القطة اللى راحت تتمسح فى بنطلونه و لما جيه يشيلها بخت فيه و هربت

Date posted: November 10, 2009


هاي مروة سوري لو هأخد من وقت وياريت لو مكن تردي عليه بسرعة

أولا أنا عندي 28 سنة والحمد لله متقفة ومتعلمة تعليم عالي ودبلومات وحاجات كتير وشغال في شركة كمبيوتر كبيرة
مشكلتي بتتلخص في اني أخت ل3 ولاد يعني من الآخر تعاملي مع الولاد كلهم واحد كأني واحد منهم وبكون مبسوطة من كدا ولو حسيت للحظة ان حد هيغير التعامل دا أو جواه حاجة تانية في لمح البصر ببعد عنه عمري ما ارتبطت اتخطبت مرة ومش كملت وكنت بعمله بحدود جدا وكان بيحاول كتير يستقز الأنثي فيه علشان أحسسه اني بحبه أو بغير عليه لكن هيهات أنا من النوع اللي مستحيل تأخدي منه غير اللي هو عايزه لو حب بيحب بعبط دا لوووووووووو لكن ممكن في لحظة ابيع كل حاجة وسهل جدا أدوس علي قلبي

المهم حاليا اتقدم لي واحد وحسيت اني مرتاحه له جداااااااااااااااااا فقبل ما يكون فيه مقابلة تانية وصلت لأيميله وكلمته وبعد حوالي 3 أو 4 مرات عرفت بنفسي وهو بيقول ان دا عجب جدا لأنه مكنشي متوقع مني كدا وفعلا بقينا بنتكلم كتير علي النت بس لاني رفضت اكلمه في التليفون ودا ضيقه جدا وطبعا كالعادة ببعده عني بكل الطرق كل ما يحاول يقرب مني أو يقولي أي كلمة أهرب منه وبهرب من أي سؤال عن حقيقة مشاعري تجاه أخر كلامنا كان امبارح فطلب اني احط صورتي علي الميل لأنه نفسه يشوفها فرفضت فقالي من حقي اشوفك قلت له بطريقة مستفزة مين اداك الحق دا وهو كان راجع وقتها من الشغل وكنت عارفه انه فعلا تعبان المهم وصل انه في الأخر قالي اني غبية ومش ممكن أكون انثي من لحم ودم واحساس وسألني تاني أنتي بتحبيني ولا لأ ومش رديت وقفلت

مشكلتي معه أنه شايف الحب مرتبط بانه ممكن محتاج يتكلم شويه عن احساس الرجل بالحب وأنا بقرف جدا من كدا وأكتر حاجة كانت عجباني انه بيحب يكتب شعر بيحب يقرأ ممكن اتكلم معاه في القضايا السياسية في شغله في الأدب في كله الا الحب لو حتي هو اتكلم بسكت ومش برد كتير يقولي سكوتك بيحسسني أن كلامي مش عجبك بقوله لا عجبني بس مش عارفه ارد رغم اني بيني وبين نفسي بقوله كلام كتييييييييييييييير هو يتمني يسمع منه حرف أعمل ايه في نفسي وهل أنا غلطانه في حق نفسي أنا مش عارفه أعمل ايه دلوقتي وخصوصا انه دلوقتي
وطبعا دلوقتي انا متأكدة انه بيتفرج علي أفلام وحاجات من دي بليز مروة ساااااااااااااااااااااااااااااااااااااااعدني

—————————————

مشمشة .. انت بوظتى الدنيا
انت عملتى زى القطة اللى راحت تتمسح فى بنطلونه و لما جيه يشيلها بخت فيه و هربت
انت طبعا غلطانة
اولا ليه قبل ما يكون فيه مقابلة تانية جيبتى ايميله و راسلتيه و تشات و الكلام دا؟ يعنى انت يبقى عندك راجل لحم و دم و دخل البيت من بابه تقومى تعملى كدة؟
الرسالة اللى وصلت له انك من بنات التشات و علاقات النت فالراجل اتعامل معاكى زى ما بيتعامل معاهم
ثانيا ليه جيبتى ايميله؟ ليه ما اخدتيهوش منه و اديتي له ايميلك زى الناس الطبيعية؟ ليه الحوارات؟
ثالثا ليه رفضتى التليفون … هو مش كله فى النور و بعلم اهلك؟ ليه تستخبى ورا شاشة؟
رابعا ليه رفضتى تحطى صورتك .. هو مش شافك و شاف اهلك و لا هو اتقدم لك فين؟
خامسا من كلامك كدة العلاقة دى بقالها بتاع شهر و نص شهرين … فين المقابلة التانية و لا احنا هنقضيها نت؟
سادسا حب ايه اللى هو بيسأل عليه؟ هو انتوا لحقتوا؟
سابعا يا روح قلبى الموضوع دا باظ لأن انت اتحولتى من مشروع عروسة للجواز لبنت لكلام اخر الليل على النت … اى محاولة لاصلاح الموضوع هتورطك اكتر
Bookmark and Share