fbpx
مونتيسوري مصر- تقدمها مروة رخا

رسالة من ولد: ماما بتحب زى المراهقين

 
 
 
السلام عليكم
ازى حضرتك يا استاذة مروة

بجد انا تعبت من الموضوع اللى جاى دا

انا قولت لحضرتك قبل كدا ان والدى متوفى وماما بيجلها عرسان كتير جدا

حتى ابويا لما كان عايش كانوا بيروحوا يخطبوها منة !!!!!!!

 

كأنة موسم تزاوج الذكر المصرى 
يمشى واحد يجى تلاتة

 

 

انا كرهت امشى معاها فى الشارع 
حاجة مستفزة بجد

 

ساعات بحس انى بتفرج على فيلم ديكيومنترى على قناة انيمل بلانيت

خلاص كل الرجالة طفشانة من بيوتها ومن مرتاتهم

انا مع فكرة ان امى تتجوز

 

انما اللى جاى دا عمرة ما حيحل مكان ابويا ولا حكون مبسوط لما اشوفة قاعد مع ماما 
ولا هوا حيكون مبسوط لما يشوفنى

 

انا قولت ماما تتجوز عشان تعبت مع ابويا الله يرحمة كتير جدا واستحملت قرفة وقرف اخواتة19 سنة

 

انما مايبقاش البيت كأنة مكتب خاطبة 
ما ينفعش يبقى التليفونات باليل وبالنهار

 

 

ومحمود عاوز يتعرف عليا ويصاحبنى ومحمد نفسة يقابلنى 
وعلى بيسلم عليا

 

 

ما ينفعش انا بجد اعصابى تعبت جدا 
انا كنت الاول بقول ما تبقاش انانى ودا حق امك وامك تعبت كتير عشانك 
انما كدا انا زهقت

 

 

 
وفى منهم ناس بتتعلق بيهم وناس لا ودا الطبيعى

 

 

 
بس انا بضايق جدا لما بشوفها بتتكلم مع واحد هيا معجبة بية وبيقعدوا يتكلموا بالساعات وتبقى شكلها ولا كأنها عيلة فى ثانوى بالمريلة لسة 
وتجرى على التليفون وشغل عيال ثانوى اللى انا يا عيل ما بعملوش

 

صحيح ماما ست محترمة جدا وعمرها ما حتعك مع واحد او تتجوزة عرفى حتى

 

بس ما ينفعش حد يتكلم فى التليفون الساعة 5 و6 الفجر ويكلمها بالساعات ولما اكلمها تقولى معلش دا من امريكا وفرق التوقيت !!!
وكمان مش راحمة اللى فى مصر بس 
دى بقت انترناشونال 
واحد من امريكا وواحد من قطر

 

 

وطبعا لما الباشا يتكلم انا لازم اطلع برا عشان تكون براحتها معاة وتقدر تفهم شخصيتة
لو بتفرج على التليفزيون اسيبة لو بتكلم فى التليفون اقفلة

 

 

واللى غايظنى ما فيش ولا حد فيهم عدل وعاجبها 
وفعلن مش بيكونوا مناسبين مش دلع منها

 

 

وكل شوية لما اكلمها اقولها يا ماما يا حبيبتى 
تقولى ما تقلقش الموضوع مش حيكمل !!ّ!
طالما الموضوع مش حيكمل بتكلميةلغاية دلؤتى ليييية !!
ما تقطعى معاة عشان الموضوع مش لذيذ خالص بالنسبة ليا

 

 

تقولى انا ذوق ما ينفعش احرجة او اجرحة 
ولازم تيجى واحدة واحدة 
وبالتدريج

 

يعنى بسلامتة ما يتجرحش وانا اللى مش مشكلة اولع

 

ومعنى انها تيجى واحدة واحدة دى ان ممكن بسلامتة يقعد يتصل تلت اربع شهور ويقعد يقنع فيها وهيا تقلة ما ينفعش والله يا محمد وانا وانت اخوات 
او يروح ويجى بعد شهر و يقولها فكرتى 
كل دا عشان ما يتجرحش

 

وانا ذنب امى اية ما ببقى مولع وبطلع دخان قدامها !!!

