الولد عداه العيب و قزح لكن نقول ابه فى الناس؟

Date posted: July 10, 2009


 

 

 

اناهحكيلك حكايتى من اولها واحكمى انتى

 

 

انا فى اخر سنه فى كلية الطب وبحب واحده زميلتى
كنت اعرفها من وانا فى سنه اولى بس كنا زمايل فى الكليه زى اى حد ومع انى من اول يوم شوفتها فيه حسيت بحاجه
بتشدنى ليها هى بالذات غير كل البنات اللى اعرفهم فى الكليه بس حبيت اتأكد من مشاعرى والصراحه خوفت احسن متكنش مشاعر صادقه وابقى ظلمتها معايا فسكت واتعاملت معاها عادى وفضلت كاتم الموضوع ده جوايا لحد لما وصلت لسنه تالته كليه وفى الوقت ده كلمتها وفعلا لاقتها برضه كانت معجبه بيا بس كانت شايفه انى مكلمتهاش فى حاجه طول المده ديه فافتكرت ان مفيش حاجه من ناحيتى
وعرفتها ظروفى وقالتلى انها مش هتقدر تكمل معايا غير لما اكلم والدها بس قالت انها هتصبر لحد مانخلص امتحانتنا وفعلا امتحنت والنتيجه طلعت واتصلت بوالدها وقابلته فى مكان بره
وطبعا عشان انا بدرس دلوقت مكنش ينفع اتفق معاه على حاجه
انا كنت رايحله عشان اعرفه بنفسى واتعرف عليه واحسسه وهى انى ناوى خير واعرف هو موافق مبدئيا عليا ولا رافض تماما
المهم الراجل كلمنى كويس جدا وقالى انه معندهوش اى اعتراض عليا بس هو مش هيوافق انها تخطب غير لما تخلص تعليمها والموضوع عدى وطبعا بحكم انها معايا فى نفس الدفعه فتقريبا بشوفها كل يوم وساعات كتير بنركب مع بعض واحنا مروحين
مش عارف ليه المجتمع معترض على علاقه زى دى لو انا كلمتها فى الكليه اصحابها هات يا غمزات وضحك وكلام من تحت لتحت ولو ركبت معاها ناس تبصلى بصه مش اللى هى
وهى لما بتشوف كده بتضايق وبتحصل مشاكل كتير بينا بسبب الحاجات دى
انا من كتر حبى ليها وخوفى انها تفتكر انى ممكن افكر فى حد تانى بقيت بلبس دبله عشان محدش يبصلى من اولها ويعرف انى فى حكم اللى خاطب انا لو عليا اخطبها من دلوقت بس ظروف مجتمعنا وان عليا التزامات لازم اوفيها لازم يوم لما اروح اخطبها ابقى كفيل انى اللبى كل احتاجاتها ومخلهاش محتاجه حاجه وانا فى الدراسه حاولت انى اجمع مبلغ واشتغلت جنب الدراسه عشان لما اتخرج يبقى معايا مبلغ يساعدنى حتى لو فى الخطوبه
هو انا لو حبيت بنت وارتبطت بيها واتفقت معاها انى اول لما اخلص نتجوز دى حاجه تخليهم يعملوا كل ده وانا لاعمرى خرجت معاها ولا حتى عرفت اشوفها فى غير مواعيد الدراسه
هو الحب حاجه وحشه اوى كده عشان الناس تعمل كده

______________________________________

 

انا حسيت بخنقة و انا بقرا كلامك .. بص بقى

انت عداك العيب و قزخ … انت صبرت لحد ما اتأكدت من مشاعرك … و دخلت البيت من بابه زى ولاد الناس المحترمين … و فاهم اللى ليك و اللى عليك …

مجتمع ايه دا اللى انت جاى تقول عليه؟ اللى بيعمل حاجة غلط بيعملها فى الخفا …

و انت كلامك كله لا يتعدى كلام فى الجامعة و فى المواصلات و بعلم ابوها و انت حافظ حدودك … ا

للى بيغمز و يلمز و يتكلم دا بنى آدم فاضى لا له وزن و لا رأى و اللى يدور وراه هيلاقى بلاوى … العلاقات اللى فى الظلمه هى اللى فيها مجال للقيل و القال لكن انت واضح و صريح و دوغرى

و هى المفروض ان كمان سنه هتبقى دكتورة و حياة ناس فى ايدها .. يبقى ليه تصرفات المراهقين و قلة العقل دى؟

انت صح … كلمها بالمنطق كدة و خليها تقرا ردى بس أهم حاجة انك تحافظ عليها و تشيلها فى عينيك

و لو الموضوع انتهى لأى سبب من الأسباب دا لا هو شئ يعيبك و لا يعيبها .. دى اسمها تجارب حياتيه بتساعد على نمو الانسان العاطفى و النفسى و لا هنعيش و نموت شباب و شيوخ بعقلية مراهق عنده 14 سنه؟

Bookmark and Share