العريس متغرب و العروسة مش عايزة تسافر

Date posted: October 8, 2010


هاى يا مروة ازيك يا جميل انا معجبه جدا ومعجبه بأرائك أوي أوي وكنت عايزاكى تساعدينى فى مشكلتى

انا عندى 24 سنة وبشتتغل مهندسة انا مخطوبة لشاب من 8 شهور وكنت اعرفه من قبل الخطوبه من ايام الكليه وكنا صحاب جدا ايامها هو كان بيحبنى بس انا كنت بحب حد تانى والحد التانى ده كنت متعلقه بيه قوى قوى رغم انه كان بيخونى كتير وبيعمل فيا حاجات كتير ويسبنى ويرجعلى بس برده مكنتش قادره اسيبه لحد ما فعلا قدرت اخد الخطوة ديه وبعدت عنه تماما والحمدلله

وبعدها لما اشتغلت قابلت شاب فى الشغل اعجبت بيه وجه خطبنى بعدها بشهرين وبعد 6 شهور من خطوبتى ليه حسيت ان مش هو ده وانه مش مالى عينى وحسيت انى اتسرعت وأهلي كمان وافقني في رأيي ده وسيبته وفى نفس الوقت اللى سبته فيه اتقدملى خطيبى الحالى وقارنت بينه وبين خطيبى السابق وفى نفس الوقت رجعلى تانى فى الفترة ديه الشخص اللى انا كنت بحبه زمان بس لقيت نفسى مش عايزة ارجعله ابدا وتمسكت بخطيبى الحالى وحسيت انى مقتنعه بيه واتخطبنا

والامور كانت ماشيه الى حد ما كويسه وانه كان مالى عينى رغم انى مكنتش برده بحبه مثلا زى الشخص الاولانى بس كان الوضع عادى هو من النوع اللى مش رومانسى قوى ولا برده فيه الحنيه اللى انا محتاجها وانا كمان معنديش حته انى ابدا انا الاول لازم اللى قدامى يبدا عشان انا ابادله نفس الاحساس والشعور

انا اعترف انى برده كنت بغلط احيانا فى انى موفرش الفرص المناسبه لده او اننا نبقى لوحدنا وقت طويل عشان يبقى فى فرصه كان دايما يبقى موجود اختى ومامتى حتى لو خرجنا او حتى سافرنا اختى باستمرار موجوده وكمان صحباتنا بس للاسف انا كنت ببقى حبه انهم يبقوا معايا واكيد ده اثر على علاقتنا وبعدنا عن بعض شويه بشوية المهم معلش انا مطولة عليكى حبتين تلاته كمان هههه بس معليش انا بجد محتارة قوى ومش عارفه اوصل لقرار المهم

انا قررت انى اقوله واصارحه باللى انا حساه بس فوجئت انه بيقولى انا مش حاسس بده خالص واننا قريبن من بعض ومفيش الكلام ده وبعدها لاقيته فاجئنى بحوار سفر لامريكا وان واحد جايبله عقد وعايز يسافر وعايز يكتب الكتاب قبل ما يسافر رغم انه بيشتغل هنا شغلانة كويسه مش محتاج انه يسافر بره وفى نفس الوقت انا مش حابه اسافر ولا انى ابعد عن عيلتى واهلى وهو مش قادر يقتنع بده وبيتهمنى انى مش عايزة اضحى عشانه ولا عشان مستقبله واهلى موافقوش على كتب الكتاب ولما موافقوش قلى خلاص مش مشكله كتب الكتاب بس انا برده هسافر

بس قعدت فكرت فى كل اللى فات واللى كان بيحصل ما بينا حسيت انه كان حب عقل مش حب حقيقى وانى لو بحبه بجد كنت سافرت معاه ومكنتش فكرت ولا ترددت وانا دلوقتى حاسه اني عايزه اسيبه اوي مش عارفه هل اسيبه ؟ هل احساسى ده صح ؟ انا مش عرفه اوصل لقرار هل المشكله عندى انا ؟ هل انا هوائية بنجرف مع التيار باخد قرارتى بتسرع بجد مش عرفه وخايفه اندم بعد كده لو سبته هو اكيد هيبقى نصيب بس انا بجد محتارة قوى خايفه اظلمه واظلم نفسى ولا صح اني اسيبه لاني كده مش بحبه ؟؟؟

_______________________

اهلا يا مشمشة
 
انا اسفة انى اتأخرت فى الرد عليكى
 
موضوع السفر دا مش موضوع هين
 
بالعكس
دا موضوع حيوى جدا
و من اهم النقط اللى لازم اى اتنين يتكلموا فيها من اول ما يرتبطوا
 
فى جوازات كتير بتنهار فى اولها او بعد كام سنة او حتى بعد عشرين سنة لانهم مش متفقين فى موضوع السفر
 
لو انتى مبدأ السفر عندك مرفوض … من بابه كدة
يبقى دا لازم يتقال لاى حد هترتبطى بيه
 
علشان مش بعد الجواز تلاقى نفسك هنا لوحدك
او تلاقى نفسك فى بلد مش عايزة تعيشى فيها
 
 
لكن
لو مبدأ السفر مش مرفوض
 
و المشكلة انك مش عايزة تسافرى مع الشخص دا
او مش عايزة تبتدى حياة جديدة بعيد عن اهلك و اصحابك مع الشخص دا
 
يبقى هنا المشكلة فى الشخص مش فى المبدأ
 
انتى اللى لازم تحددى
انتى رافضة ايه؟
رافضة الغربة؟
و لا رافضة السفر مع الشخص دا بالذات؟
طيب و لو قال لك انه مش هيسافر؟ و بعدين كلامك واضح و مشاعرك واضحة فأنا مش فاهمة انتى بتسألينى على ايه؟
 
يعنى انتى لا بتحبيه و لا عايزة تسافرى معاه و بتعجبى بناس و انتى مخطوبة له .. ايه بقى؟ فين السؤال؟

Bookmark and Share