Time4Learning - تجربتنا هحكيلكم بالتفصيل عن تجربتنا مع منصة تعليمية باللغة الإنجليزية اسمها: Time4Learning مقدمة للناس اللي مش متابعة: في الفيديو دا أنا اتكلمت بالتفصيل عن تجربة التعليم المنزلي وأني وصلت لمرحلة أني بدور على مدرسة للمرحلة الإعدادية أونلاين معتمدة في أمريكا. وفي المقال دا حددت المعايير وكتبت قائمة بالمدارس – طلعوا كتير جداً – وكتبت تقييم مبدئي عن كل مدرسة منهم. السؤال: إيه اللي ودانا منصة تايم فور ليرنينج وهي مش مطابقة للمعاير اللي في البوست ولا مطابقة لأهداف المرحلة اللي في الفيديو؟ الإجابة: أثناء رحلة البحث عن مدرسة إعدادية، كان مهم جداً بالنسبة ليا الاطلاع على ملف كل مدرسة عن الكورسات المتاحة والمنهج الخاص بكل كورس وكمان نماذج من الفيديوهات. كانت النتيجة أني بدل ما أتشجع وأتحمس جالي هلع وخوف وكأن في زلزال في مخي. ليه؟ لأن آدم هيفشل! ليه؟ لأنه مش مستعد! إيه بالظبط اللي خوفني؟ 1- احنا ما اشتغلناش أي حاجة تخص تاريخ أو جغرافيا أمريكا ... دول أساسي في منهج المرحلة الإعدادية. 2- في فجوات كتير في منهج الرياضيات. وفي شغل كتير في المواد الأخرى اشتغلناه بشكل غير أكاديمي. يعني فاهمه لكن ما يعرفش مثلاً يشرحه أو يلخصه أو يحل عليه أسئلة. 3- منهج اللغة الإنجليزية متطور جداً من حيث قراءة القصص والمسرحيات والنقد والتحليل وكتابة المقالات وغيره! 4- آدم عمره ما امتحن ... محنة الدرجات والنجاح والسقوط والفشل والكلام دا ضد مبادئي أصلاً بالنسبة لطفل أقل من 10 أو 11 سنة. ليه أعرضه للمشاعر السلبية دي تجاه نفسه؟ العمر الطويل المديد له ... يتعلم ويغلط ويتعلم ويصحح نفسه ... دا كمان من مبادئ المونتيسوري. 5- آدم متعود عل التعليم الأونلاين حقيقي لكن فيديوهات كاملة لمناهج كاملة لعام دراسي كامل كلها بالإنجليزي – رعب. هيستوعب؟ دا كفاية أن المفاهيم كلها هتكون جديدة عليه! هسيب نفسي كدة مخضوضة؟ لأ طبعاً لازم مرحلة انتقالية ... أنا جبت سيرة الموضوع دا في الفيديو. السؤال كان هنعمل إيه في المرحلة الانتقالية دي؟ هل من المنطقي أني أختار مدرسة من أم 2000 أو 3000 دولار في السنة علشان المرحلة الانتقالية؟ لأ ... أكيد لأ! افتكرت رسالة من أم جميلة بعد الفيديو لما رشحت لي منصة Time4Learning وقتها أنا رفضت المنصة لأنها غير معتمدة ... لكن بعد الرغي اللي فوق دا كله رجعت تاني وفحصت المنصة. اكتشفت أن المنصة دي هي الحل في المرحلة الانتقالية! ليه؟ أولاً: الاشتراك في الشهر ب25 دولار ... مش تعويرة كبيرة .... دي أرخص من دروس آدم هنا في مصر في الشهر الواحد في اللغة العربية لوحدها – مثلاً يعني! ثانياً: الاشتراك دا مش لمادة واحدة في الشهر ... دا لكل المواد! * الرياضيات (حساب وكسور وهندسة والذي منه) * المواد الاجتماعية (تاريخ وجغرافيا والذي منه) * علوم (علم نبات وعلم حيوان وفضاء وطاقة ومادة وكدة) * اللغة الإنجليزية (قراءة وكتابة وتحليل ونقد وبحث وفهم ونحو وكله كله) * امتدادات اللغة الإنجليزية (دا قسم زيادة للي عاوز مهارات أكثر في اللغة) ثالثاً: متاح تعلم لغات تانية بحوالي 60 دولار لمدة 6 أشهر ... يعني 10 دولار زيادة في الشهر للغة الثانية و10 كمان للغة الثالثة وكل واحد واحتياجاته. بالنسبة لينا، احنا مكتفيين باللغات اللي عندنا ومش عاوزة آدم يتلخبط فما اشتركناش. رابعاً: متاح التنقل بين الأعوام الدراسية بنفس الاشتراك. يعني إيه؟ حكيت لكم أن من أسباب هلعي وجود فجوات تعليمية عند آدم. لما اشتركت في المنصة اخترت أحط آدم في سنة رابعة وهو أصلاً في سنة خامسة. كان لازم أرجع لورا علشان جودة التعليم (مبدأ تاني مهم جداً عندي). المنصة بقى فاتحة قدامي منهج رابعة (اللي أنا اختارته) ومنهج تالتة لو لقيت حاجة واقعة مني في رابعة ومنهج خامسة لو لقيت أنه سابق في حاجات معينة. كل دا بنفس الاشتراك الشهري. خامساً: متاح منظم جدول إلكتروني. يعني أنا بقول أنا عاوزة أخلص منهج رابعة دا في مدة زمنية قد إيه وبختار المواد اللي عاوزة أخلصها في المدة دي وهم بيحطوا الدروس والامتحانات في جدول وفقاً للمواعيد اللي حددتها. أنا بقى بدخل على الخطة وأوزعها على أيام الأسبوع براحتي. سادساً: في اختبارات داخل الدروس واختبارات بعد كل درس واختبارات بعد كل وحدة. الميزة أن آدم بيعرف مستواه ومعاه فرص لا نهائية لإعادة الاختبار لتحسين درجاته وزيادة عمق الفهم والتحصيل. أنا بحدد إيه الدرجات المقبولة عندي في كل مادة ... 70%؟ 80%؟ 90%؟ 95%؟ 100%؟ سابعاً: أنا متابعة كل حاجة من خلال الجزء الخاص بالأهل على المنصة. ممكن عادي بعد كام شهر أختار حاجات قديمة يمتحن فيها من باب المراجعة وتأكيد المعلومة. ثامناً: الفيديوهات والامتحانات بتقدمها منصة تانية اسمها Edgenuity المنصة دي عندهم مدرسة أونلاين معتمدة في أمريكا وفيها كل طلباتي وهتلاقوا اسمها في بوست تقييم المدارس. تواصلت معهم وردوا على كل أسئلتي وشكلي كدة هشترك معهم لما الوقت يجي. بكدة آدم هيكون متعود على نظامهم التعليمي. تاسعاً: في اختيارات في المنصة أنا ما استخدمتهاش زي التقارير أو وجود أكثر من طفل أو ألعاب لتقوية تذكر جداول الجمع والطرح والضرب والقسمة. عاشراً: في منهج التاريخ الدروس مش فيديو وشرح بصوت ... كأنها باوربوينت. صحيح اللغة سهلة لكن بالنسبة لحالة آدم، القراءة الكتير بتقلل من قدرته على الاستيعاب. بعتلهم. ردوا. بعتوا رابط لموقع مجاني بيقرا للطفل. أول لما الطفل يحدد القطعة المطلوب تتقري، الراجل بيقراها. ممكن تختاروا صوت راجل أو ست. نطق أمريكي أو بريطاني. كمان سرعة القراءة. ممكن كمان تدخلوا كلمات أو حروف علشان لما القارئ دا يشوفها في النص، يقراها بطريقة معينة. أنا جربنها مثلاً في: A.D. – Anno Domini اللي هي بعد الميلاد B.C. – Before Christ اللي هي قبل الميلاد أن القارئ يقولها كاملة مش الحروف المختصرة. القارئ دا كمان بيساعد آدم يتعلم ينطق الكلمات الجديدة عليه. أخيراً! Time4learning المنصة دي مناسبة لمين؟ 1- أطفال التعليم المنزلي فوق 10 سنوات. رغم أن المنصة بتقدم دروس كاملة من سن 3 أو 4 سنوات لكن أنا لا أنصح أي أسرة إنها تعمل كدة في ولادها. الطفل من 0-6 محتاج الكثير من اللعب الحر والقليل من الشاشات وبيتعلم من خلال التفاعل والتواصل. المونتيسوري اختيار مناسب للمرحلة دي. طيب الطفل من 6-9 أو 10. مناسب له المنصة لكن بحد أقصى ساعة في اليوم لل6 سنوات و3 ساعات لل10 سنوات. 2- أطفال المدارس اللغات. زي ما شوفتوا، دي أرخص من الدروس الخصوصية بفرق رهيب يعني. 3- المدرسين نفسهم ممكن يستفيدوا من المنصة في تحضير الدروس وقياس الفهم وكدة. نقطة أخيرة: من الجدير بالذكر أن آدم زيه زي أي طفل يعني بيكسل وبيكروت وبيلجأ للفهلوة وأنا لساني دلدل وأنا بقول له عيد الدرس ... عيد الامتحان ... افتح القاموس وشوف معنى الكلمة ... القرف العادي يعني هههههههههههههه
موقع مجاني لتعليم النحو
April 18, 2024
