكرامة و العدالة الاجتماعية