يا ترى دا إيه؟ 😁 Kefir Grains - حبوب الكيفر لما لمست الحبوب دي لقيتها كدة زي البلي الصغير ومن مادة مطاطية. كان صعب أصدق أن دول كائنات حية. حبوب الكفير كمان كائنات حية زي السكوبي بتاعة الكمبوتشا والسكوبي بتاعة شاي الجن والسكوبي بتاعة خل التفاح اللي في الفيديوهات اللي فاتت. زي ما قلت قبل كدة ان صعب نشوف الكائنات الدقيقة من غير ميكروسكوب لكن سهل نشوف تأثيرها وتفاعلها ... دا اللي اتعلمناه في كورس المونتيسوري الكامل من 9-12 سنة. الكائنات الدقيقة الضارة هي اللي بتسبب الأمراض ... لما نتعرف على الكائنات الدقيقة النافعة هنقدر نحمي نفسنا من الكائنات الدقيقة الضارة (منهج الصحة العامة من 9-12) في الفيديو ... أنا بدل ما أعمل مشروب الكيفر باللبن (كله بكتريا نافعة للجسم والأمعاء) عملت جبنة .. جبنة بالبكتريا النافعة - بروبايوتكس - probiotics! لما فتحت البرطمان استخدمت معلقة من الصيني علشان أشيل حبوب الكيفر من على الوش لإعادة استخدامها. دلقت اللبن المتخثر في وعاء زجاجي متغطي بفانلة قطن (طبعاً كل حاجة نضيفة وإلا هيحصل تلوث والبكتريا الضارة هتهجم وكل حاجة هتترمي) ربطت الفانلة وعلقتها وسيبتها لتاني يوم ... بقت جبنة 🙂 اللي نزل منها دا شرش ... كله برده بكتريا نافعة. ممكن أستخدمه في تخليل الخيار أو الجزر أو الكرنب مثلاً. ممكن كمان أسقي بيه الزرع وممكن أستخدمه كصوص للسلطة. مافيش حاجة بتترمي 🙂 علشان أعيد استخدام حبوب الكيفر، رجعتها البرطمان وصبيت عليها لبن كامل الدسم (دفيته على النار وسيبته يبرد) وغطيت البرطمان بشاش. لو هيتشرب كمشروب كيفر باللبن ... ممكن بعد 24 ساعة. لو جبنة ... نسيبه أسبوع. التجربة دي اتعلمنا فيها إن في نوع من البكتريا النافعة بتتغذي على اللاكتوز اللي في اللبن وبتحوله لحاجة شبه الزبادي وممكن يتحول لجبنة. ريحة حبوب الكيفر شبه ريحة الخميرة الطازة 🙂 اتعلمنا كمان إن بعض الكائنات الدقيقة محتاجة سكر (في الحالة دي اللاكتوز هو السكر) ومكان مظلم ودرجة حرارة معينة (الكيفر بيحب الحرارة المعتدلة)
تجربتنا: التعليم المنزلي في مصر – Homeschooling in Egypt
April 18, 2024
