مروة انا مشكلتى طويله وملخبطه شويه انا بنت عندى 22 سنه وارتبط بابن خالتى وانا فى اولى ثانوى وكنا بنرتبط ونفركش لحد ماخلصت جامعه السنه دى حوالى مرتين وهو عنده 27 سنه وهو شخصيه جاده ومحترمه وده اللى بحبه فيه اكتر حاجه مع العلم انى مرحه ومش واخداها قفش زى مابيقولوا وهو من القاهرة وانا من محافظه تانيه اول مرة فركشنا فيها كانت انه كان عايز الموضوع ياخد نطاق الجديه وقال لخالتى تقول لماما انهم عايزنى ليه وماما رفضه بدبلوماسيه انى لسه صغيرة لانه كان لسه فى الجامعه ومكنش لسه مستقبله اتحدد مع انى هنا كنت مستعده احارب الدنيا كلها عشانه بس هو خدها مساله كرامه وبعد فابالتالى انا كمان بعدت وبعديها بفترة صغيرة دخلت فى علاقه من النت وانا عارفه ان ده غلط بس كنت مصدومه ولاقيت حد بيطبطب عليا وطبعا العلاقه دى فشلت وهو عرف موضوع النت وكان هيتجنن انى ازاى عملت كده وهو رجع تانى وقالى ادينى فرصه تانيه وفعلا سامحته بس بعد فترة لاقيته بيطلب منى انى اغير فى لبسى وانى البس عبايات او او من منطلق انه بيغير عليا مع العلم انه متدين وكان ايام الجامعه برضه انهى علاقتنا لانه كان شايفها حرام لاكن انا بحكم الكل لبسى مش ضيق بالاضافه انى محجبه وكمان حجمى صغير مايستدعيش اللبس الفضفاض وكده المهم اتناقشنا كتييير ودايما يوصل انك لازما تتغيرى عشانى وتفرحى انى بغير عليكى المهم حاسيت انه مش عايز يتنازل عشانى واتخنقت من القصه كلها وبعدت مع اننا يامروة مهما نبعد مانكرهش بعض ونفصل بين اننا بنحب بعض وبين اننا ولاد خاله .بس ببعد بس بمجرد انه ينزلنا واشوفه كل زكرياتى القديمه تصحى فيا لانه اول حب فى حياتى وكل اللى بحكيه ده حصل على فترات طويله يعنى سنين المهم انا اللى خدت القرار اخر مرة وبعدت وانا حاسه اننا ماننفعش لبعض بس برضه بعديه حاولت ادور على شخص فى نفس مواصفاته الجسمانيه والاخلاقيه معرفش ليه هوكان فى عقلى الباطن احسن حد اللى مفروض اختار على اساسه واخترت زميل ليا وانا عارفه انى واخداه كقصه كملت او مكملتش مش فارقه حتى اما القصه انتهت ولا زعلت ولا فرق معايا المهم انه عايز يرجع وواعدنى انه هيريحنى واللخبطه اللى عنده هو حاسس بيها وعايزنى احتويه بس يامروة انا خايفه لانه بيندم اوى اوى فى البدايه وممكن بعد كده يقلب مع العلم ان رجوعنا المرة دى هتبقى فى اطار خطوبه مش مجرد اتنين متصاحبين ممكن يفركشوا فى اى وقت انا منكرش انى بحبه وعايزاه بس خايفه اندم مع العلم اللى حواليا شايفين انى اقبل لانهم شايفينه انسان كويس وانا كمان شايفاه كده بس مشكلته انه محبكها حبتين وعارفه برضه انه لو ضاع منى مش هلاقى زيه بس محتاجه رايك اوى يا مروة واسفه انى طولت عليكى بس انا قولت احكيلك القصه بكل تفاصيلها وياريت تقوليلى انا كنت برتبط بعده ليه وانا عارفه انى بحبه هو لانى احساسى ده مش فهماه
_______________________________________________________________
اهلا يا مشمشة
الموضوع مش موضوع غيرة .. دا موضوع تدين و اسلوب حياة
قبل ما تقبلى او ترفضى انت محتاجة تعرفى اكتر معلومات ممكنة عن حياتكم مع بعض
هتكون ازاى و مدى تدينه … الموضوع عنده مش يس صلاة و صوم لأ دا منعكس على كل
حاجة حتى لبس شريكة حياته .. انا خايفة يكون متزمت .. علشان كدة انت محتاجة
تسمعى و بعدين تقررى تقبلى او ترفضى
