هاي أ. مروة ،
أنا عندي 24 سنة … مشكلتي يمكن تكوني سمعتيها كتييييير .. و جاوبتي عليها أكتر … و الفكرة عندي في حاجة… لما تبقي عارفة الحل بس مش عارفة تنفذيه !!!
مقدما بس.. أنا عارفة إن سنّي مش كبير أبدا … أنا كل مشكلتي إني في سنّي ده – هههههههه- و عمري ما حد قاللي أنا معجب بيكي أو بحبك أو أي حاجة !!!
محدش معبرني خالص !!!!!!! هوا … كأني هوا بالظبط !!!
الفكرة دايما اني باصة للي ناقصني … دايما حواري مع نفسي سلبي … اقعد اقول أكيد عشان مليانة شوية … طب يمكن عشان عندي تحدي في كلامي حبة ؟ … طب يمكن لازم استرق شوية و أنا بتكلم ؟ … مع اني لو تسأليني أقولك إني شايفة انه اصلا مش شرف ليا يعني اني ارتبط بواحد لمجرد ان شكلي عاجبه !!! … انا اجتماعيا متوسطة … معيدة في كلية كويسة … متوسطة في كل حاجة… بس اللي أنا اكيدة منه اني لما بتكلم مع حدّ ولد أو بنت.. لازم يقولي انتي مختلفة… دماغك مش تقليدية … كلام من ده… إنما لما يحب يرتبط بواحدة مهما كان مستواه الثقافي … بيدور عالحلوة الفاضية اللي يتباهي بيها … وميعرفونيش إلا لو عندهم مشكله و عاوزين حلول …
مش عارفة بجد بس أنا اتخنقت … اتخنقت فعلا… هو الغلط فين ؟؟؟
أنا ساعات برد علي نفسي بس مش مقتنعة بردّي !! … رأيك حضرتك ايه؟ أنا مهتمة اني اسمعه و مستنية ردّك علي أحر من الجمر 🙂
______________________
شوفى يا مشمشة
اولا … انتى لما بتبصى فى المرايا بتشوفى ايه؟
لو بتشوفى واحدة تخينة و متوسطة فى كل حاجة … هو دا بالظبط اللى الرجالة هيشوفوه
لكن لو بتبصى تشوفى اميرة الاميرات اللى تستاهل احسن راجل فى الدنيا هما كمان هيشوفوا كدة
الناس هتشوفك بعنيكى يا حبيبتى
و فى نقطة تانية – مجازا يعنى
البنات زى المحلات
فى محل شيك فى مكان راقى هتلاقى اللى بيدخله الناس الراقية و الناس اللى نص نص هتخاف تقرب منه
و فى محل شيك فى مكان شعبى هتلاقى الناس الراقية مش شايفاه و الناس الشعبية خايفة تدخله
و فى محل بلدى فى مكان راقى لا اللى فوق دخلوه و لا اللى تحت شافوه
انتى بقى يا اما محل راقى وسط ناس بلدى
يا اما محل راقى و الناس الراقية مش لاقياه
من الاخر
حطى نفسك فى الاماكن اللى ينفع يجيلك منها عرسان و تقبلى منها عرسان
