سؤال متكرر: طفل/ة ثلاث سنوات … المفروض يكونوا بيتعلموا إيه؟ شوفوا بقى … الكلام دا لحد أربع سنوات كمان.
ملحوظة: متاح كورس المونتيسوري الكامل من 0-3 سنوات (أونلاين – مسجل) علشان تساعدوا ولادكم يتعلموا الحاجات دي وتكون بدايتهم صح.
الأطفال في أول ثلاث أو أربع سنوات من عمرهم المفروض يكون بيعرفوا:
* يقفوا ويمشوا ويجروا وينطوا ويتسلقوا الكنب والزحاليق والمتميز منهم ممكن يمشي على حز الرصيف.
* يطابقوا فرد الشرابات، يطابقوا فرد الجزم والشباشب والصنادل، يطابقوا الشوك بالشوك والملاعق بالملاعق والسكاكين بالسكاكين.
* يصنفوا الشوك لوحدها والملاعق لوحدها والسكاكين لوحدها.
* بيقدروا يوفقوا بين العامل وأدواته. مثلاً النجار والشاكوش.
* بيقدروا يطابقوا الشيء وظله والشيء وتحديده.
* بيقدروا يعملوا بازل على الأقل من 12 قطعة كبيرة وممكن 20 و30 لو الطفل له مزاج وغاوي.
* بيعرفوا يصنفوا وفقاً للون؛ الأحمر مع بعضه والأزرق مع بعضه والأصفر مع بعضه.
* عارفين اللون الأحمر والأصفر والأزرق … وممكن نحاول في البرتقالي والأخضر والبنفسجي.
* عارفين النهار والشمس والليل والقمر والنجوم.
*عارفين البحر ونهر النيل وركبوا مراكب فيه.
* عارفين ملمس الرمل والطين والعجين واللحم المفروم والصلصال.
* عارفين، ولمسوا، وأكّلوا، حيوانات المزرعة وعارفين أسمهم وصوتهم.
* عارفين، وأكلوا 100 مرة، حيوانات الغابة (في حديقة الحيوان أو أفريكانو) وعارفين اسم أشهرهم وصوتهم.
* عارفين أن الزرع كائن حي وعندهم زرع وبيراعوه.
* عارفين أن الحيوانات كائنات حية ولها احترامها وعندهم حيوان أليف.
* عارفين لعبة “البيضة واللي أكلها” ولعبة “بسبس” ولعبة “الزغرغة والوحش”.
* عارفين يعني إيه حضن وضحك ولعب وجري وانطلاق.
* عندهم فرش وألوان وورق وبيشخبطوا براحتهم.
* عندهم قصص فيها صور حقيقية وجميلة وحد بيقرالهم.
* بيعرفوا يلمعوا الترابيزة والمرايا والشباك.
* بيعرفوا يمسحوا الأرض ويكنسوا بالفرشة والجاروف والمقشة.
*بيعرفوا يمسكوا الملعقة وياكلوا بيها.
* بيعرفوا يقلعوا ويلبسوا بمساعدة الأهل.
* بيعرفوا يعبروا عن الرفض.
* بيلاقوا حضن يعيطوا فيه وودان تسمعهم باحترام.
* بيعرفوا أسماء الفاكهة والخضار اللي في التلاجة.
* بيعرفوا يغسلوا الخضار والفاكهة وبيعرفوا يقطعوا الموز والخضار المسلوق بسكينة الزبدة.
*متأكدين أنهم مرغوب فيهم وأنهم محبوبين زي ما هم كدة.
*بيخرجوا على الأقل 3 أيام في الأسبوع خروجات انطلاق … مش المول … مش زيارات عائلية … مش مشاوير .. مش تدريبات.
* عارفين الأعداد لحد 3 … لما تطلب 3 خيارات، يجيبوا 3 خيارات. الأرقام والأعداد للفهم والإدراك مش للحفظ والكر.
* عارفين الأصوات … صوت “م” … والأشياء اللي حواليهم بالصوت دا … زي موزة … مخدة … مكتب … مشمش .. ماما.
* بيصنفوا بالمجموعات: مثلاً الحيوانات لأليفة ومزرعة وغابة … أو لحيوانات بتطير/بتمشي/بتعوم.
*عارفين أن مش من حق حد يبوسهم غصب عنهم ولا يحضنهم غصب عنهم مهما كان الحد دا.
* عارفين يقولوا “من فضلك” و”شكراً” و”تسلم إيدك”.
أما بقى اللي مستنين أقولهم الأرقام والحروف والأبجدية والكتابة والتلوين جوا الخط … خليكم مستنيين!
حفظ الأبجدية على 8 أو 9 سنوات لما يحتاجوها بالترتيب علشان استخدام القاموس!
الحروف ونطقها وشكلها مش قبل خمسة ونص أو ستة … استعداداً لقراءة كلمات من ثلاثة أحرف.
الأرقام والعد معاكم من أول أربعة ونص لحد ستة.
الكتابة مش قبل ستة أو سبعة.
أكتر حاجات الطفل محتاجها قبل ست سنوات …. الحب غير المشروط واللعب الحر والتجارب الحياتية الغنية (يشوف الدنيا يعني).
