هل كل الرجالة وحشين؟

Date posted: March 5, 2009


هل كل الرجالة وحشين؟

ده السؤال اللى بـ اتسأله كل ما حد يقرا مقالة مجلة احنا ضل راجل و لا ضل حيطة

ردى 

كل فولة و لها كيال و كل فولة مسوسة لها كيال اعور

كلنا فينا عيوب و لكن … الشاطر اللى يبقى داخل الموضوع و هو عارف عيوبه و عيوب الطرف الاخر

مثلا
أبو العريف ممكن مش يصلح لفلانة لكن علانة اللى بتحبة بتتباهى و تتمنظر بيه قدام الناس

أبو الكتيم ممكن مش ينفع لواحدة لكن عند واحدة من المؤمنين بدارى على شمعتك تقيد هيبقى راجل و لا كل الرجال و تقيل و رزين و ملو هدومه

أبو ريحة ده مش لاقية له حل

الرجل الجزيرة ينفع نوع الستات المدللة اللى مخها فاضى و اللى محتاجة تعتمد على زوجها فى ابسط الامور و دول منهم كتير

الرجال الطاووس ده ينفع البنت اللى بتحب تغيظ و تكيد فى بنات جيلها

عم فرويد ينفع البت اللى غاوية شكوى و تمارض علشان تشد الانتباه دايما

ارنب انرجيزر ينفع اللى عايزة تعيش يومين حلوين و طول ما هو بيرجع البيت مش مهم عمل ايه برة البيت

مدمن الشغل بيعجب الست اللى محتاجة براح و حياة مستقلة تكاد تكون منفصلة ..و اللى عندها تطلعات مادية كبيرة

الطرى هيعجب الست المسترجلة المتسلطة اللى عايزة الكل يمشى على عجين 

الخفيف يعجب الست اللى احتياجاتها العاطفية كبيرة و كتيرة و عمرها ما بتشبع من الاهتمام و الملاحقة

بوذا بيجذب الست التى تنقاد وراء الشعارات البراقة و التى تتمنى ان تعيش فى يوتوبيا بعيدة عن الواقع

ماك جايفر ينفع سعاد حسنى فى فيلم عائلة زيزى .. السبعاوى طه عليه طلب

الزهوق الملول ينفع الست المتجددة المغامرة اللى ممكن تجرب اى حاجة

قاضى القضاه ينفع ضعيفة الشخصية اللى محتاجة ضمير فوق ضميرها و اب فوق ابوها و اخ جنب اخوها و لا تثق فى قدرتها على اتخاذ قرار صائب لوحدها

الرخيص ال"نتن" أو البخيل ال"جلدة معروف انه ينفع الحريصة اللى مش بتحب تنزه نفسها"

كامل الاوصاف: الراجل ده سوقه ماشى فى البلد دى .. اسئلوا كل واحدة بتنضرب و تتهان و تتخان و تستحمل علشان هى حاسة انه كتير عليها و كتر خيره انه بصلها

حبيب ماما … مش جديد علينا ده … و فى بنت مش عندها مانع تتجوز العريس و ماما

المكتئب المتضايق المكسور المجروح ده بقى طلب كتير من البنات اللى مش بتحس بقيمتها الا اذا كانت بتداوى و تعالج و تطيب و تطبطب على حبيبها .. ده اللى بيديها احساس الامان

الكداب تنفعه واحدة مكبرة و مش بتدق على كل حاحة

الزئبق تنفعه الغلبانة اللى على نيتها اللى بتصدق كل الوعود

Bookmark and Share