جزء خاص من الدنيا خيارة بمناسبة ثورة 25 يناير
حسنى مبارك: الخيارة كانت فى إيدى و مش عارف راحت فين
استيقظ الرئيس المخلوع محمد حسنى مبارك صباح السبت 12 فبراير 2011 بعد ثبات عميق دام لأكثر من ثلاثين عاما و أدرك أن الخيارة لم تعد فى يده! وقف أمام الشعب فى بيجامته الحريرية و بدأ يخطب خطاب "البحث عن الخيارة":
شعبى العزيز … أولادى و بناتى،
كدة برده؟
هنت عليكم؟
دا أنا بابا حسنى!
أنا مش عارف انتم زعلانين ليه؟
فلوسكم اللى بتقولوا انى سرقتها كنت بحوشها لكم معايا! أنا عارف انكم كنتم هتصرفوها فى كلام فاضى! الحق عليا؟ أنا استثمرتها و كبرتها لحد ما بقى عندى مليارات كتيرة … و كنت ناوى أرجعها لكم لما تكبروا و تعرفوا تمسكوا فلوس!
الفساد؟ فساد إيه بس؟ كلها إشاعات و حقد طبقى. و ربنا قال … ما معناه يعنى … انه خلقنا طبقات فوق بعض! بتبصوا فى فلوس و عربيات و بيوت غيركم ليه بس؟ أنا ربيتكم على كدة؟
التعذيب؟ لأ بجد مالكوش حق؟ هو مش الأب من حقه يأدب ولاده لما يغلطوا! أهو اللى كان بيغلط كنا بنأدبه. و اللى ماتوا من التعذيب دول عمرهم الافتراضى كدة! هنتدخل فى قضا ربنا يعنى؟ هما تلاقيهم كانوا عيانين أصلا و بدل ما يقرفونا علاج و مستشفيات جبنا أجلهم بدرى بدرى!
الديمقراطية؟ أنا قلت لكم مليون مرة قبل كدة بلاش تتكلموا زى الكبار و انتم مش فاهمين حاجة! كل ما تسمعوا حاجة هنا و لا هنا ترددوها كدة زى البغبغان! الكلمات الكبيرة دى مش مناسبة ليكم و لا لسنكم و لا لخبرتكم و لا لأعصابكم! فى فرق بين الديمقراطية و الفوضى! و بعدين الديمقراطية دى كفر! هو مش ربنا أمركم تطيعوا ولى الأمر … إيه بقى؟ هتعصوا ربنا كمان؟ و بعدين ما فى مجلس شورى … مش مجلس الشورى دا بتاع ما خاب من استشار؟
حرية؟ ما انتوا فعلا كنتم أحرار … اللى عايز يولع فى نفسه سيبناه و اللى عايز يهاجر سيبناه و اللى عايز يشنق نفسه على كوبرى سيبناه و اللى عايز يمشى يكلم نفسه فى الشارع برده سيبناه … إيه الجحود اللى انتم فيه دا؟
الغرقانين فى العبارة و مراكب الهجرة الغير شرعية، و المحروقين فى القطارات و مراكز الثقافة، و المدفونين تحت أنقاض العمارات و الصخور، و اللى ماتوا من الضرب فى المدارس و من الرعاية الصحية فى المستشفيات، و اللى ماتوا فى انفجارات الكنايس و ضربات الارهابيين المختلين عقليا … كلهم شهداء! كلهم عند ربهم شهداء! حد يطول؟ دا الشهداء دول هيدعوا لكم و هتدخلوا الجنة على حسهم!
الجعانين؟ و أنا مالى و مال الجعانين؟ اللى شايف واحد جعان يمد إيده فى جيبه و يأكله بدل ما يطلب منى انى أخد من قوت عيالى و أديله. و بعدين انتوا بجد شعب كل همه على بطنه .. فين الصبر و ترويض النفس و الصيام؟ أجيب لكم منين 3 مليون رغيف عيش كل يوم؟ ساحر أنا؟
المكتئبين بسبب البطالة؟ أفهمكم ازاى بس؟ المكتئبين دول مولودين كدة! جم الدنيا بخلل جينى فى مخهم خلاهم مكتئبين! نصيبهم! فى منهم بيكتئب و ينطوى على نفسه و دول طبعا مكانهم فى البيت و مش ممكن يشتغلوا! و فى منهم بيكتئب لحد ما يتجنن و يبتدى يقتل و يخرب و دول بيدخلوا السجن! انتوا بجد فاهمين غلط! فرص العمل فى كل حته بس هما اللى لا يصلحوا للعمل!
المتحرشين بسبب عدم القدرة على الزواج و الحالة الاقتصادية؟ ما انتوا لو بتابعوا البرامج اللى التليفزيون ميزانيته رايحة عليها كنتم عرفتوا ان اللى بيتحرش دا بيتحرش لأن البنات قلعت ملط فى الشارع! لو البنات قعدوا فى بيتهم الشباب مش هيلاقوا حد يتحرشوا بيه أصلا!
جودة التعليم؟ جودة الرعاية الصحية؟ جودة الخدمات؟ دا كلام انشا .. معلش اعذرونى يعنى بس احنا عارفين ان الغالى تمنه فيه و ان اللى ما معهوش ما يلزمهوش و كل برغوت على قد دمه و على قد لحافك مد رجليك! أظن الرد واضح!
انتوا هزقتونى قدام اللى يسوا و اللى ما يسواش و خليتوا رقبتى قد السمسمة! و عقابا ليكم … أنا ماشى و مش هتطولوا مليم واحد من ثروتى يا كلاب! و اللى يلاقى الخيارة يبقى يقول لى هى فين .. عيب كدة!
لقراءة الدنيا خيارة الأصلى اضغط هنا
2 Responses