اتجوز ازاى؟

Date posted: March 17, 2010


 
 
 
عزيزتي مروة

أولا أحب أحييكي على مجهوداتك الرائعة و اتمنى لك كل التوفيق .. انا اول مروة ارسل لشخص ما عن مشكلة لي و الحقيقة لانها بتؤرقني أتمنى انك تشركيني فيها, اولا انا أبلغ من العمر 28 سنة اتربيت في بيت متزن مثقف والدي انسان مكافح و عصامي جدا و متميز و والدتي مثقفة و و حكيمة و صديقتي, المشكلة ان انا و اخويا طلعنا اصتدمنا مع المجتمع من صغرنا في الاخلاق الي اتريبنا عليها في بيتنا في المدرسة و الجامعة و الشغل و الجيران و نادر ما بنشوف حد زينا انا و اخويا ما كناش من النوع الي بيصاحب و الان احنا الي التنين اتخرجنا و بنشتغل و لكن مش مرطبطين و العمر بيجري و بشوف اصدقائي زمايلي بيرطبتوا و احنا زي ما احنا ما بتغيرش الحقيقة انا بيجيلي عرسان بس فيهم عيوب لا استطيع التغاضي عنها مثلا سمين فوق ال100 كيلو يعني من اولها ما فيش صحة أو مستوى اجتماعي أقل و الحقيقة انا من عيلة كبيرة و المشكلة كمان ان قراييبنا بعيد عننا انا مامتي من أصل سوري و وأهل والدي في اسكندرية بس مش متصلين معاهم لانهم مدلعين ولادهم اوي لدرحجة قلة الادب و قلة لاحترام الكبير و حصلة مشاكل كتيرة فبعدنا عنهم لاننا مش منسجمين معاهم و بنتصل بيهم في المناسبات و الاعياد فقط فمافيش الجو الاجتماعي الي هو اروح قعد عند عمتي شوية طيب أزور خالتي النهاردة و بنفس الوقت ما قدرش ابلع واحد (ضل راجل و لا ضل حيطة) و الحقيقة انا قريت بعض الحلول ليكي في موقعك لما قولتي ممكن نذهب للاماكن الي فيها فرص لالتقي بشريك حياتي و هو لحل كويس و لكن مواعيد شغلي بتنتهي متأخر و انا بشتغل في شركة مسيحيين و مش لاقية شغل افضل من عملي الان و الحقيقة ما أرقني ان زميلة ليا تركت العمل و هي بتقول لي احنا مقفول علينا هنا في الشركة الي بيجي بيفتكرنا مسيحيين الحقيقة انا بحاول الاقي شغل افضل لتتاح لي معرفة شباب من مستوى افضل و لكن بقالي 3 سنين دون جدوى مع العلم ان كل اصدقائي الي كانو بيصحبوا اتجوزا و شوفت صورهم مع ولادهم على الفيس بوك و بصراحة انا صدقاتي محدودة جدا صديقة واحدة الي برتاح و بخرج معاهاو الان هي مشغولة لانها اتكتب كتابها و انا زي ما انا في شغلي و ما حدش دخل حياتي و شكرا لوقتك هل انا فيا حاجة غلط؟؟؟؟

 

___________________________

 

بصى يا جميلة
 
ما حدش بياخد كل حاجة
 
يعنى انتى لو عايزة تتجوزى لازم تستثمرى شوية وقت و مجهود فى الموضوع دا
 
لازم تضحى بحاجة
 
لازم تخلقى وقت للهوايات و الانشطة لان هى دى الاماكن و الطرق اللى هتقابلى بيها الناس
 
هحكيلك حكاية
 
كان ليا واحدة صاحبتى عندها نفس مشكلتك … و فوق دا و دا كانت ممتلئة القوام
 
و فى يوم كانت على الفيسبوك و لقت جروب مش فاكرة اسمه بينظموا رحلات جوة القاهرة – يعنى اخرهم كام ساعة فى اليوم
 
و انتضمت من باب الفضول
 
و ابتدت توصل لها رسائلهم .. مرة خان الخليلى … مرة ملجأ .. مرة حديقة الأزهر .. مرة ندوة
 
المهم اتشجعت و راحت فى مرة من المرات .. طبعا هى ما تعرفش حد و ما حدش يعرفها
 
لكن اول لما راحت لقيت الناس لطيفة جدا و كلهم كانوا فى يوم من الايام ما يعرفوش بعض
 
و انضمت للشلة دى
 
و بعدين انضمت لجروب تانى بيطلعوا الصحرا
 
و بعدين انضمت لجروب تانى لركوب الدراجات
 
دلوقتى البنت خست .. من النشاط و الحركة المستمرة
و مزاجها بقى عال العال
و اتعرفت على اصدقاء و صديقات
و زادت فرص مقابلتها لواحد بيشاركها نفس اهتماماتها
 
لكن طول ما انتى قاعدة فى المكتب و البيت و قافلة عليكى .. معرفة الناس هتيجى منين؟
 
و
If you do the same thing the same way you get the same results
 
لو عايزة تغيرى حالك لازم تغيرى حياتك
Bookmark and Share