العريس الرمة

Date posted: September 22, 2010


 

كنت بشتغل وإتعرفت علي صديق ليا حبيته جداً وتركت الشغل وإستمرت علاقتنا بالتليفون

وكان هو من محافظة و انا من محافظة تانية. وكانوا أهله معترضون علي العلاقه وكان مستوايا أعلي منه بمراحل. وأقنعت أهلي بصعوبة برغم خلافي مع عمي وقطعت علاقتي بعمي من أجل حبيبي لإنه كان يريد أن يزوجني من إبن عمتي.

وإخترت حبيبي برغم إني كنت أنا من يتصل به دائماً كنت عامله تليفوني فاتوره علشان أكلمه. المهم قبل خطبتي منه بيومين قال لي إنه كان يريدني منذ البداية من أجل فلوسي ولما شديت معه بالكلام قال لي إنه كان هذا من البدايه إنما الآن فأحبني من أجلي.

المهم جاء وخطبني وتمت الخطوبه ولكن من بعد الخطوبه لم يعد يحدثني مثل قبل الخطوبه مع العلم إني أنا إللي كنت بتصل بيه قبل الخطوبه بس هو كان بيرنلي وأنا كنت أتصل بيه. من بعد الخطوبه لم يعد يكلمني نهائي وأخته كانت تكلمني بالتليفون دائما. وكانت الشقه لم تكتمل وقال لي إنه منتظر فلوس علشان يكمل بناء الشقه وكنت أصدقه.

وكانت أخته وزوجها بيكلموني دائما ويقولوا لي إنهم يعرفون إنه معاه فلوس وإنه يخبئ علي هذا وإنه مسلف خاله مبلغ كبير من المال. وإنه طمعان فيا وكانوا يقولون لي هذا الكلام من أجل الأمانه.

وصدقتهم ومن ضمن الكلام إللي قالوه لي إنه قال لزوج أخته بدل ما تدفع فواتير تليفون ب 1000 جنيه تعطيهوملي أعمل بيهم حاجه للشقه. وحصلت مشكله بسبب كلام أخته معي بالرغم إني لن أخبره بكل الكلام الذي كنت أسمعه منها ثم قال لي مش تسمعي كلام حد غيري أنا.

وقولت له حاضر.

وفي يوم عزمنا في بلده أنا وأهلي علشان نتفرج علي الشقه التي من بعد الخطوبه ب 3 شهور لم يفعل فيها شئ لإنهائها. وبعدها إتصل بي زوج أخته أن خطيبي قبل العزومه بيومين قال لأمه أنه يرد العزومه هذه بعزومتنا لهم يوم الخطوبه وتبقي عزومه قصاد عزومه وبعدها ربنا يبقي يسهل. فسألت زوج أخته ماذا يقصد بذلك الكلام؟ قالي لي إنه يريد أن ينهي الموضوع.

ثم إتصلت بخطيبي في الصباح وقولت له هي نيتك من العزومه إنها عزومه قصاد عزومه . ثم ثار جداً وقال لي كذب ومش حصل . ثم قفل بوجهي التليفون ولم أكمل باقي كلامي معه. والأغرب من ذلك أن الموضوع مش كان يستاهل كل هذا. وإتصلت مرة ثانيه بعدها بساعه قولت له إسمعني أنا ذنبي إيه أنا هاقولك علي الكلام إللي أختك قالته لي هي وزوجها. لم يعطيني فرصه للكلام وقال لي خلصت وأنا خلصت الموضوع بالبيت وأنا أصلاً غلطان إني عرفتك وقفل بوجهب السماعه.

وعادت أمي تتصل به وتقول له ما الكلام الذي قولتله لبنتي هذا قال لها خلاص كل شئ قسمه ونصيب. وأنا قولت لبنتك مش تسمع كلام حد غيري . فقالت له أختك هي السبب وحاسب أختك قبل ما تتكلم مع بنتي. وبنتي كانت تراك لم تفعل شئ بالشقه فصدقت كل الكلام إللي أختك كانت بتقوله ليها. فقال لها خلصت. فقالت له الكلام ده بتاع ناس كبيره. قال لها أنا خلصت الموضوع مع أهلي في البيت.

