اختى واكلة الجو منى

Date posted: March 17, 2010


 
 
 
انا ليا اختى اكبر منى بثلاث سنين وانا بحبها جدا بس مشكلتى كلها فى ان لما انا و هى بنقعد فى قعده بتاكل الجو بهزرها و ضحكها وانا مش عارفه ايه اللى بيحصلى مش بقدر اقول حرف واحد..انا لما ببقى موجوده فى مكان بدون اختى بعرف اتكلم واهزر بس لما اختى بتبقى معايا مش بعرف انطق بكلمه وكل الناس بتبقى مهتمه بيها , و انا كاننى خيال قاعد.مره قولت بينى و بين نفسى ان الموضوع ده لازم اتغلب عليه و كنا قاعدين مع جماعه قرايبنا وكانت اختى كالعاده بتتكلم و بتضحك رحت انا دخلت فى الحوار و حولت اتكلم بس ماعرفتش اجاريها فى الكلام بالاضافه الى ان انا استتقلت دمى قوي..مع العلم انى انا و اختى شكل بعض جدا و يمكن انا احلى منها شويه يعنى مفيش مجال للغيره منها و الحمد لله ثقتى بنفسى مش مهزوزه ولا حاجه …. من فضلك انصحينى اتصرف ازاى و بكرر تانى انا و اختى بنحب بعض جدا و علاقتنا ببعض الحمد لله زى الفل ……Merci

________________________

انتى مشكلتك انك عايزة تنافسى اختك على ارضها

هديلك مثل

فى عالم معاجين الاسنان

 

معجون سينسوداين معروف انه بتاع الاسنان الحساسة
معجون كلوس اب معروف انه بتاع النفس المنعش
معجون سيجنال بتاع التسوس

 

كل معجون حدد ارضه و المنطقة اللى بينافس فيها

لو معجون جديد دخل السوق و حاول ينافس على ارض غيره هيتاكل

انتى بتعملى الغلطة دى

اختك ارضها الكلام و الهزار

 

انتى بقى ارضك ايه؟ 
ايه اللى عندك مش عندها؟
ايه اللى ممكن تتفردى بيه؟
Bookmark and Share