fbpx
مونتيسوري مصر- تقدمها مروة رخا

أعمل إيه علشان الطفل ينام؟

أعمل إيه علشان الطفل ينام؟ في حاجات ممكن تتعمل تساعد الطفل أنه ينظم نومه؟ وصلتني رسالة عن طفلة نومها وحش وبتسهر ... طفلة عمرها سنتين. دا الرد

أعمل إيه علشان الطفل ينام؟

وصلتني رسالة من أم النهاردة عن طفلتها اللي نومها وحش وبتسهر ... طفلة عمرها سنتين. دا الرد يمكن ينفع أمهات كتير:

بحضنك وبطمنك
أولاً الأطفال مختلفين
وظروف كل أم وكل بيت بتفرض حاجات على الواحد.
في حاجات ممكن تتعمل تساعد الطفل أنه ينظم نومه.
زي إيه؟

1- يصحى أكثر حاجة بدري ممكن تقدري عليها ... كل يوم في نفس المعاد.

2- مواعيد أكله تكون ثابتة وتكون معاكي ويا ريت مع الأسرة كلها.

3- لو في قيلولة تكون في معاد ثابت ... تحديد المعاد بيتوقف على مراقبتك للطفل ومعرفتك بيه .. يعني الطفل هو اللي بيختار.

4- القيلولة بتكون في أجواء البيت العادية ... يعني مش لازم تضلمي الأوضة وتوقفي الصوت .. إلا لو طفلك شديد الحساسية.

5- أهم نقطة بقى ... على الأقل ساعتين أو ثلاثة كل يوم برة البيت في الطبيعة والطفل يجري ويلعب ويتنطط ويتشمس.

6- تثبيت معاد النوم .. مثلاً لو معاد الصحيان الساعة 7 الصبح فمعاد النوم هيكون 7 بالليل .. كمثال يعني.

7- قبل وقت النوم بساعة مثلاً مافيش أي منبهات ولا مثيرات ... مافيش استغامية ولا تنطيط ولا شاشات ولا زيارات ولا فرهدة من أي نوع.

8- احترام مواعيد النوم ... يعني مافيش سهر علشان جايلنا ضيوف ورايحين لحد ولا عيد ميلاد ولا أي حاجة من دي ... بكرة يكبر وتعملوا كل دا.

9- الطفل ينام النومة اللي بتريحه ... لو اللي بيريحه أنه ينام وهو بيرضع أو في حضنك أو وأنت بتقريله ولا أي حاجة من دي ... اخضعي .. اعملي اللي هو عاوزه. مهما كان اللي هو عاوزه بكرة يكبر ويستقل عنه.

10- بلاش أول ما ينام تقومي أو تنقليه لأنه هيقلق وهيقريف وهيفقد الثقة فيكي وهيتعود ينام وهو "مفتح عينه" علشان لا تمشي ولا تنقليه ولا تسيبيه.

11- لو قلق وسمعتي صوته تستجيبي على طول ... ما تستنيش لما يعيط ولا ينهار ... لو ما استجبتيش على طول هيفقد الثقة فيكي ودا هيخليه يقاوم النوم.

12- عادات النوم السليمة كلها بتتبني في الطفولة وخاصة في أول 3 سنوات ... ما تخليش النوم مرتبط بالخوف والقلق وعدم الأمان. 

كلام مهم عن فطام الطفل الرضيع
فيديو: تدريب الطفل على النوم يدون مساعدة وجدول الرضاعة والاستقلال المبكر
مروة رخا تكتب لمصر العربية: السبب الخفي وراء سلوك الطفل السيء
ما هي تفاصيل كورس المونتيسوري الكامل من 0-3 سنوات؟
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”