حاسة انى مذلولة

Date posted: September 22, 2010


 

الاول انا اتعرفت علي الشخص ده عن طريق اخته كانت زميلتي في الكليه واول ما كلمته كلمته في التليفون اسبوع وبعديها اتقابلنا وحبينا بعض اوي بقالنا دلوقت سنتين

هو كان معجب ببنت في النادي بس لما عرفني نساها

انا لما حبيته كنت تقيله في الاول

وبعدين فضلت اتنازل اتنازل عشان ميزعلش لانه من النوع اللي لو حد رفضله طلب يزعل لحد ما بقاش في حدود للتنازل واظنك فهمتيني بصراحه انا تعبت اوي ورجعت لعقلي وقلتله لو طلبت مني اي طلب من ده تاني مش هنكمل

واستغفرنا ربنا احنا الاتنين ولحد دلوقت ماشين كويس

المشكله اني مش عارفه اتعامل معاه

هو محرم عليا كل حاجه

واي حاجه فيها احتكاك باي ولد وانا مش عارفه اغير موقفي لاني قبلت كده من سنتين واتنازلت ولانه هيزعل تاااااااني وهو من النوع الجنتل اوي مع البنات وبيحب يخدم بصراحه انا بقيت بشك فيه مع اني عارفه انه بيحبني وبغيييييييييير عليه اوي

لدرجه اني بعيط قدامه كتييييييييير لما بغير او بزعل او اي حاجه وهو بقي بيستتفهني وبقي حاسس بنفسه اووووي وانا انعدمت ثقتي في نفسي يمكن عشان اتنازلتله عن حجات كتييير ونولته كتتتتتتتتتتتتتير ولا عشان ضعفت

وهو بيستغل غيرتي مع اني عمري ما بستغل غيرته وقلتله انا حاسه اني اتفرضت عليك من الاول وانك لو كنت شفتني انا والبنت اللي اعجبت بيها كنت هتختارها هيا

كل الافكار دي بقت مسيطره عليا اوووووووي يا مروه

في امل العلاقه دي تتحسن وارجع ثقتي في نفسي واكبر في نظره تاني واعرف اتعامل معاه ويحس اني حاجه لازم يحافظ عليها ولا كده خلاص هفضل البنت الرخيصه اللي عملت كل حاجه وازعلها بكلمه وارضيها بكلمه اتعامل معااااااه ازاي يا مروه ارجووووووكي بالتفيل

____________________________

 

شوفى يا مشمشة
 
الأصل فى العلاقات هو التكافؤ
 
انا مش باتكلم عن الفلوس و لا التعليم و المستوى الاجتماعى
 
انا باتكلم عن التكافؤ بين الاتنين فى العلاقة نفسها
 
و دا بقى المشكلة اللى فى علاقتك بالولد دا
 
فى طرف راكب على التانى
 
طرف بيأمر و طرف بينفذ
طرف بيحكم و طرف بيتحكم
طرف بياخد و طرف بيتنازل
 
و دى كدة مش علاقة متوازنة
 
فى ناس حتى وصلوا لدرجة انهم يصنفوا النوع دا من العلاقات بأنه علاقة مسيئة
Abusive relationship
 
و قالوا ان اللى انتى بتتعرضى له دا اسمه اساءة عاطفية
Emotional abuse
 
و ان افتقادك لثقتك فى نفسك و عدم احساسك بذاتك وعدم  الشعور بالأمان من النتائج الحتمية للعلاقة دى
 
انتى ما بقيتيش حبيبته و لا شريكته .. انتى بقيتى عبدة له .. كائن اقل منه فى كل حاجة … تابع بدل ما تكونى شريك
 
زى اتنين دخلوا شركة مع بعض
واحد دفع كل الفلوس و التانى بيدير بالمجهود
 
مع الوقت … لو اللى دفع الفلوس ماحسش بقيمة اللى بيدير و بمجهوده هيحوله من شريك لموظف .. مالوش رأى و لا قول فى حاجة
 
انتى طبعا مستخسرة السنتين اللى فاتو
و صعبان عليكى التنازلات
و حاسة انك لو سيبتيه هتموتى و حياتك هتقف
 
لكن انا عايزاكى تفكرى فى العشرين سنة اللى جايين من عمرك .. هتقضيهم ازاى؟
 
انا مش بطالبك انك تسيبيه
انا عايزاكى تستعيدى مكانك كحبيبة و شريكة
اللى مش عاجبك قولى عليه مش عاجبك
و تتناقشى
و تعترضى
و توصلوا مع بعض لحل يرضيكم انتم الاتنين
 

 

انتى غلطتى و ندمتى و بطلتى الغلط .. ليه بقى مستمتعة بتعذيب و اذلال نفسك؟
 
بالعكس .. انتى كدة هتبقى أم أفضل لولادك .. ازاى؟ اولا هتعرفى تفهمى ولادك مداخل الشيطان و هتعرفى تقويهم من جوة علشان ما يضعفوش و هتقدرى تقفى جنبهم يوم لما يحبوا و يحتاروا .. لانك عيشتى التجربة دى
 
ليه بقى منكدة على نفسك و بتخسرى فى الناس؟
 
انتى شابة و فى مقتبل حياتك و الدنيا ياما فيها و الحمد لله انها جت على قد كدة
 
 

Bookmark and Share