fbpx
مونتيسوري مصر- تقدمها مروة رخا

Montessori Egypt Diplomas – شهادات المونتيسوري في مصر

Montessori Egypt Diplomas - شهادات المونتيسوري في مصر
Montessori Egypt Diplomas - شهادات المونتيسوري في مصر

يسعد صباحكم ويحلي أيامكم ☀️

في سؤال متكرر بيجيلي بصور مختلفة عن الشهادات المعتمدة. هجاوب بالتفصيل.
أولاً: هل أنا - مروة رخا - بقدم شهادة معتمدة أو شهادة حضور في كورساتي؟
الإجابة: لأ!

ليه؟ علشان أنا مش جهة اعتماد. مش معنى أن أنا درست وأخدت دبلومات دولية أن دا يديني صلاحية لتقديم أي شهادات في كورساتي.

علشان أنا مش نصابة. دي هتكون حتة ورقة لا قيمة لها في أي حضانة مونتيسوري أو مدرسة مونتيسوري.

علشان أنا كورساتي أونلاين فمافيش ضمان للحضور ... مش معنى أن واحدة اشتركت أنها اتفرجت ومش معنى أنها اتفرجت أنها فهمت واستوعبت ومش معنى أنها استوعبت أنها طبقت ... الورقة لا قيمة لها.

فيديو: إيه الكورس المناسب؟ نختار إزاي؟

أنا بقدم العلم من أجل العلم. اللي عاوزة تفهم وتتعلم بجد علشان تطبق صح أهلاً وسهلاً.

ثانياً: السؤال اللي وراه بيكون استفسار عن ناس/ منظمات/ مؤسسات بيقدموا شهادات وبيقولوا أنها معتمدة.

إجابتي: علشان تعرفي الشهادات دي معتمدة بجد ولا لأ هتعملي اختبار صغير. 
* هتكتبي قائمة قصيرة بالأماكن اللي عاوزة تشتغلي فيها. 
* هتدوري على تليفونهم أو صفحتهم أو عنوانهم وتتواصلي معهم. 
* هتسأليهم لو شهادة مركز كذا كذا كذا مقبولة عندهم؟ معترف بيها عندهم؟ لو أخديها هتشتغلي؟ 
كدة تقللي فرص النصب والضحك على الدقون ويا ريت تنشري الرد علشان اللي ما يعرفش يعرف.

ثالثاً: سؤال متكرر عن الشهادات الدولية المعتمدة.

الإجابة إن في كتير وإن أنا مش عارفاهم كلهم. أنا أعرف اللي أنا درسته واللي سمعت عنه من الزميلات. الثلاثة اللي أعرفهم عن ثقة - وهكتبهم بترتيب اعتمادهم دولياً:

AMI

MEPI

NAMC

أخر واحدة دي هي جهة اعتماد كل دبلوماتي. هل معنى كدة أنها وحشة ولا واقعة؟ الإجابة لأ. من أهم أولوياتي في اختيار الدبلومة اللي هدرسها أنها تكون أونلاين. ظروفي وظروفي بيتي وظروف ابني لا تسمح بالحضور المباشر ولا تسمح بالتدريب في الحضانات. دبلومات NAMC هايلة لكن في حضانات ومدارس مش بتعترف بيها لأنها أونلاين وبما أن أنا مش عاوزة أشتغل في حضانة أو مدرسة، النقطة دي كانت مش مهمة بالنسبة لي. المهم أونلاين وجودة عالية وأنا متحكمة في وقتي.

طبعاً الدبلومات الدولية دي غالية جداً جداً جداً وإجادة اللغة الإنجليزية شرط أساسي.

رابعاً: هل لو أخدت دبلومة دولية من دول هقدر أشتغل في مكان كويس؟

الإجابة: أي كانت الدبلومة هتبتدي السلم من أوله ... مش هتكوني مديرة ولا مدرسة أساسية أو أولى في الفصل. كمان في حضانات ومدارس بتطلب شهادات أخرى بالإضافة للمونتيسوري ... علشان كدة مهم تتواصلي مع عدد من الأماكن اللي نفسك تشتغلي فيها وتعرفي طلباتهم إيه من شهادات تربوية أخرى.

أخيراً: هل لو درست دبلومة دولية هكون مدربة؟

الإجابة: مش شرط.

الدبلومات الدولية هتفهمك المونتيسوري وتعلمك تطبقيه. يعني هم هدفهم تتخرجي من عندهم بتعرفي تشتغلي مع الأطفال وتعلميهم. ماحدش منهم هيديلك شهادة تانية بأنك قادرة على الشرح للكبار أو تقديم كورسات.

طيب أنا بعمل دا إزاي؟

أنا بعمل دا لأن أنا كنت أستاذة في الجامعة الأمريكية في قسم تعليم الكبار من 2005 إلى 2011 وكنت مدربة حرة في أكثر من شركة استشارات تدريبية في نفس الفترة ورجعت للتدريب تاني في 2013.

يعني أنا مدربة ومعلمة للكبار من زمان ودا مالهوش دعوة بالمونتيسوري ولا الدبلومات اللي أخدتها.
ملحوظة: اللي عازوة تعرف اسم أي جهة من الجهات الدولية أو تفاصيل عن دبلوماتهم تسأل جوجل ... جوجل ماقصرش معانا في حاجة.

دبلومات المونتيسوري التي حصلت عليها:
دبلومة المونتيسوري من الميلاد حتى ثلاث سنوات
دبلومة المونتيسوري للطفولة المبكرة من ثلاث إلى ست سنوات
دبلومة المونتيسوري للمرحلة الابتدائية من ست إلى تسع سنوات
دبلومة المونتيسوري للمرحلة الابتدائية من تسعة إلى اثني عشر عام – كلهم من مركز "أمريكا الشمالية للمونتيسوري" North American Montessori Center.
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”