اقولها انا بضايق وراعى شعورى تقلبها خناقة

 

وتقولى انت قليل الادب وياخسار السنين اللى ربيتك فيها 
وتشغل الاسطونة اياها

 

 

 
ويارب ابنك يعمل معاك كدا )
وانت مش ابنى وشغل الابيض واسود دا 
وتكرهنى فى عيشتى وتضلملى مستقبلى خالص

 

 

وبعديها اصالحها والاقى زبون جديد جاى 
وتبدا تتعرف بية من اول وجديد 
وطبعا هيا ذوق ومش بتجرح 
وهكذا

 

لغاية لما زهقت من عيشتى

 

وانا مش مستقل ماديا عنها 
ومش حعرف استقل عشان ببساطة مش حعرف اجيب تمن شقةايجار واكل وشرب ولبس 
وانا لسة طالب فى سنة اولى تجارة ؟!!!
يعنى مرتبى بيكفى مواصلاتى

 

 

انا مش عارف اعمل اية وتعبت 
واغلبت احاول اوصلها وجهة نظرى

 

 

انا عارف ان لازم يكون راجل فى حياتها 
بس مش المفروض تراعى شعورى

 

 

دا انا بقعد اشوف ال السيفهات بتوع العرسان معاها واقولها خلى بالك واسمع حلقات حضرتك واقولها وشايل همها وعامل حساب مشاعرها 
وتيجى فى الاخر ما تراعيش مشاعرى ولا تحترم شعورى 
يعنى هيا سهلة عليا انى اقعد اشوف وافكر معاها عن الباشا اللى حيحل مكان ابويا

 

 

 
وعايش راهب عشانها 
صحابى يقولولى يلا بينا اقولهم لا انا مش عاوز احسس ماما انى اول ما كبرت سيبتها وهجرتها 
لا بصاحب بنت واللى حبتها كنت بروح احكيلها كل حاجة عشان ما اقلقهاش واحسسها بالامان

 

 

وحاسس اللى عملتة دا غلط وهبل وصحابى عندهم حق 
لان لا كدا عاجب ولا كدا عاجب 
فى الحالتين قليل الادب

 

 

 
انا زهقت فعلن ومش عارف اعمل اية بجد لا ينفع افضفض مع صحابى ولا مع جدى ولا حد من خلانى طبعا

 

عشان هما راخرين زى الزفت ودماغهم على قدهم وما حدش حيفيد براى ولا اى حاجة وكانوا عرفوا يفيدوها مع المشاكل اللى كانت مع ابويا الله يرحمة بقى

 

 

انما انا ذنبى اية ؟؟ انا اشيل ذنب اختيارها الغلط لابويا وسلبية جدى واخواتها لية ؟؟ 
انا ابقى العضاضة اللى كل ما تتخنق تعض فيها شوية لية ؟
هل دا قدرى وحكمل طول عمرى كدا

 

 

 
انا مش عارف اعمل معاها اية ولا اتصرف ازاى

 

ومش لاقى حد افضفض او اثق فية غير حضرتك

وانا اسف جدا على الازعاج

—————————————————————-—-

 أنا عارفة ان ردى مش هيريحك و لا هيحل المشكلة لكن ممكن يساعدك تفهم هى ليه بتعمل كدة

 

كل انسان مننا من حقه يمر بمرحلة طفولة
و بعدين مرحلة مراهقة
و بعدين مرحلة تخبط شباب
و بعدين مرحلة نضج
و بعدين مرحلة عطاء
و بعدين مرحلة خوف و فزع من التقدم بالسن

 

لو مامتك فاتتها اى مرحلة من اللى فى الأول هتصيبها فى مرحلة تانية

 

عشان كدة بنسمع عن ناس بتلعب بلعب الأطفال
أو ناس بتراهق
أو ناس بتتخبط

 

و انا بيتهيء لى انها اتحرمت من مراحل كتير بسبب المجتمع و بسبب جوازها من باباك

 

دلوقتى كمان هى أرملة
و أم لشاب زى الورد

 

 

هى خايفة
خايفة من العمر و السكينة و الزمن و العجز و الوحدة

 

هى بتحاول تتمسك بأخر كام سنة شباب

لأن بعد كدة خريف

أنا مش ببرر تصرفاتها

انا عايزاك تتعامل معها و كأنها بنتك

 

القسوة هتجيب نتيجة عكسية
الاهمال هجيب مصايب

 

لازم تخليك جنبها و تشور عليها و تبقى مركز معها لترتبط بحد غلط

و فى نفس الوقت انت كمان ماتهملش صحابك و حياتك

و الا هتبقى راجل عنده 35 و لا 40 سنة و بيتصرف و لا كأنه طالب فى أولى جامعة

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”