fbpx
مونتيسوري مصر- تقدمها مروة رخا

رشا خليفة تحاور مروة رخا: الناس و مشاكلها العاطفية

قاعدة صحاب ….مع رشا خليفة …أول لقاء مع الجميلة ….مروة رخا

مروة رخا……المثيرة للجدل ؟؟؟؟؟
ليه يا مروة حواليكي علامات استفهام كتير…؟؟؟؟
ليه كله بيسأل هي ليه متجوزتش…ليه عايشه لوحدها …ليه عملت نشر الكتروني؟؟؟؟
مروة ….انتي ليه؟؟؟؟؟

مثيرة للجدل لأنى واضحة ؟
لأنى عارفة انا عايزة ايه؟
لأنى مش بخاف غير من اللى خلقنى؟
لأن رزقى مش بإيد حد؟
لأن صورتى فى مرايتى قدام نفسى اهم حاجة عندى؟
لأنى فاض بيا من الزيف و النفاق و الازدواجية اللى دفنا تحتها آدميتنا؟
مش عارفة يا رشا .. مش عارفة انا ليه مثيرة للجدل؟

ليه ماتجوزتش؟ ….

لانى بقيت عاملة زى سوبرمان … عندى
x-ray vision
هو كان بيشوف اللى تحت الهدوم و انا باشوف اللى ورا الكلام و بين السطور و جوا القلوب و
زناخة العقول … اللى فتح ما ينفعش يعيش عيشة الاعمى

عايشة لوحدى ليه؟……
ليه لأ؟ انا استقليت و انا عندى 28 سنة .. يعنى شحطة و باشتغل و باصرف على نفسى .. و لا هو لازم راجل يأوينى؟

ليه عملت نشر اليكترونى؟ ………..
انا ما كنش قصدى .. انا لما رفعت كتابى على موقعى كان موقف شخصى من دور النشر … لقيت ناس تانية طلعان عينها فنشرت لهم … و الموضوع كبر و لسة هيكبر … انا موتى و سمى الاستغلال و القهر

انا ليه؟…..

أهو اللى حصل

مروة …..حتي لو الواحد عاش 100 سنه …بيكون فيه لحظة بيعتبرها دي اللي اتولد فيها …..
مروة …انتي اتولدتي امتي؟؟؟؟؟و عندك كام سنة؟؟؟؟؟

اتولدت فى يناير 2007

من اول ما اتولدت لحد 1996 كنت ميتة تماما
من 1996 الى 2005 كنت عايشة بس خرساء
من 2005 الى 2007 كنت باتصالح مع نفسى و اتقبل اختلافى و انفصالى عن المجتمع و باربى نفسى من اول و جديد

طيب مروة رخا …”مستشارة علاقات عاطفية ”
المسمي دا انتشر شوية الفتره الاخيرة …….يعني ايه؟؟؟ ….و ايه رايك في الناس الي بتهاجم المسمي دا علي اعتبار انه شغلة الي ملوش شغلانة؟؟؟؟؟

فعلا دا لقب ما لهوش لازمة و لا معنى
زيه زى التنمية البشرية و الـ مش عارفة ايه النفسية و الايحاء و باولو كوهيلو و الذى منه

انا باتكلم بجد مش باتريق

رشا احنا كل الاجابات جوانا … كل حلول مشاكلنا بدايتها و نهايتها جوانا
لكن احنا وصلنا لمرحلة من تضليل الذات عجز معها عقلنا و قلبنا عن التعامل مع كل حاجة و اى حاجة
كدبنا و صدقنا كدبنا و كفرنا بالعقل و المنطق و مشينا ورا الخرافات و ردمنا على فطرتنا بالنيلة الكحلى لحد ما تهنا من نفسنا

انا عمر ما حد بعت لى مشكلة و حليتها من دماغى .. انا كل ردودى على الناس من كلامهم .. انا باطلع الابرة من كومة القش اللى هما عملوها

نتكلم عن المشاكل الي بتجيلك ….. الي بيبعتلك مشكلة يا مروة ….بيتخيل ان معاكي العصاية السحرية …جلا جلا …المشكلة تتحل …لما بتقف قدامك مشكلة صعبة …و مش عارفه تحليها ؟؟؟؟ بتحسي بايه؟؟؟؟؟

بامسح بصاحبها او صاحبتها الارض … بلطافة يعنى
اصل هما اللى عقدوها و بعد ما اتعقدت و اتنيلت و اتقفلت من كل ناحية مطلوب منى اقول لهم ايه؟ يا هنضحى بالام يا هنضحى بالجنين

ست عيانة و صحتها على قدها تحمل ليه؟
راجل مش عايز خلف ما عملش حسابه ليه؟
ست حامل مش بتابع مع دكتور ليه؟
واحد مراته على وش ولادة ما حوش فلوس ليه؟
التاريخ و الاشارات بتقول ان الجنين مش مظبوط بنكمل فى الحمل ليه؟
قررنا نخلف … ما قريناش عن الاطفال و تربيتهم ليه؟

قيسى بقى على كل حاجة

نيجي للسؤال المهم ….ايه اكتر مشكله بين الشباب خنأكي و حاسه انها بقت ظاهره …و لازم وقفة …كفايه كده؟؟؟؟

فى الولاد الكسل … كسلان يذاكر و يتخرج … كسلان يتعلم .. كسلان يشتغل … كسلان يثبت للبنت حبه بجد مش كلام و خلاص … كسلان يهتم بيها و يشيل مسئولية … كسلان يقف على رجليه و يمشى مشوار لحد الحيطة – على رأى عمر طاهر

كسلان … مطفى … مقرف

البنات بقى … الغباء .. اه والله .. انا اسفة انى باقول كدة … بس انا مش عارفة ليه فى بنات كتير بتتغابى و مصرة تشم “قفا” القرد

لما سمعت أسم الكتاب بتاعك ….ابتسمت ابتسامة عريضه ….
الدنيا خيارة ….دا أسم الكتاب …..اشمعني خياره يعني ؟؟؟
ليه ميكونش خس – جزر- طماطم ؟؟؟؟ايه الحكاية ؟؟؟؟
و ايه موضوع فوبيا الكتابة بالعربي دا؟؟؟؟ خايفة تكتبي بالعربي ليه؟؟؟؟

لأ الخيارة دى ليها معزة ولد الولد … السؤال دا هرد عليه فى الكتاب

هى مش فوبيا
انا ما كنتش باعرف اكتب بالعربى .. خالص
لا باعرف استهجى و لا باعرف اشوف الحروف و لا باعرف حتى اعبر عن افكارى

فى مرحلة فى حياتى حصل حاجز نفسى و بينى و بين العربى
الحاجز دا بقى اتهد بفضل حاجتين
اولا مشاكل الناس … كان شكلى هيبقى تنك اوى و انا بارد بالانجليزى
ثانيا الهجوم عليا … كان لازم ادافع عن نفسى … و ردحت بالبلدى بنت سلطح بابا

و خلصت قاعدة انهارده ……. بس الكلام مخلصش …..شهرزاد لسه عندها حكايات ….استنوني الجمعة الجاية ….و مفاجأة …..محدش يتوقعها ….
رشا خليفة

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”