المهم يا مروه. أهله بيتصلوا بيا الآن وعايزين الشبكة مع إن الشبكة دي كانت ب 3000 جنيه وأنا وافقت بكده وأقنعت أهلي بكده علشان ظروفه الماديه. فأهله بيصلوا بيا أنا يعني مش هاين عليهم يتصلوا بأهلي والرجاله إللي جم ساعة الخطوبه إتفقوا معاهم. وقولت أسفه إبنكم هو السبب في إللي حصل مش أنا وطالما إنتوا ناس بتفهم في الأصول يبأه إللي ساب مالوش حق في الشبكه المهم والده قال لي بصوت عالي يعني هاتقبلوها وكده. وشتمني وقفل في وشي السماعه.

المهم بعدها بكام يوم إللي كان خطيبي بعتلي رساله صوتيه فيها أإنيه إني أنا إللي سيبت وبيعت وكلام من ده. وأنا طبعاً مش رديت علي الرسالة. وبعدها بيوم بعتلي رساله وقالي إني أنا إللي وصلت الموضوع للدرجه دي وإنه مش عارف يعمل إيه بجد!!!!!!! أنا فعلاً مستغربه من الكلام ده هو أنا إللي بيعت!! هو أنا إللي نهيت الموضوع!!! أنا يا مروه مش عارفه أعمل إيه؟؟؟؟ مش عارفه أنساه؟؟؟؟

هاتقوليلي بعد كل ده مش عارفه تنسيه؟؟؟ هاقولك مش قادره أنسا إللي عمله بسهوله ينهي الموضوع بالشكل الحقير ده؟؟؟؟ طيب هو أنا كده ظلمني؟؟؟ وربنا هايخلص منه حقي؟؟؟ ياريت تردي عليا أنا هاموووت بجد. عايزه أعرف إذا كنت غلطانه ولا هو إللي غلطت. أنا مظلومه ولا ظالمه؟؟؟؟؟؟؟ أستحلفك تقوليلي؟؟؟؟ وهو بيبعتلي رسايل تاني ليه؟؟؟؟؟ عايز مني إيه؟؟؟؟؟ هل هو كده ندم ولا لسه هايندم بعد كده ولا مش هايندم عليا خالص؟؟؟؟؟؟؟ بالله عليكي تردي عليا…………………..

______________________________

انتى ظالمة! انتى ظلمتى نفسك و اتهاوتنى فى حقها جامد جدا
 
من الاول و هو باين انه "رمة" و انه بيستغلك
 
على فكرة الفقر عمره ما كان مبرر للدناوة
 
انا اعرف ناس كتير جدا فقرا لكن عندهم عفة نفس و اعتزاز و كرامة تتدرس فى الجامعات
 
لكن الاخ دا كان داخل على طمع و بيستغلك من أول موضوع التليفونات و الفواتير لحد الله أعلم ايه
 
و لما قالك انه كان طمعان قبل الخطوبة بيومين؟ انتى ازاى تكملى فى الموضوع؟
 
هو شايف قدامه واحدة مرمية عليه و ماسكة فيه بإيديها و سنانها و مهما يقول و لا يعمل و لا هى تسمع و لا تعرف مكلبشة … يعبرك و لا يحترمك ليه؟
 
انا أسفة على حدة كلامى
 
لكن دور الضحية مش ليكى
 
انتى اخترتى غلط و دفعتى التمن
 
تعملى ايه؟
 
تراجعى نفسك و تراجعى العلاقة دى من اولها لآخرها و تتعلمى من اخطائك و تعرفى انتى اتهاونتى فى حق نفسك فى ايه و تعاهدى نفسك ان اللى حصل دا مش هيحصل تانى
 
و كل ما تفكرى فيه و لا تحنى له افتكرى كرامتك و عزة نفسك
 
و لو كلمتيه و لا رجعتى اعرفى انك اتنازلتى عن آدميتك و عن كل حقوقك مقدما و أولها زوج يحترمك
 
موضوع اهله و الشبكة سيبى الكبار يخلصوه
 
و توقعى انه هيفضل يضغط عليكى عاطفيا علشان ترجعى و ياخد شبكته

 

Bookmark and Share