fbpx
مونتيسوري مصر- تقدمها مروة رخا

ليه مافيش مواد منفصلة في كورس 3-6؟

سؤال بيتكرر كتير: ليه يا مروة يا بنت رخا مش عاملة مواد منفصلة في كورس المونتيسوري الكامل من 3-6 سنوات؟
سؤال بيتكرر كتير: ليه يا مروة يا بنت رخا مش عاملة مواد منفصلة في كورس المونتيسوري الكامل من 3-6 سنوات؟

بما أن كورس 3-6 هو كورس التأسيس، ليه مافيش إنجليزي لوحده؟ رياضيات لوحدها؟ تاريخ وجغرافيا لوحدهم؟ علم نبات وعلم حيوان لوحدهم؟ تجارب علمية عملية لوحدها؟

ليه المواد المنفصلة (الإنجليزي والرياضيات) في المرحلة العمرية من 6-9 و9-12 فقط؟
الإجابة:
قبل الإجابة لازم أعترف اعتراف مشين ... اللي معايا في كورس 3-6 عارفين الاعتراف دا هههههههههههه.
الاعتراف:

زمان ... بعد ما خلصت دبلومة 3-6 على طول ... كنت متحمسة وشايفة أن تدريس الرياضيات بالمونتيسوري عبقرية وأن لازم أستغل الطريقة والأدوات وأنشر العلم دا وأنقذ العيال من العقد والكلاكيع.

عملت كورس مباشر – رياضيات - للأطفال من 3-6 سنوات بحضور أمهاتهم. كانوا أصعب أربع محاضرات في حياتي كلها!
 
فشلت فشل ذريع! أثبت أني مش هاضمة الفلسفة!
 
عدت السنين وأخدت الدبلومتين التانيين (6-9 و9-12) واشتغلت مع آدم كتيييييييييييييير واستويت وبقت فلسفة المونتيسوري جزء من شخصيتي ... مش عارفة فين ماريا مونتيسوري بتنتهي وفين أنا بابدأ.
 
فضلت بفكر في التجربة المريرة ... ليه كان في أطفال مش بتنطق ولا بتتفاعل معايا؟ ليه كانت الأمهات مكتفة العيال حرفياً؟ ليه في أطفال خطفوا الأدوات وجريوا وضربوا بعض؟ ليه وليه وليه ... فشل مالهوش أخر والله!
 
الإجابة:

• هل الأطفال دول تم إعدادهم نفسياً لدخول بيئة مونتيسوري؟ لأ!

• هل الأطفال دول اتعلموا يتحكموا في جسمهم وحركتهم؟ لأ! غوغاء خالص!

• هل الأطفال دول اتعلموا ينفذوا مهام بسطة لكن مفيدة؟ لأ!
• هل اتعلموا يدخلوا الحمام ويقضوا حاجتهم ويخرجوا من غير مساعدة؟ هل اتعلموا ينفوا ويمسحوا مناخيرهم؟ هل اتعملوا يلبسوا ويقلعوا ويربطوا الجزمة؟ كل دي قدرات لازم تيجي قبل التعليم الأكاديمي!
• طيب هل عرفوني واتعودوا عليا أصلاً؟ لأ! طيب أنا أعرفهم وأعرف أساميهم؟ لأ!
• هل تم تنمية قدرتهم على التركيز؟ قدرتهم على التذكر؟ قدرتهم على العمل في هدوء؟ لأ خالص طبعاً!
• هل اشتغلوا فترات طويلة على الاستقلال الجسدي والنفسي؟ تؤ تؤ!
• هل اشتغلوا فترات طويلة بأنشطة التمييز البصري؟ طيب تنمية حاسة اللمس؟ طيب القدرة على التصنيف؟ القدرة على المطابقة؟ التتابع؟ المقارنة؟ التدرج من الأقل للأكبر؟ من الأخف للأتقل؟ من الأصغر للأضخم؟ من الأفتح للأغمق؟ والتدرج بعكس كل ما سبق؟ لأ برده خلاص البتة بتاتاً!
• هل فهموا أي حاجة عن الزمن (اليوم وأمس وغداً)؟ عن المواسم؟ عن السنين؟ عن كوكب الأرض واليابس والماء؟ عن الشمس والقمر والنجوم؟ عن الشجر والزرع والزهور؟ عن الحيوانات اللي ماشية وطايرة وعايمة وزاحفة؟ هل أخدوا فرصتهم في تأمل بيئتهم (ما سبق) وفهمها؟
• هل عندهم القدرات اللغوية لاستخدام وفهم الأسماء والأفعال والصفات؟ هل تم تدريبهم على مفاهيم الكم والعدد في حياتهم اليومية؟ هل تم تدريبهم على مفاهيم الجمع والطرح والضرب والقسمة في مواقف يومية لغوية علشان يستوعبوا الكلام دا في الكورس؟
 
الإجابة على كل الأسئلة: لأ! لأ العيال مش مستعدة! لأ لأن قبل العربي والإنجليزي والرياضيات في شغل كتييييير على البني آدم الصغير دا علشان يفهم ويستوعب ويستفيد باللي بيتعلمه!
علشان كدة فصل أي قسم من أقسام المونتيسوري في المرحلة العمرية من 3-6 سنوات جريمة في حق الطفل! جريمة أرفض الاشتراك فيها! جريمة مش هتحصل عندي ولا على صفحتي!

بس خلاص!
كلام من القلب: عن كورس المونتيسوري الكامل من 3-6 سنوات
ما هي تفاصيل كورس المونتيسوري الكامل من 3-6 سنوات؟
فيديو للتعريف بمحتويات كورس المونتيسوري الكامل من 3-6 سنوات مع مروة رخا
Montessori Stamp Game: 3-6 
Montessori 3-6: Learning to read 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”