الى كل البنات الموهومة

Date posted: November 18, 2009


هاى مروة ازيك
مروة أنا عندى مشكلة محيرانى بقالها سنة تقريبا و أملى فيكى بعد ربنا سبحانه و تعالى انك تقدرى تساعدينى فى حيرتى دى

الموضوع ان فى شاب معايا فى الكلية أكبر منى بسنتين (هو اتخرج خلاص بس لسه بشوفه فى الكلية) انا اعجبت بيه من سنة تقريبا و الاعجاب اتحول عندى مع الوقت لحب و حسيت اوى ان الاعجاب متبادل، كنا كتير أوى بنبص لبعض من بعيد لبعيد من قبل ما نتعرف على بعض، فضلنا كده شهرين تقريبا لحد ما اتعرفنا على بعض بحكم الظروف لأننا فى كلية عملية، بس معرفة سطحية، بس استغربت انى اوقات لما كنت أجى أكلمه أحسه متوتر و لاحظت انه بيعاملنى بطريقة مختلفة عن اللى بيعامل بيها باقى البنات (سواء يعرفهم كويس او معرفة عادية) يعنى معاهم بيضحك و يتكلم و يبقى على طبيعته

لكن معايا بحسه كلامه قليل و متوتر من ناحيتى أو خايف منى أو زى ما يكون فى حاجز كبير بيننا و أحيانا كان يتجاهلنى وحتى مش يبصلى و أنا واقفة قدامه لكن لما أبقى واقفة بعيد بيفضل يبص لى كتير أوى و لما اشوفه يودى عينه الناحية التانية و بعدين يرجع يبص تانى، و الغريب انه عمره ما كلمنى باسمى، اللى محيرنى أوى و مخلينى مش فاهماه انه أحيانا بلاقيه كويس أوى معايا و يبقى مهتم اوى انه يسلم عليا و يضحك لى و ممكن يحاول يفتح كلام لكن أحيانا تانية بلاقيه العكس تماما من غير اسباب

انا دايما يا مروة بحاول اكون لطيفة معاه عشان اهد الحاجز اللى انا حاساه بيننا ده و من افعالى بحاول ابين له الاهتمام، بس مكدبش عليكى لما كنت احيانا بلاقيه بيصد كده كنت انا كمان ببعد و كانت بتوصل احيانا اننا حتى مش بنسلم على بعض و كنت بفقد الأمل و أقول شكلى بتوهم و مفيش حاجة من ناحيته اصلا لكن لما كان يرجع يعاملنى كويس و نظراته و متابعته المستمرة ليا هى اللى كانت تخلينى ارجع افكر تانى و أقول يمكن الأمور تتغير
عارفة الموضوع أحسن وصف له انه
up and down…up and down

و مش انا لوحدى اللى لاحظت نظراته دى، لكن صاحبتى لاحظتها من غير ما أقولها و ده اللى خلانى أتأكد انى مش بتخيل
أنا من معرفتى بيه لاحظت انه خجول، بس أنا مبقتش عارفة أفسر أفعاله دى هل هى رفض و انه قاصد يصدنى و لا فى اعجاب متبادل لكن هو خجول؟

انا محتارة جدا و نفسى أعرف بيفكر فى ايه من ناحيتى…انا ليل نهار بالى مشغول بالتفكير فى الموضوع ده
ياريت يا مروة تقوليلى اعمل ايه عشان اتأكد من شعوره ناحيتى و ازاى اقدر اتقرب له اكتر و اهد الحاجز اللى بيننا ده…انا بجد بحبه أوى يا مروة و دايما بدعى ربنا انه يجعلنا من نصيب بعض
اسفة لو طولت عليكى و يارب الاقى الحل عندك
________________________________

اهلا يا مشمشة

انا هقول لك كام جملة كدة تحطيهم حلقة فى ودنك فى علاقاتك الجاية كلها

اولا الولد لما بيعجب ببنت بيعرف يتصرف … هيعرف يوصل لها … هيعرف يلفت نظرها .. هيعرف يبقى راجل. انت مش مطلوب منك تفكرى ليكى و له و مش مطلوب منك تسفلتى له الطريق لحد ما يوصل لك. ايوة لازم تديله اشارة خضرا و تشجعيه و انت شجعتى و زيادة … لو هو فعلا معجب بيكى و مش متونس بالنظرات و بس هيتصرف

ثانيا موضوع صاحباتك اخدوا بالهم دا موضوع قديم قوى .. صاحباتك هيشوفوا اللى انت شايفاه … هيشوفوا و يسمعوا بعنيكى لانهم مش سامعين غير من طرف واحد .. لو قلتى عليه زفت هيشوفوه زفت و لو قلتى عليه واقع لشوشته هيقولوا واقع لشوشته

ثالثا مين اللى قال ان الولد لما يتوتر فى كلامه مع البنت يبقى معجب بيها او تبقى هى بالنسبة له غير كل البنات؟ مش يمكن الولد بيتوتر كل ما يشوفك و انطلاقه اللى بتشوفيه مع كل البنات التانية بيروح لانه حاسس انك معجبة بيه و هو مش فى دماغه و مش عايز يضللك؟ يعنى من الاخر تصرفاته دى كأنه بيحاول يفرملك لا تتعلقى به اكتر. يسلم عليكى يشوف اللى يشوفه فى عينيكى يبطل يسلم … و انت تاخدى موقف .. فيحس ان الموضوع لبش … فيتوتر. كل ما يروح فى حتة يلاقى عينيكى و عينين صاحباتك وراه .. لازم يتوتر .. لازم يبقى مش عارف يتكلم معاكى ازاى … فهمتى يا لوزة؟

Bookmark and Share